გურიის მხარეში სახელმწიფო რწმუნებული გიორგი ღურჯუმელიძე, როგორც მერიის ფეისბუქგვერდიდან ხდება ცნობილი, რამდენიმე დღის წინ ლანჩხუთს სტუმრობდა და აქაურ მერთან, ალექსანდრე სარიშვილთან, საკრებულოს თავმჯდომარესთან, ბესიკ ტაბიძესთან ერთად მუნიციპალიტეტში მიმდინარე და დასრულებული ინფრასტრუქტურული სამუშაოები დაათვალიერა.
“საქართველოს მთავრობის ხელშეწყობით მიმდინარეობს სოფელ ჯიხეთში სხვადასხვა ლოკაციაზე საყრდენი კედლების, ჩოჩხათის და ღრმაღელის ადმინისტრაციულ ერთეულებში ხიდების მშენებლობა; სოფელ შრომისუბანში დასრულდა ნაპირსამაგრი კედლის მოწყობა. პროექტები სტიქიის შედეგების სალიკვიდაციო ღონისძიებების ფარგლებში ხორციელდება“, _ ვკითხულობთ მერიის ინფორმაციაში.
ფაქტია, რომ ხელისუფლების მხრიდან წლებია, დიდი თანხები იხარჯება ინფრასტრუქტურის კუთხით, თუმცა, ლანჩხუთის მოსახლეობა მაინც უჩივის პრობლემებს, რომელიც მათ სოფლებშია. ამის შესახებ წერენ კიდეც მერიის ოფიციალურ გვერდზე მოქალაქეები.
მაგალითად, სოფელ ჩიბათის მოსახლეობისთვის მთავარი პრობლემა უწყლობაა, თან წლებია.
თინათინ ჩერქეზიშვილი: “სოფელ ჩიბათში დღემდე არ არის სასმელი წყალი. XXI საუკუნეში ხალხი ისევ წყლის გარეშე ცხოვრობს. როდის აპირებთ ამ პრობლემის მოგვარებას? მოსახლეობა მხოლოდ დაპირებებს ისმენს, მაგრამ რეალური შედეგი არ ჩანს. სასმელი წყალი ფუფუნება კი არა, ელემენტარული აუცილებლობაა!”
სუფსის მცხოვრები გიორგი ბერიძე კი უგზოობას უჩივის: “სუფსაში გააკეთეთ გზა–კვალი და განათება…”
ქალაქში მცხოვრები ნონა სივსივაძე რწმუნებულს ურჩევს, ის კორპუსიც მოინახულოს, რომელშიც მას და მის სამეზობლოს უწევთ ცხოვრება. ცნობისთვის, სივსივაძე, ათეულ წელზე მეტია ამ პრობლემაზე საუბრობს მედიისა და სოციალური ქსელის საშუალებით, თუმცა, ამ დრომდე უშედეგოდ:
“აგარაკში, კუპრეიშვილის 12-შიც მოიყვანეთ ეს ადამიანი, ანახეთ ჩვენი ბინა…” _ წერს იგი მერიის ფეისბუქის გვერდზე.
ანა ხუხუნი: “უპატრონო რაიონში ვცხოვრობთ, ასჯერ ნათქვამს ერთხელაც არ გაგიგონებენ. ისე ფართო–ფართო სიტყვებს გეტყვიან, იფიქრებ, ა, ეშველა ჩვენს სოფელს ახლა და ეგ არისო, მაგრამ არაფერი…”
მარიამ დიასამიძე: “შრომისუბანში მხოლოდ ნაპირსამაგრებთან რომ დაიგო ასფალტი, ეგ არ კმარა _ დანარჩენი გზა გაუვალ მდგომარეობაშია. გზა კატასტროფულ მდგომარეობაშია და იმაზე რატომ არაფერს ამბობთ? მთლიანად გზის საფარს როდის მიხედავთ? იმედია, მერია მთლიანი გზის საფარის მოწესრიგებასაც აპირებს და მარტო ამ მონაკვეთით არ შემოიფარგლება.”
გურამ ხუხუნაიშვილი: “ეგრეთწოდებული “ატეკის” აღმართი მოინახულეთ და მერე დაფიქრდით, როგორი გზა გვაქვს მთელ ჩოჩხათს“.
ფატი წულაძე: “ჭანჭათის გზებს ეშველება როდესმე? მოიარეთ სოფელი და ის სურათები დადეთ, რა გზა არის სოფელში. მარტო სოფლის ცენტრში მისასვლელი გზა არ ითვლება, სხვა უბნები მოიარეთ პალეოლითის ხანიდან გამოვედით დიდი ხანია, განსაკუთრებით, ჭანჭათის ზემო უბანი“.
რამაზ გობრონიძე: “მაჩხვარეთში წყალს და გზას როდის დაადგება საშველი?”
ნინო ნადირაშვილი:” გაზი როდის ექნება მოსახლეობას მოედანში. პალეოლითის ხანიდან გამოვედით დიდი ხანია“.
ნონა მიმინოშვილი: “ორი წელი სტიქიის შედეგად გაფუჭებული რაღაც 30 მეტრი მონაკვეთის გაკეთებას გეხვეწებით სოფელ ღრაღელეში. გამგეობამ ჩვენ არ გვეხებაო, თქვენც გთხოვეთ, მაგრამ ყურადღება ნული“.
რიმა ჩხარტიშვილი: “ერთი ბატონი რწმუნებული ნინოშვილის საკრებულოში უნდა მოვიწვიოთ, ნახოს, რა მდგომარეობაშია გზები“.
