ოზურგეთის მუნიციპალიტეტის მერიაში მიმდინარე რეორგანიზაციის შედეგად არსებული 103 საშტატო ერთეულიდან 95 დარჩება _ ყველაზე დიდი შემცირება სოციალურ სამსახურში იგეგმება, შემცირებები შეეხება, ასევე, ინფრასტრუქტურულ სამსახურს, მაშინ როცა მატერიალურ–ტექნიკურ სამსახურს დამატებითი შტატები ემატება.
სწორედ ამ საკითხმა გამოიწვია ყველაზე მეტი ინტერესი 14 ივლისს გამართულ ოზურგეთის მუნიციპალიტეტის საკრებულოს რიგგარეშე სხდომაზე, რომელსაც საკრებულოს თავმჯდომარე დავით დარჩია უძღვებოდა.
დღის წესრიგის ერთ-ერთი მთავარი საკითხი იყო “ოზურგეთის მუნიციპალიტეტის მერიის თანამდებობის პირთა და სხვა მოსამსახურეთა თანამდებობრივი სარგოების ოდენობების განსაზღვრისა და საშტატო ნუსხის დამტკიცების შესახებ”.
საკითხი ადმინისტრაციული სამსახურის უფროსმა გენო მორჩილაძემ წარადგინა. მისი განმარტებით, ყველაზე მეტი შემცირება სოციალურ სამსახურში განხორციელდება, ხოლო ინფრასტრუქტურულ სამსახურშიც შტატები მცირდება. ამასთან, მატერიალურ-ტექნიკური სამსახურის გაძლიერება იგეგმება.
ამ გადაწყვეტილებამ სხდომაზე კითხვებიც გააჩინა _ რატომ ძლიერდება მატერიალურ-ტექნიკური სამსახური სოციალური და ინფრასტრუქტურული სამსახურების ხარჯზე?
როგორც გაირკვა, ჯანდაცვისა და სოციალურ სამსახურში ოპტიმიზაცია ყველაზე მეტ _ ექვსიდან სამ საშტატო ერთეულს შეეხება.
გენო მორჩილაძის გამოსვლის შემდეგ საკრებულოს წევრებმა, ძირითადად, რეორგანიზაციის აუცილებლობაზე ისაუბრეს და აღნიშნეს, რომ, მათი შეფასებით, ცვლილებები მერიის მუშაობის ეფექტიანობაზე დადებითად აისახება.
საკრებულოს წევრმა ეროდი გორდელაძემ განაცხადა, რომ რეორგანიზაციიდან გამომდინარე, ცალკეული სამსახურების დებულებებში ცვლილებები შევიდა.
_ რეორგანიზაციიდან გამომდინარე, ცალკეული სამსახურების დებულებებში შევიდა ცვლილება. დამოუკიდებელი გახდება შესყიდვების სამსახური. ამ ეტაპზე შეგვპირდნენ, რომ იმ ადამიანების მიმართ, ვინც შემცირებაში მოჰყვა, პასუხისმგებლობას აიღებენ. მათთან ერთად ჩვენც გვეკისრება პასუხისმგებლობა, _ თქვა გორდელაძემ, რომელიც ერთადერთი იყო, ვინც პასუხისმგებლობის საკითხზე ასე კონკრეტულად ისაუბრა.
საფინანსო-საბიუჯეტო კომისიის თავმჯდომარემ, გელა ჩავლეშვილმა ვრცლად ისაუბრა კომისიის მიერ განხილულ საკითხზე და აღნიშნა, რომ კომისიას მიზანშეწონილად მიაჩნია მერიის შესყიდვების სამსახურის შექმნა (აქამდე შესყიდვების განყოფილება ფუნქციონირებდა. ავტ.). მისი თქმით, ეს პირველად დამოუკიდებელ სტრუქტურულ ერთეულად ჩამოყალიბდება.
_ კომისიას მიაჩნია, რომ საფინანსო–საბიუჯეტო სამსახურის საბიუჯეტო და სახაზინო–საბუღალტრო აღრიცხვის განყოფილებების გაერთიანებამ, შესაძლოა, საბიუჯეტო პროცესის დაგეგმვის, შესრულების მონიტორინგის, ფინანსური რესურსების მართვისა და ანალიტიკა–პროგნოზირების მიმართულებით გარკვეული რისკები შექმნას, _ თქვა გელა ჩავლეშვილმა.
მან “გურია ნიუსთან” საუბარშიც აღნიშნა, რომ პასუხისმგებლობა ყველას ეკისრება იმ ადამიანების მიმართ, ვინც რეორგანიზაციის შედეგად სამსახურის მიღმა დარჩება, თუმცა, კონკრეტულად, რა ფორმით გამოიხატება ეს პასუხისმგებლობა, სხდომაზე არ თქმულა.
ამასთან, გაჟღერებული ინფორმაციის თანახმად, რეორგანიზაციის შედეგად სამსახურის მიღმა არაერთი გამოცდილი თანამშრომელი რჩება.
სხდომის დასრულების შემდეგ “გურია ნიუსმა” საკრებულოს თავმჯდომარეს, დავით დარჩიას ჰკითხა, რამდენად ითავისებს პასუხისმგებლობას რეორგანიზაციის პროცესზე, მაშინ, როდესაც არაერთი ადამიანი სამსახურის გარეშე რჩება.
_ ჩვენ ჩვენი საქმე პირნათლად შევასრულეთ. დანარჩენი იქეთ ჰკითხეთ, _ გვითხრა დავით დარჩიამ და მუნიციპალიტეტის მერიისკენ მიგვითითა.
როგორც ამ ეტაპზე ჩანს, ოზურგეთის მუნიციპალიტეტის მერიის რეორგანიზაციის შედეგად შემცირებები პრიორიტეტულ _ სოციალურ და ინფრასტრუქტურულ სამსახურებში ხორციელდება, მაშინ, როცა მატერიალურ-ტექნიკური სამსახური დამატებით საშტატო ერთეულებს იღებს.
რეორგანიზაციის შედეგად რამდენი თანამშრომელი დატოვებს სამსახურს და რა კრიტერიუმებით შეირჩევიან დარჩენილი თანამშრომლები, ჩვენთვის, ჯერჯერობით, უცნობია.
ავტორი
