ლანჩხუთის საკრებულოს წევრებს, გასულ კვირას, ფაქტობრივად, ზედიზედ ორჯერ მოუხდათ შეკრება. პირველ სხდომაზე, რომელსაც ადგილობრივი საკანონმდებლო ორგანოს პირველი პირი, ბესიკ ტაბიძე უძღვებოდა, დღის წესრიგის შესაბამისად, დეპუტატებს ორ საკითხზე მართებდათ გადაწყვეტილების მიღება.
პირველ საკითხად მერიის ის ინიციატივა იყო წარმოდგენილი, რომელიც შპს “ფეხბურთის კლუბ ლანჩხუთის გურიას” დაფუძნებას ეხებოდა. იქიდან გამომდინარე, რომ კლუბის ახალი მენეჯმენტი სამომავლო განვითარებისთვის ითხოვდა, ამ სტატუსის ამოქმედება და საკითხთან დაკავშირებით გადაწყვეტილების მიღება გადაუდებელ აუცილებლობას წარმოადგენდა. სხდომაზე მყოფმა დეპუტატებმა ერთსულოვნად დაუჭირეს მას მხარი. როგორც ითქვა, კლუბის შპს-დ დაფუძნება არ არის დაკავშირებული ადგილობრივი ბიუჯეტის ხარჯების ზრდასთან, ვინაიდან დაფინანსება მოხდება ა(ა)იპ “ქართული ფეხბურთის განვითარების ფონდიდან” ა(ა)იპ “ლანჩხუთის გურიასთვის” გამოყოფილი ასიგნებების ფარგლებში.
სხდომაზე, რომელსაც დეპუტატების გარდა, მერის მოადგილე და უშუალოდ საკითხის მომხსენებლები ესწრებოდნენ, დღის წესრიგის შესაბამისად, კიდევ ერთი საკითხი განიხილეს და დასტურიც მისცეს. კერძოდ, ადმინისტრაციული წარმოება დაიწყო მუნიციპალიტეტის წლის მთავარ საფინანსო დოკუმენტში ცვლილების გახორციელების თაობაზე. როგორც სხდომაზე გაჟღერდა, ცვლილება შეეხება დასუფთავების ღონისძიებებში არსებული პრობლემების ნაწილობრივი მოგვარების მიზნით 100 ცალი 1100 ლიტრი ტევადობის ნაგვის ურნების შეძენას და ნიგოითის ადმინისტრაციულ ერთეულში, ელექტროენერგიის ქსელში ჩართვის მიზნით, 800 ლარით კაპიტალური დაბანდებების გაზრდას გარე განათების სფეროში.
რაც შეეხება მეორედ გამართულ რიგგარეშე სხდომას, რომელსაც საკრებულოს თავმჯდომარის მოვალეობის შემსრულებელი ვლადიმერ ნანაძე წაუძღვა, აქ დეპუტატებმა დღის წესრიგით გათვალისწინებულ სამ საკითხზე იმსჯელეს და გადაწყვეტილებაც მიიღეს.
საკრებულომ დაამტკიცა დადგენილება “ლანჩხუთის მუნიციპალიტეტის მონაწილეობით ბიუჯეტის პროგრამის გახორციელების წესის დადგენის შესახებ”. მონაწილეობითი ბიუჯეტის პროგრამა წარმოადგენს მუნიციპალიტეტის საბიუჯეტო დაგეგმვის, პროექტების გახორციელების და მონიტორინგის პროცესში მოქალაქეთა მონაწილეობის ფორმას, რომელიც ორიენტირებულია მოქალაქეთა შესაძლებლობის გაძლიერებისკენ, რომ მათ დამოუკიდებლად და საკუთარი პასუხისმგებლობით უპასუხონ ადგილობრივი მნიშვნელობის საჭიროებებს, მუნიციპალიტეტის მხარდაჭერით.
ასევე, დამტკიცდა “ლანჩხუთის მუნიციპალიტეტის მერიის სოციალური და ჯანდაცვის სამსახურის დებულება, შევიდა ცვლილება “ლანჩხუთის მუნიციპალიტეტის მერიის თანამდებობის პირთა და სხვა მოსამსახურეთა საშტატო ნუსხისა და თანამდებობრივი სარგოს ოდენობების დამტკიცების შესახებ” ლანჩხუთის მუნიციპალიტეტის საკრებულოს 2017 წლის 25 დეკემბრის დადგენილებაში.
მორიგი სხდომის გამართვა ლანჩხუთის საკრებულოში 31 აგვისტოსთვისაა ჩანიშნული.
