თბილისში საპროტესტო აქცია ისევ მიმდინარეობს. დედაქალაქის მთავარ გამზირზე, პარლამენტის წინ, კვლავ არაერთი ადამიანია თავმოყრილი.
“გურია ნიუსი” რამდენიმე მათგანს გაესაუბრა.
“ისტორიკოსი ვარ. გამიმართლა რომ ხელნაწერებთან მიწევდა მუშაობა. მიმაჩნია, რომ ევროკავშირის ოჯახის წევრობა არის ჩვენი ბუნებრივი მდგომარეობა. ჩვენი ისტორია შეიძლება ერთი წინადადებით ვთქვათ, ეს არის საქართველოს ევროპული ისტორიის ფურცლები. აქ ყოფნით მაქვს იმის მოლოდინი, რომ ნებისმიერ შემთხვევაში ჩვენი ძალისხმევა არის პრესინგი საზოგადოების იმ ნაწილზე,რომელიც ტყვედ ჰყავს უზურპატორ ხელისუფლებას და ასევე ეს არის პრესინგი დასავლეთზე და ჩვენ ლომის წვლილი შეგვაქვს საქართველოს ევროკავშირში გაწევრიანების გზაზე”,_ ამბობს ჩვენთან საუბრისას ნესტან ბაგაური.
აქციაზე მყოფი კიდევ ერთი მოქალაქე, რომელიც გაგვეცნო, როგორც უჩა ექიმი, გვეუბნება, რომ საქართველო უნდა დაბრუნდეს იმ გზაზე, სადაც იყო და სჯერავს, რომ პროტესტის შედეგად ამის მიღწევა შეიძლება.
“ძალიან დავიგვიანეთ, მაგრამ სჯობს გვიან, ვიდრე არასდროს. რაც შეეხება მოთხოვნებს, აქ მოსათხოვიც აღარაფერია. უნდა დავბრუნდეთ იმ გზაზე, იმ კურსზე, სადაც ვიყავით ოდითგანვე და ზუსტად ვიცით, რომ ვიქნებით. უბრალოდ კარგი იქნება ამ უზურპაციას დროზე თუ მიხვდება ხელისუფლება. თვითონაც ნაკლებს იწვალებს და ჩვენც ნაკლებს გვაწვალებს. მგონია, რომ შედეგი მოლოდინს გადააჭარბებს, არა მარტო იმით, რომ დავბრუნდებით იქ, სადაც უნდა ვიყოთ, არამედ უფრო ჩქარი ტემპით გავალთ სამშვიდობოს”,_ გვეუბნება ის.
ხათუნა ჩიხლაძე: ჩემს პოზიციას გამოვხატავ ბანერით. უპირველეს ყოვლისა უპირობო გათავისუფლება პოლიტპატიმრებს, ახალი არჩევნები ახალი ადმინისტრაციით. სხვა გზა უბრალოდ არ გვაქვს. არა გარუსებას! საქართველოს გადარჩენის ერთადერთი გზა არის ევროპა.
ინფორმაციისთვის, დღის განმავლობაში არაერთი სფეროს წარმომადგენლები შეიკრიბნენ და მარშით გადაინაცვლეს პარლამენტის შენობასთან. საპროტესტო მსვლელობები გამართეს კულტურის სფეროს წარმომადგენლებმა, ხელოვანებმა, დევნილებმა ბანერით “აფხაზეთის დაბრუნება ევროინტეგრაციაშია”, ასევე საფეხბურთო კლუბების “რეალის” და “ბარსელონას” ფანებმა. პროტესტის ნიშნად შეიკრიბნენ ტექნოლოგიური სფეროს წარმომადგენლებიც, ცხოველთამოყვარულებიც.
შეგახსენებთ, რომ მოქალაქეები 28 ნოემბრის შემდეგ უწყვეტ საპროტესტო აქციებს მართავენ.
ავტორი
