“ისე არ დაგემართოთ, როგორც ბათუმში დაემართათ!”

ლანჩხუთის საკრებულომ მაისის შემაჯამებელ სხდომაზე ერთ-ერთ მთავარ საკითხად მიმდინარე წლის ბიუჯეტში ცვლილების გახორციელებაზე იმსჯელა.

საკითხი, ფრაქციებსა თუ კომისიებში “მოთელვის” შემდეგ, სხდომაზე სამსჯელოდ მერიის საფინანსო სამსახურის უფროსმა, როლან ლაშხიამ წარმოადგინა.

როლანდ ლაშხიას განმარტებით, იგეგმება სტიქიის შედეგად დაზიანებული ჯურუყვეთის ადმინისტრაციული შენობის რეაბილიტაცია, რისთვისაც მთავრობის განკარგულებით, 110 000 ლარია გამოყოფილი.

ცვლილების მიხედვით, ქალაქის ადმინისტრაციულ ერთეულში მოეწყობა რკინა-ბეტონის სანიაღვრე არხები (895 754 ლარი); მამათის, ჩიბათის, მაჩხვარეთის, აცანის, შუხუთის, ღრმაღელის, გვიმბალაურის, ჩოჩხათისა და ნინოშვილის ადმინისტრაციულ ერთეულებში გზის სარეაბილიტაციო სამუშაოები ჩატარდება (957874 ლარი); ბავშვთა საფეხბურთო სკოლის ეზოს ინფრასტრუქტურა მოწესრიგდება (1036231 ლარი).

ინფრასტრუქტურული პროექტების გახორციელების შედეგად დარჩენილი ეკონომიიდან 52 795 ლარი მიიმართება სოფელ გვიმბალაურში საჭიდაო დარბაზის სახურავისა და გარე ფასადის შეკეთებაზე, 22 438 ლარი კი _ სტიქიის შედეგად დაზიანებული ობიექტების საპროექტო-სახარჯთაღრიცხვო დოკუმენტაციის შედგენის დასაფინანსებლად.

გარდა ამისა, საქართველოს რეგიონებში გასახორციელებელი პროექტების ფონდიდან ლანჩხუთს 499 402 ლარი ერგო, რომლის თანადაფინანსება 37 591 ლარს შეადგენს. ეს თანხა, რომლის ჯამური რაოდენობაც 536 993 ლარია, მიიმართება ქალაქში შიდა გზებზე რკინა-ბეტონის სანიაღვრე არხების მოწყობის სამუშაოების დასაფინანსებლად.

საფინანსო სამსახურის მოხსენებიდან გაირკვა, რომ თანხა, რომელიც ლანჩხუთს რეგიონებში გასახორციელებელი პროექტების ფონდიდან ერგო, სტიქიის პრევენციისთვისაა გამიზნული. სწორედ ამასთან დაკავშირებით გაუჩნდა კითხვა საკრებულოს ოპოზიციონერ წევრს კახა ასკურავას _ მისთვის გაუგებარი დარჩა, რას ნიშნავს ტერმინი “სტიქიის პრევენცია”:

“გამარკვიეთ, თანადაფინანსებაში რატომ შევდივართ, როცა საქმე სტიქიას ეხება?! საერთოდაც, რომელ სტიქიაზეა საუბარი, ვინ იცის და ვის შეუძლია წინასწარ განსაზღვროს, რა სახის და რაოდენობის ზარალს მოიტანს იგი?! ამ ტერმინის შემოღება მხოლოდ იმას ემსახურება, რომ შესყიდვა გამარტივდეს და სასურველმა პირმა მიიღოს სასურველი თანხები. ესაა და მეტი არაფერი. მე, უბრალოდ, გაფრთხილებთ _ ისე არ დაგემართოთ, როგორც ბათუმში მოხდა ამ დღეებში”, _ მმართველი გუნდისადმი გაფრთხილება არ დაიზარა ასკურავამ.

ოპოზიციონერი დეპუტატის მხრიდან გამოთქმულ ეჭვს სხდომაზე მყოფი მუნიციპალიტეტის პირველი პირი, ალექსანდრე სარიშვილი გამოეხმაურა და ასკურავა დაამშვიდა, რომ მსგავსი არაფერი ემუქრებათ ლანჩხუთის პირველ პირებს:

“არანაირ გამარტივებასთან არ გვაქვს საქმე _ ჩვეულებრივი ტენდერი ჩატარდა. არანაირი პრობლემა არაა და არანაირი გაფრთხილება არ გვჭირდება მაგ კუთხით მაინც. ეს სტიქიის პრევენციის თანხებია და თუ რამეს გასაკეთებლად მუნიციპალიტეტი თანხებს მიიღებს, ამაში ცუდი ნამდვილად არაფერია”, _ დაამშვიდა სარიშვილმა ასკურავა.

საბოლოოდ კი, მცირედი შენიშვნების გამოთქმის შემდეგ, სხდომაზე მყოფმა დეპუტატებმა ერთსულოვნად დაუჭირეს მხარი ბიუჯეტში ცვლილების გახორციელებას.