“ეფექტიანი მმართველობა” თუ “საკადრო წმენდა” _ რეორგანიზაცია ლანჩხუთის მერიაში

ლანჩხუთის მუნიციპალიტეტის მერიაში სტრუქტურული რეორგანიზაციის პროცესი მიმდინარეობს. საკითხთან დაკავშირებით ადმინისტრაციული წარმოება საკრებულომ გასულ კვირას დაიწყო და საამისოდ რიგგარეშე სხდომაც გამართა.

როგორც ადგილობრივი ხელისუფლების აღმასრულებელ რგოლში განმარტავენ, ამ სტრუქტურული რეორგანიზაციის მიზეზი და მიზანი არის ის, რომ უწყების მუშაობამ გარკვეული გამოწვევები აჩვენა, რაც გარკვეულ სისტემურ განახლებებსა და ახალ ფუნქციურ გადანაწილებას მოითხოვდა, რათა მუშაობა გახდეს უფრო ეფექტური და ხარისხიანი.

განმარტებით ბარათში, რომლითაც მერიამ საკრებულოს მიმართა, ვკითხულობთ: “სისტემური, ეფექტიანი მმართველობის უზრუნველყოფის, ადეკვატური სტრუქტურის შექმნისა და საბიუჯეტო სახსრების ეფექტიანად გამოყენების მიზნით, მიმდინარე წლის 15 მაისიდან დავიწყეთ მერიის სტრუქტურული რეორგანიზაცია, რის შედეგადაც მიიღება მერიის ნაწილობრივ ან მთლიანად ახალი სტრუქტურა”.

რაც შეეხება საშტატო ნუსხას, მერიის განმარტებით, შტატები გადაადგილდება ან შემცირდება.

ზემოთ აღნიშნულ რიგგარეშე სხდომაზე დეპუტატებს საკითხი განსახილველად მერიის ადმინისტრაციული და სამართლებრივი უზრუნველყოფის სამსახურის ხელმძღვანელმა, შოთა ჩაგუნავამ, გააცნო და მისი განმარტებით, მერიაში თანამშრომელთა შემცირებები დიდად მოსალოდნელი არ არის.

“ცვლილებებიდან გამომდინარე, არ უნდა მოხდეს ხარჯებისა და სახსრების ზრდა. რაც შეეხება საკადრო ცვლილებებს, არსებითად საშტატო რაოდენობაში დიდი ცვლილებები არ იქნება“, _ თქვა ჩაგუნავამ.

ოპოზიციას კი მიმდინარე სტრუქტურული რეორგანიზაცია ეჭვს უჩენს, რომ ეს ყველაფერი საკადრო წმენდის ერთგვარი მექანიზმია. “ლელოს” ადგილობრივი ლიდერის, გოჩა ჯანაშიას თქმით, რეორგანიზაცია საბაბია პოლიტიკურად საეჭვო საჯარო პირების დასასჯელად:

“ეს რეორგანიზაცია ერთიანი პარტიული მესიჯბოქსის საშუალებით ხორციელდება და ყველა მუნიციპალიტეტს მოიცავს. ჰოდა, ამიტომაც ჩნდება ეჭვი, ხელისუფლება არასანდო კადრებს ასე რომ მოიშორებს. ჯერ არ ვიცით, რა შედეგი დადგება, ვინ დატოვებს სამსახურს, მაგრამ აქედანაც ჩანს, რომ გარკვეულ საჯარო მოხელეებს მოიშორებენ, ზოგიერთს მთლად ვერ დასჯიან, მაგრამ რანგში დააქვეითებენ და ასე დასჯიან მათთვის საეჭვო პირებს.

ყველა საჯარო მოხელეზე რომ ამომწურავი ინფორმაცია გააჩნიათ, ეს ცხადია და სწორედ ამის საფუძველზე მოხდება წმენდა და არა პროფესიონალიზმის მიხედვით. სხვა მუნიციპალიტეტებში რეორგანიზაციის შედეგი უკვე დადგა _ ბევრგან მტკივნეულად, ზოგან ნაკლებად მტკივნეულად, მაგრამ ყველგან იგრძნობა, რომ პოსტებს პოლიტიკური ნიშნის მიხედვით ატოვებინებენ და ამიტომაც მიმაჩნია, ეს ყველაფერი პარტიული წმენდაა და მეტი არაფერი.

კი, რამდენიმე სტრუქტურულ ცვლილებასაც ვნახავთ, ახალი სამსახურებიც გაჩნდება, თუმცა ეს ყველაფერი უფრო ფასადური ფაცი–ფუცი მგონია“, _ ამბობს ჯანაშია.