“გუთურს ეღირსება წყალი?” _ “კარგი შეხვედრები” და მარადიული პრობლემებით შეწუხებული მოსახლეობა

ჩოხატაურის საკრებულოს თავმჯდომარის ირაკლი კუჭავას ფეისბუქგვერდზე გამოქვეყნებული ინფორმაციით, ის რამდენიმე დღის წინ სოფელ ჯვარცხმის მოსახლეობას შეხვდა.  საკრებულოს თავმჯდომარე კმაყოფილი დარჩა შეხვედრით. ირკვევა, რომ მოსახლეობასთან შეხვედრისას საუბარი იყო, როგორც უკვე გახორციელებულ,  ისე  სამომავლო გეგმებზეც. კერძოდ კი, როგორც ირაკლი კუჭავა წერს, იქნება აქტიური კომუნიკაცია მუნიციპალური განვითარების ფონდთან და გაერთიანებული წყალმომარაგების კომპანიასთან, რომ ჯვარცხმასა და გორაბერეჟოულში წყლის პრობლემა გადაიჭრას.

 “კარგი შეხვედრა გვქონდა ჯვარცხმაში. სასიამოვნოა, როცა ჩვენს კოლეგებს, სოფლის მაჟორიტარს გივი ჩხიკვაძეს და სიით არჩეულ კოკა მდინარაძეს, მადლიერებით მოიხსენიებენ თანასოფლელები.

ბოლო წლებში, ამ სოფელში, არაერთი მნიშვნელოვანი ინფრასტრუქტურული პროექტი გახორციელდა: ასფალტის საფარი დაიგო ჯვარცხმა – ვაზიანის, ჯვარცხმა – ინტაბუეთის მონაკვეთებზე, სულ ახლახან კიდევ ერთი დაპირება შესრულდა და რეაბილიტირდა გორა – ჯვარცხმის დამაკავშირებელი საავტომობილო გზა, მოწესრიგდა სოფლის ამბულატორია, საჯარო სკოლის გადახურვა მიმდინარეობს. მიუხედავად ამისა, გადაუჭრელ პრობლემად რჩება წყალმომარაგების საკითხი, ამიტომაც ვნახეთ გაერთიანებული წყალმომარაგების კომპანიის ბალანსზე არსებული, დაბის წყალმომარაგების შემკრები აუზი, ასევე ათწლეულების წინ აშენებული ჯვარცხმა-გორას საზღვარზე არსებული,  გაუქმებული 500 კუბური მეტრის მოცულობის შემკრები აუზი.

ჩვენი თვითმმართველობა, გურიის სამხარეო ადმინისტრაციისა და პარლამენტის მაჟორიტარი წევრის დახმარებით, გააგრძელებს აქტიურ კომუნიკაციას, მუნიციპალური განვითარების ფონდთან და გაერთიანებული წყალმომარაგების კომპანიასთან, რომ ჯვარცხმისა და გორაბერეჟოულისთვის  მოინახოს ამ პრობლემის ტექნიკური გადაწყვეტის მიმართულება და მომზადდეს პროექტი”, _ წერს ირაკლი კუჭავა ფეისბუქზე.

საკრებულოს თავმჯდომარის სოციალურ ქსელში გამოქვეყნებულ ამ პოსტს სოფელ გუთურის მოსახლეობაც ეხმიანება და ადგილობრივ მაღალჩინოსანს შეახსენებენ, რომ სოფელი ბევრი წელია წყლის გარეშეა დარჩენილი და მეზობელი სოფლებიდან უწევთ წყლის ზიდვა.

“გუთურს არ უნდა, გუთურში ხო კომუნისტების დროსაც არ იყო წყალი.

ჰოდა,  თუ კომუნისტების დროს არ იყო, არც აწი არის საჭირო, ხო?

ისეთი გეოპოლიტიკური მდებარეობა გვაქვს, რომ დაბასთანაც ახლოს ვართ, იანეულთანაც, ქვემოერკეთთანაც, ჯვარცხმასთანაც, იქაც იქნება წყალი (უნდა იყოს კიდეც), როგორც წერთ. ჩვენ კი არ გაგვიჭირდება ამ სოფლებიდან წყლის თრაქვა პლასტმასის ბოთლებით, ბოცებით თუ “ბოჩკებით”, ამ სოფლებთან და დაბასთან სიახლოვის გამო, რასაც ვაკეთებთ კიდეც მოცემულ სიტუაციაში”, _  წერს მუნიციპალიტეტის ხელმძღვანელი პირების მისამართით როლანდ სიხარულიძე.

“გუთურს ეღირსება წყალი, ნეტავ?” _ ადგილობრივ ხელისუფალთ კითხვით მიმართავს  მანონი ბოლქვაძე.

გუთურელთა მხრიდან გაჟღერებული პრობლემის თაობაზე ჩოხატაურის მერის პირველი მოადგილე მაია კუტუბიძე განმარტავს, რომ  მუნიციპალიტეტის სოფლების წყალმომარაგების საკითხზე მუშაობა მიმდინარეობს.

“მიმდინარეობს აქტიური მუშაობა, როგორც გუთურის, ისე სხვა სოფლების წყალმომარაგების საკითხზე, ძალიან მალე შეგატყობინებთ რა და როგორ იგეგმება,მაქსიმალურად იქნება მოსახლეობის ჩართულობა ამ უმნიშვნელოვანესი საკითხის გადაწყვეტაში”, _ იმედიან ინფორმაციას აწვდის მოსახლეობას მერის პირველი მოადგილე.