ჯერ კიდევ გაზაფხულზე საფეხბურთო კლუბ ლანჩხუთის “გურიას” მმართველობა სამშენებლო ბიზნესითაა დაკავებულმა კომპანია “ჯი ბი არ”-მა იმ პირობით ჩაიბარა, რომ “გურია” კერძო კლუბად უნდა გარდაექმნა და ყველა ის დავალიანება დაეფარა სრულად, რაც კლუბს გააჩნია.
“ყველამ იცის, რომ დღეს საქართველოში ფეხბურთი წამგებიანი ბიზნესია, ეს ჩვენც ვიცით, მაგრამ დაგვეთანხმებით, ფული რომ დავხარჯოთ, ჩვენი უნდა იყოს”, _ ასეთი განცხადება გააკეთა რამდენიმე თვის წინ გამართულ პრესკონფერენციაზე საფეხბურთო კლუბ ლანჩხუთის “გურიას” მოქმედმა მენეჯმენტმა გიგა სურმავას ხელმძღვანელობით.
იმ შემთხვევაში, თუ “გურიას” კერძო კლუბად გარდაქმნა მოხერხდებოდა, მმართველი კომპანია “ჯი ბი არ”-ი ყველა იმ დავალიანების დაფარვის გარანტიას იძლეოდა, რაც კლუბს წლების განმავლობაში დაუგროვდა. თუმცა, როგორც ირკვევა, “გურიას” ფეხბურთელებს თვეებია, კუთვნილი გასამრჯელო არ აუღიათ, კლუბის ძველი დავალიანების გასტუმრებას რომ თავი დავანებოთ.
ამ ფაქტს კი “გურიას” აღმასრულებელი დირექტორი, გიგა სურმავა “გურია ნიუსთან” საუბარში იმით ხსნის, რომ ამ დრომდე ვერ მოხერხდა კლუბის კერძო საკუთრებაში გადაცემა. გაზაფხულიდან მოყოლებული, რატომ გაიწელა დროში ამ წმინდა იურიდიული საკითხის მოგვარება, სურმავა ამბობს, ამაზე ინფორმაციას არ ფლობს. სხვა დეტალებზე კი არ საუბრობს და ამბობს, რომ ის ჩვეულ რეჟიმში აგრძელებს კლუბში საქმიანობას.
ამასობაში კი ირკვევა, რომ ყოფილი ფეხბურთელი მერაბ ჟორდანია ლანჩხუთის საფეხბურთო კლუბით დაინტერესდა. ამ ფაქტს თავად მერაბ ჟორდანიაც ადასტურებს.
“ბოდიში უნდა მოვუხადო ჩემს ლანჩხუთელ გულშემატკივარს, რომ აქამდე კლუბს ყურადღება ვერ მივაქციე. წინა ხელისუფლების დროს, როგორც იცით, არანაირი შანსი არ იყო, კლუბის მიხედვა კი არა, დამიჭირეს. იცით, რამდენიმე წლის წინ მქონდა ინტერესი, მაგრამ მაშინ ეს ამბავი არ გამოვიდა, მიზეზებზე საუბარი არ მსურს”, _ ამბობს ჟორდანია, რომლის გარემოცვასაც კლუბები ჰყავთ ავსტრიასა და ჰოლანდიაში. წლების წინ, იგი ჰოლანდიური კლუბის პრეზიდენტიც იყო.
თავად მერაბ ჟორდანია არაფერს ამბობს, თუ ვინ და რამ შეუშალა ხელი 2-3 წლის წინ “გურიაში” მის მოსვლას, თუმცა, მთავარ ეჭვმიტანილად ამ საქმეში მაჟორიტარი დეპუტატი ნინო წილოსანი სახელდებოდა.
ამ ფაქტს იმით ხსნიდნენ, რომ წილოსანის ოჯახს დავა ჰქონდა ბიზნესმენ ქეთევან ცინცაბაძესთან, რომელიც ჟორდანიას ახლობელია. მაშინ ნინო წილოსანმა ასეთი ალბათობა კატეგორიულად უარყო და აღნიშნა, რომ რაიმე პირადი ინტერესი კლუბთან დაკავშირებით არ ჰქონდა. მან ისიც თქვა, რომ ჟორდანია იქნება თუ სხვა, კლუბში რამდენიმე მილიონი უნდა მოიტანოსო. მაშინ დეპუტატის ეს პოზიცია ბევრმა მის პირად ინტერესად აღიქვა.
რამდენად რეალურია ლანჩხუთის საფეხბურთო არენაზე მერაბ ჟორდანიას გამოჩენა, ამის გასარკვევად საკრებულოს თავკაცს და “გურიას” მთავარ ლობისტს ადგილობრივ ხელისუფლებაში, ბესო ტაბიძეს დავუკავშირდით. ტაბიძე არც უარყოფს და არც ადასტურებს მერაბ ჟორდანიას შესაძლო მოსვლას კლუბის მესვეურად.
“ვნახოთ ჯერ არანაირი სიახლე არაა. როცა რაიმე გადაწყდება, ყველა გაიგებს”, _ ამბობს ტაბიძე.
როგორც ამბობენ, “გურიაში” მოსვლის თაობაზე მერაბ ჟორდანიას კომუნიკაცია ვასილ ჩიგოგიძესთანაც ჰქონდა და მისგან მხარდაჭერის პირობაც მიიღო. ჟორდანიასთან კლუბთან დაკავშირებით კომუნიკაციის არსებობას ვასილ ჩიგოგიძე ადასტურებს.
“ჩემგან რა მხარდაჭერის პირობა შეეძლო მიეღო, ჯერჯერობით, ყველაფერი საუბრის დონეზეა. მესაუბრა ამ საკითხზე მერაბი, რომელიც დაინტერესებულია “გურიას” თემით. ის ჩამოსვალას და ადგილზე გეგმავს ყველაფერში გარკვევას. მე შეხვდი კლუბის ამჟამინდელ მმართველობას, რომელთაც გარკვეული პრობლემები აქვთ და რაც, მათი ახსნით, პანდემიის გამო წარმოიშვა. მოკლედ, ჯერჯერობით, ყველაფერი საუბრის დონეზეა და ვნახოთ”, _ გვითხრა გურიიდან პარლამენტში მმართველი გუნდის ახალმა სახემ.
