ჩოხატაურის მუნიციპალიტეტის სოფელ საჭამიასერში მისვლა მიკროავტობუსით გადავწყვიტე. ამ კუთხით, შეიძლება ითქვას, რომ პრობლემა არ არის _ სოფლის ცენტრამდე მიკროავტობუსი როგორც ჩოხატაურიდან, ისე ბათუმიდან დადის.
მიკროავტობუსში ქალები და ბავშვები იყვნენ. როგორც ერთ-ერთმა მგზავრმა მითხრა, თუ სოფლის პრობლემების მოსასმენად ვაპირებდი საჭამიასერში მისვლას, დიდი იმედი არ უნდა მქონოდა.
“ყველა არჩევნებზე მმართველი პარტია იგებს და სავსეა სოფელი პრობლემებით. აგერ, წლებია, ბავშვებს სკოლა არ აუშენეს და ახლა სწავლა-განათლება ყოფილი საავადმყოფოს შენობაში მიმდინარეობს”, _ გვითხრა ერთ-ერთმა მგზავრმა.
ახალი სკოლის მშენებლობა ყველას უნდა, თუმცა, ამ საკითხზე საუბარი თითქმის არავის სურს.
სოფლის ცენტრში, წლების წინ აშენებულ შენობას, სადაც ამბულატორია და მაღაზიაა განთავსებული, უკვე სიძველე შეჰპარვია. კულტურის სახლი დაუნგრევიათ და მის ადგილას საბავშვო ბაღი აუშენებიათ.
სოფლის ცენტრიდან რამდენიმე მეტრში წმინდა ბარბარეს სახელობის ეკლესია დგას. მისი გახსნისთვის ფინანსები ისევ საჭიროა და ეკლესიის მესვეურები დაფინანსების მოლოდინში არიან.
აშკარად რეაბილიტაციას საჭიროებს საფეხბურთო მოედანიც, რომელიც ზაფხულში დამსვენებლებისა და ადგილობრივების თავშეყრის ერთ-ერთი ადგილია.
საფეხბურთო მოედნის ზემოთ დგას სკოლა, სადაც რამდენიმე წელია სასწავლო პროცესი შეჩერებულია. ბოლო ინფორმაციით, სკოლის შენობის დემონტაჟი იგეგმება. ამ ეტაპზე უცნობია, ზუსტად როდის დაიწყება ახალი სკოლის მშენებლობა.
პარტია “ახალის” ერთ-ერთი ლიდერის, ბაჩო ახალაძის თქმით, სოფელში დღემდე არ არსებობს ნორმალური საგზაო ინფრასტრუქტურა. განსაკუთრებით მძიმე მდგომარეობაშია კალაგონის უბანი, სადაც მოსახლეობას არც გზა აქვს და არც სასმელი წყალი.
“ეს არის ხელისუფლების სრული უპასუხისმგებლობის შედეგი. წარმოუდგენელია, რომ XXI საუკუნეში ადამიანები კვლავ ელოდებოდნენ წყალსა და გზას, მაშინ, როცა ხელისუფლება მილიონებს ხარჯავს საკუთარ კომფორტსა და პოლიტიკურ ინტერესებზე.
როდესაც სოფელში არ არის გზა, წყალი, სკოლა და ელემენტარული პირობები, ბუნებრივია, რომ იქ მძიმე სოციალურ-ეკონომიკური მდგომარეობა ყალიბდება. ახალგაზრდები ტოვებენ სოფელს, ოჯახები კარგავენ განვითარების შესაძლებლობას, მოსახლეობა კი სიღარიბესა და იზოლაციაში რჩება. ეს შემთხვევით არ ხდება _ ეს არის არასწორი პოლიტიკის პირდაპირი შედეგი.
დღეს ხელისუფლებას აღარ აქვს უფლება, ეს პრობლემები მხოლოდ დაპირებებით გადაფაროს. წლების განმავლობაში მოსახლეობას ატყუებდნენ, არჩევნების წინ ჰპირდებოდნენ განვითარებას, მაგრამ არჩევნების დასრულების შემდეგ საჭამიასერი ისევ დავიწყებული რჩებოდა”, _ გვითხრა ბაჩო ახალაძემ.
მისივე თქმით, საჭამიასერის მოსახლეობას არ სჭირდება მორიგი ლამაზი სიტყვები. მათ სჭირდებათ ახალი სკოლა, უსაფრთხო გზები, სასმელი წყალი და ღირსეული ცხოვრების პირობები.
“ეს არ არის ვინმეს კეთილი ნება _ ეს არის სახელმწიფოს პირდაპირი ვალდებულება”, _ ამბობს ახალაძე.
“გურია ნიუსი” დაინტერესდა, ამ ეტაპზე რა პროექტები ხორციელდება ჩოხატაურის მუნიციპალიტეტის სოფელ საჭამიასერში და რა იგეგმება სამომავლოდ. კითხვებზე ჩოხატაურის მუნიციპალიტეტის მერიის პრესსამსახურიდან შემდეგი პასუხი მივიღეთ:
“საჭამიასერის ადმინისტრაციულ ერთეულში მიმდინარე პროექტები:
- სტიქიის შედეგად დაზიანებული ზემოხეთი-საჭამიასერის დამაკავშირებელი გზის აღდგენა;
- საჭამიასერის ადმინისტრაციულ ერთეულში, სტიქიის შედეგად დაზიანებული, ვ. დუდუჩავას ეზოს მიმდებარე საავტომობილო გზის აღდგენა და რკინაბეტონის კედლის მოწყობა;
- სტიქიის შედეგად დაზიანებული, ხუნდაძეების უბანში არსებული საავტომობილო გზის აღდგენა და რკინაბეტონის კედლის მოწყობა;
- სოფელ მამულარში გაბიონის კედლის მოწყობა და სტიქიის შედეგად დაზიანებული საავტომობილო გზის აღდგენა;
- ჭკუასელების უბანში რკინაბეტონის კედლის მოწყობა და სტიქიის შედეგად დაზიანებული საავტომობილო გზის აღდგენის სამუშაოები _ პირველი უბანი;
- ჭკუასელების უბანში რკინაბეტონის კედლის მოწყობა და სტიქიის შედეგად დაზიანებული საავტომობილო გზის აღდგენის სამუშაოები _ მეორე უბანი;
- სოფელ პატარჭალაში რკინაბეტონის კედლის მოწყობა და სტიქიის შედეგად დაზიანებული საავტომობილო გზის აღდგენის სამუშაოები”, _ აღნიშნულია პრესსამსახურის მიერ მოწოდებულ ინფორმაციაში.
2002 წლის აღწერის მიხედვით, სოფელ საჭამიასერში 1 063 ადამიანი ცხოვრობდა, 2014 წელს _ 713, ხოლო 2024 წელს ჩატარებული აღწერის მიხედვით, სოფელში 597 ადამიანი ცხოვრობს.
ფაქტი ერთია _ ადამიანები, რომლებიც სოფელს ინარჩუნებენ, უფრო მეტ დაფასებას იმსახურებენ და აშკარად საჭიროებენ იმ ადამიანების ყურადღებას, რომლებსაც, ნებით თუ უნებლიეთ, საკუთარ ბედს ანდობენ.
ავტორი
