ხვალიდან საქართველოსა და რუსეთს შორის მოქალაქეთა გადაადგილება შეიზღუდება _ ამის შესახებ გადაწყვეტილება საქართველოს პრემიერ-მინისტრმა მიიღო. გიორგი გახარიას დავალებით, პრემიერის სპეციალური წარმომადგენელი რუსეთის ფედერაციასთან ურთიერთობის საკითხებში ზურაბ აბაშიძე დღეს დილით ტელეფონით ესაუბრა საქართველოსა და რუსეთს შორის მიმდინარე ორმხრივი დიალოგის (ე.წ. პრაღის ფორმატი) ფარგლებში რუსეთის ფედერაციის დელეგაციის ხელმძღვანელს, რუსეთის ფედერალური სათათბიროს ფედერალური საბჭოს წევრს გრიგორი კარასინს.
აბაშიძემ და კარასინმა კორონავირუსის გავრცელების პრევენციის მიზნით, 16 მარტიდან ორ ქვეყანას შორის მოქალაქეთა გადაადგილების დროებით შეჩერების შესახებ ისაუბრეს.
აღინიშნა, რომ ეს გადაწყვეტილება არ გავრცელდება, შესაბამისად, რუსეთის ფედერაციის და საქართველოს იმ მოქალაქეებზე, რომლებიც გამოთქვამენ საკუთარ ქვეყანაში დაბრუნების სურვილს.
