საქართველოს პრემიერ-მინისტრის რუსეთის მისამართით გაკეთებულ განცხადებაზე და ორ ქვეყანას შორის ურთიერთობების შესაძლო ნორმალიზებაზე ,,გურია ნიუსი“ პოლიტიკის ექსპერტს სოსო ცინცაძეს ესაუბრა.
_ ბატონო სოსო, საქართველოს პრემიერ-მინისტრის გიორგი კვირიკაშვილის თქმით, საქართველო მზად არის პირდაპირი დიალოგისთვის აფხაზეთთან და სამხრეთ ოსეთთან და ამასთან, მისი თქმით, მისასალმებელი იქნებოდა, ამ თვალსაზრისით რუსეთის მხარის კონსტრუქციული მიდგომა. როგორ ფიქრობთ, ოკუპირებულ ტერიტორიებთან მიმართებით პირდაპირი დიალოგის მოწოდება ხომ არ უქმნის საფრთხეს ოკუპირებული ტერიტორიების, როგორც დამოუკიდებელი სახელმწიფოების არ აღიარების პოლიტიკას?
_ ასეთი საფრთხე არ არსებობს, ამ ე.წ. დამოუკიდებლობას არავინ აღიარებს, ეს გამორიცხულია, თუმცა, მინდა გითხრათ, რომ პრემიერის განცხადება აბსოლუტურად მოუმზადებელი და მოულოდნელი იყო. იმდენად მოულოდნელი, რომ ოსეთის საგარეო საქმეთა ე.წ. მინისტრმა ეს განცხადება მასხრად აიგდო. რუსეთის საგარეო უწყების მხრიდან სტანდარტული პასუხი მივიღეთ. მე რომ მიმეწერა მათთვის წერილი, დიდი ალბათობით, ზუსტად იმავე პასუხს მივიღებდი.
დიალოგი დროულია და თან დიდი ხნის წინ უნდა გადაგვედგა ეს ნაბიჯი, მაგრამ პროცესების სწორად წარმართვას მომზადება სჭირდება. არ შეიძლება, კარგი საქმე ცუდი დასაწყისით გააფუჭო.
_ როგორც რუსეთის საგარეო უწყების მიერ გაკეთებულ განცხადებაშია აღნიშნული, პრემიერ-მინისტრის განცხადებით კმაყოფილები დარჩნენ. ასევე, განცხადებაში ნათქვამია, რომ რუსეთი, როგორც მანამდე, დაინტერესებულია მეზობელ საქართველოსთან ურთიერთობის გაჯანსაღებით და მზადაა, იმდენად შორს წავიდეს, რამდენადაც ამისთვის მზად იქნება თბილისი. როგორც ფიქრობთ, საქართველოსა და რუსეთის ინტერესები თანხვედრაშია?
_ რა თქმა უნდა, ინტერესების თანხვედრა გამორიცხულია, მაგრამ რუსეთის განცახდება, შესაძლოა, ძალიან რთული, ხანგრძლივი და კონფიდენციალური პროცესის დაწყების წინაპირობად აღვიქვათ. რუსეთი კარასინის პირით ყველა კარს გვიჯახუნებს, მაგრამ სხვა უფრო მნიშვნელოვანი პირების განცხადებები გარკვეული მოლაპარაკების შანსებს ტოვებს. ყველა შემთხვევაში პროცესი უნდა დაიწყოს.
რუსეთში მშვენივრად იციან, რომ საქართველოს არც ერთი ხელისუფლება აღიარებს სამხრეთ ოსეთისა და აფხაზეთის დამოუკიდებელობას. ამ ფონზე, მინდა გითხრათ, რომ დიპლომატია მრავალწახნაგიანია და გააჩნია, კონპლიქტის მოსაგვარებლად ვინ წარმართავს მოლაპარაკებებს.
_ რუსეთის საგარეო უწყებამ საქართველოს ოკუპირებულ ტერიტორიაზე არჩილ ტატუნაშვილის გარდაცვალების ფაქტს სამწუხარო უწოდა. შესაძლოა, ტატუნაშვილის გარდაცვალების ფაქტთან რუსეთს ხელისუფლებას პირდაპირი შეხება არ ჰქონდა, მაგრამ ოკუპირებულ ტერიტორიებზე პროცესების წარმმართველი რუსეთის ფედერაციაა. მაშინ, როცა საქართველოს მოქალაქის ცხედარი ჯერ კიდევ ოკუპირებულ ტერიტორიაზეა რუსეთის მწუხარება რამდენად გულწრფელია?
_ პირადად პუტინმა გასცა განკარგულება, რომ ტატუნაშვილი მოკალით და საქართველოს ხელისუფლებისთვის არ გადასცეთ ცხედარი? უდავოა, რუსეთმა ფონი შექმნა ისეთი, რომ ასე გვეფიქრა. რუსეთს საერთაშორისო ასპარესზე არც თუ ისე მომგებიანი პოზიციები უკავია, ამიტომ სკანდალები არ აწყობს. რუსეთმა მშვენივად იცის, რომ ტატუნაშვილის მკვლელობა თავიანთ რეიტინგს მთელ მსოფლიოში დაბლა სწევს.
_ ქვეყნის მაღალჩინოსნებმა, მათ შორის, პრემიერ-მინისტრმა და ლტოლვილთა და განსახლების მინისტრმა განაცხადეს, რომ ჟენევის მოლაპარაკებები ქვეყნის პირველი პირების ჩართვით უნდა წარიმართოს. როგორ ფიქრობთ, მოლაპარაკებების ასეთ დონაზე აყვანა ჟენევის დისკუსიებს უფრო ეფექტურს გახდის?
_ ეს განცხადება დამატებით ძალიან ბევრ კითხვაზე საჭიროებს პასუხს. მაინტერესებს, განცახდებაში რომელი ქვეყნების პირველი პირები იგულისხმება? თქვენ როგორ წარმოგიდგენიათ ის ქვეყნები, რომლებიც ჟენევის მოლაპარაკებებში მონაწილეობენ, პირველ პირებს ჟენევის შეხვედრებზე ატარებენ? სისულელეა. ეს განცხადებები საფუძველს მოკლებულია.
