საკითხი _ “ოზურგეთის მუნიციპალიტეტის საკრებულოს ფრაქციის: “ოზურგეთის მომავლისთვის” მოთხოვნით, ოზურგეთის მუნიციპალიტეტის საზღვრებში არსებულ ქვიშა-ხრეშის მოპოვებასთან დაკავშირებული პრობლემების შესწავლის მიზნით, დროებითი სამუშაო ჯგუფის შექმნის შესახებ”, დამოუკიდებელმა დეპუტატმა ლევან მგელაძემ წარმოადგინა და განაცხადა:
“მოსახლეობისგან შემოსული საჩივრებისა და საპროტესტო აქციებიდან გამომდინარე, შეძლებისდაგვარად დავათვალიერეთ ზოგიერთი კარიერი და გავესაუბრეთ მოსახლეობას. ნანახმა მოლოდინს გადააჭარბა _ ვიზუალური დათვალიერებით აშკარაა, რომ ინერტული მასალის მოპოვება და ტრანსპორტირება ხდება კანონის უხეში დარღვევით. ფაქტობრივად, განადგურებულია მდინარის ხეობის ლანდშაფტი, ფლორა და ფაუნა, ეროზირებულია ნიადაგი, დამშრალია არტეზიული ჭები, დაზიანებული და ამორტიზირებულია ადგილობრივი რესპუბლიკური მნიშვნელობის გზები და დასაშვებზე მაღალია ხმაურის და დამტვერიანების კოეფიციენტი.
რამდენიმე სოფელში მოსახლეობასა და ქვიშა-ხრეშის მომპოვებლებს შორის მოხდა სიტყვიერი და ფიზიკური დაპირისპირება. როგორც თქვენთვის ცნობილია, ამ თემასთან დაკავშირებით ოზურგეთის საკრებულოში შემოსულია ელექტრონული პეტიციები ორი სხვადასხვა ლოკაციიდან. მიგვაჩნია, რომ ეს მოთხოვნები საჭიროებს კვალიფიციურ და სიღრმისეულ შესწავლას, რათა დაცული იქნას მოსახლეობის ინტერესები და რეგიონს ავაცილოთ ეკოლოგიური კატასტროფა”, _ თქვა მგელაძემ და მოითხოვა, შეიქმნას დროებითი სამუშაო ჯგუფი, რომელიც შეისწავლის მუნიციპალიტეტის საზღვრებში არსებული ქვიშა-ხრეშის მოპოვებასთან დაკავშირებულ პრობლემებს.
საპასუხოდ, საკრებულოს თავმჯდომარის მოადგილემ, გიორგი ღურჯუმელიძემ განაცხადა, რომ ასეთი სამუშაო ჯგუფის შექმნის უფლება საკრებულოს არ აქვს და ეს არ არის მათ კომპეტენცია: “აქ მუშაობს კომისიები. ასევე, წიაღის ეროვნულ სააგენტოში საკრებულომ გაგზავნა ამ პრობლემის შესახებ წერილი, რომლის პასუხიც უკვე მივიღეთ”, _ თქვა ღურჯუმელიძემ და აღნიშნული წერილი იქვე გადასცა ლევან მგელაძეს. მგელაძემ წაიკითხა სააგენტოდან მოწერილი პასუხი, სადაც ნათქვამია, რომ “სააგენტო სისტემატიურად ახდენს ხეობის ვიზუალურ დათვალიერებას, ასევე ახდენს ლიცენზიების პირობების შესრულების მდგომარეობის შესწავლას და ყველაფერი რიგზეა. კერძოდ: ყველა ლიცენზია გაცემულია ჭარბ აკუმულაციურ უბნებზე, რაც დაფიქსირებულია ლიცენზიების გაცემამდე შედგენილ გეოსაინფორმაციო პაკეტებში და რომ ჭარბი აკუმულაციური უბნის არსებობისას აუცილებელია, ინერტული მასალის ამოღება”.
ლევან მგელაძე სააგენტოს პასუხის შინაარსმა გააღიზიანა და ღურჯუმელიძეს ჰკითხა, თქვენ ეს პასუხი თუ გაკმაყოფილებთო.
_ მე მივესალმები ლევანის გულისტკივილს. ორი ელექტრონული პეტიცია იყო საკრებულოში შემოსული და გავგზავნეთ სააგენტოში. მივიღეთ პასუხი, სადაც წერია, რომ აქ შეიქმნას სამუშაო ჯგუფი. ეს არ არის ჩვენი კომპეტენცია, _ თქვა ღურჯუმელიძემ,
ლევან მგელაძემ კვლავ ვერ დაფარა ემოცია:
_ ეს პასუხი არის კომპეტენცია? რას ვშვებით _ ამ პასუხის შემდეგ ვყრით ფარ-ხმალს და არაფერს ვაკეთებთ?! ჩვენ ხალხის მიერ ვართ არჩეულები და ჩვენ უნდა ვიდგეთ ამ ხალხის გვერდით, მათი ინტერესების დაცვის მხარეს! საკრებულო ხალხის მიერ არჩეული კოლეგიალური ორგანოა, _ თქვა მან.
_ ლევან, პოპულარულ თემას ასე ნუ გამოიყენებ. ვერ დაგეთანხმები იმ ნაწილში, რომ საკრებულომ გულთან არ მიიტანა ეს საკითხი. მივმართეთ სააგენტოს. მივიღეთ პასუხი. საკრებულოში არის კომისიები, რომლებსაც კიდევ შეუძლიათ, გააგრძელონ ამ საკითხზე მუშაობა, _ თავის მხრივ აღელდა ღურჯუმელიძეც.
_ პოპულისტი შენ თავად ხარ ახლა. მე პოპულისტი არასდროს ვყოფილვარ! _ უკვე გაბრაზდა მგელაძე.
_ პოპულისტი არ მიწოდებია. კარგად მომისმინე _ პოპულარულ თემას ეხები,-მეთქი, ეს გითხარი, _ სწრაფად მიაგება ღურჯუმელიძემაც.
საკრებულოს დეპუტატმა შოთა გოგიბერიძემ განაცხადა, რომ თემა იმდენად აქტუალურია და მტკივნეული, კვლავ საკრებულოს განხილვის თემად უნდა დარჩეს.
_ ეს არ განეკუთვნება საკრებულოს უფლებამოსილებას, _ კვლავ კანონის ნიუანსებიდან გამომდინარე უპასუხა ღურჯუმელიძემ, რასაც მგელაძის კვლავ გაფიცხება მოჰყვა.
დეპუტატმა ლავრენტი ბიგვავამ განაცხადა, რომ მათ შეხვედრები ჰქონდათ სოფლების _ დვაბზუს, ცხემლისხიდის, ლიხაურის მოსახლეობასთან:
_ კვლავ მოვიწვიოთ სპეციალისტები, კომისიებმა გააგრძელონ მუშაობა, მოვითხოვოთ გეოსაინფორმაციო პაკეტების გადამოწმება, არის თუ არა პარამეტრები სწორი და ასე ნუ ვიდავებთ, რადგან პრობლემის შემსწავლელი სამუშაო ჯგუფის შექმნა საკრებულოს კომპეტენცია არ არის, _ თქვა მან.
შოთა გოგიბერიძემ წამოაყენა წინადადება, რომ შეიქმნას ისეთი ჯგუფი, რომელიც წინადადებით შევა ხელისუფლებასთან.
_ ამ თემაზე გუბერნატორიც საქმის კურსშია, ჰქონდა შეხვედრა. ახლაც ვთხოვოთ, რომ მთავრობამდე მიიტანოს ეს ხმა და ზემდგომთა წინაშე დასვას საკითხი, _ თქვა მან .
ხანგრძლივი დავისა და ხმაურის შემდეგ, გამოთქვეს თვალსაზრისი, რომ შეიქმნას მუშა-ჯგუფი, რომელიც საკანონმდებლო ინიციატივას დააყენებს მთავრობასთან, გააუმჯობესოს საკანონმდებლო რეგულაციები ქვიშა-ხრეშის მოპოვების მკაცრად დაცვაზე.
თუმცა ამ ფორმულირებით ბიურო არ დათანხმდა დროებითი სამუშაო ჯგუფის შექმნას და დაავალა ორ მოქმედ კომისიას, რომ ფრაქციის მიერ შემოტანილი მოხსენებითი ბარათის შესწავლის მიზნით, მოსახლეობის ფართო ინტერესებიდან გამომდინარე, დაევალოს საკრებულოს ორ შესაბამის კომისიას, შეისწავლოს საკითხი და საკრებულოს წარმოუდგინოს სრული ინფორმაცია კარიერებზე არსებული მდგომარეობის _ ქვისა-ხრეშის მოპოვების, ექსპლოატაციის წესების დაცვის, ამოღების ნორმატივების გათვალისწინების, შესახებ, არაუგვიანეს ერთი თვისა და წარმოადგინოს საკრებულოს სხდომაზე ინფორმაცია, შემდგომი რეაგირების მიზნით.
