საბავშვო ბაღების პრობლემები ლანჩხუთში

“გურიის რამდენიმე სოფელი მოვიარე… წარმოუდგენელი უკანონობა და კორუფცია ტრიალებს.

მარტივად რომ აგიხსნათ, მხოლოდ ლანჩხუთის რაიონის ერთ თემში, ჯურუყვეთში 2 ბაღი დაანგრიეს და ჯერ ისევ მხოლოდ ნანგრევებია.

8 საბავშვო ბაღი ააშენეს 2016 წელს ლანჩხუთში, 7 ამორტიზებულია, 1 საბავშვო ბაღი მუშაობს მხოლოდ და როგორც ამბობენ, ესეც ავარიულია და ამ სასწავლო წლის შემდეგ დახურავენ.

წარმოგიდგენიათ, ერთ მუნიციპალიტეტში რამდენი კორუფცია, უკანონობაა თავმოყრილი?!

სკოლების და ბაღების დანგრევა და შემდეგ არ აშენება, არის ქართველი ხალხის გენოციდის სპეცოპერაცია, რომ ხალხს არსად დაედგომებოდეს და გადაიხვეწონ ამ ქვეყნიდან“, _ ეს განცხადება, გასულ კვირას, “ძლიერი საქართველო–ლელოს” ერთ–ერთმა ლიდერმა, ირაკლი კუპრაძემ გააკეთა ლანჩხუთში სტუმრობის შემდეგ.

ის, რომ ჩიბათის, ეწერისა და ჯურუყვეთის საბავშვო ბაღებში სარეაბილიტაციო სამუშაოები უნდა განხორციელებულიყო, ამის შესახებ მთავრობამ 2023 წლის ივნისში გაავრცელა ინფორმაცია. ცნობისთვის, ამ ბაღებში სამშენებლო-სარეაბილიტაციო სამუშაოები 2016 წელსაც გახორციელდა:

“საქართველოს პრემიერ–მინისტრის ინიციატივით, ქვეყნის მასშტაბით, 885 საბავშვო ბაღის მშენებლობა–რეაბილიტაცია გახორციელდება. აღნიშნული პროგრამის ფარგლებში, გურიის რეგიონში მიმდინარე წელს 17 ახალი სკოლამდელი აღზრდის დაწესებულების მშენებლობა დაიწყება. 14 საბავშვო ბაღზე ხელშეკრულება უკვე გაფორმებულია, ხოლო დარჩენილ 3 პროექტზე პრეტენდენტი მოწვეულია ხელშეკრულების გასაფორმებლად.

მიმდინარე წელს რეაბილიტაცია ჩაუტარდება 8 საბავშვო ბაღს“, _ ეწერა უწყების მიერ გავრცელებულ ინფორმაციაში და სწორედ ამ 8 საბავშვო ბაღის რიცხვში იყო ზემოთ ნახსენები სამი ბაღიც, თუმცა ადგილზე სამუშაოები არათუ არ დასრულებულა, ჯერ არც კი დაწყებულა და არც კონკრეტული პასუხია, დანგრეული შენობების ადგილას თუ როდის აშენდება ახალი ნაგებობები.

არადა, ინფრასტრუქტურის მინისტრის, რევაზ სოხაძის მიერ რამდენიმე თვის წინ, გურიის რეგიონში ინფრასტრუქტურული პროექტების მონიტორინგის დროს გაკეთებული განცხადებით “საქართველოს მთავრობის ერთ–ერთ მნიშვნელოვან პრიორიტეტს წარმოადგენს ყველა მუნიციპალიტეტში შესაბამისი სერვისების, მათ შორის სკოლამდელი აღზრდის დაწესებულებების ხელმისაწვდომობა“.

ოპოზიციის მხრიდან გაკეთებულ კომენტარებს რომ თავი დავანებოთ, იმავე სოხაძის მაშინდელ განცხადებას თუ მოვიშველიებთ, დასტურდება, რომ საბავშვო ბაღების ინფრასტრუქტურის მხრივ პრობლემები საკმაოდაა: “არსებობს გარკვეული გამოწვევები შეჩერებულ მშენებლობებთან დაკავშირებით, რაც რიგი სამშენებლო კომპანიების პასუხისმგებლობას უკავშირდება _ ზოგიერთ შემთხვევაში დაწყებულია სისხლის სამართლის წარმოებაც. ვმუშაობთ, რათა შეჩერებულ ობიექტებზე სამშენებლო სამუშაოები დროულად განახლდეს“.

ის, რაც დღეს საბავშვო ბაღებთან მიმართებაში ლანჩხუთის მუნიციპალიტეტში ხდება, ოპოზიციაში კატასტროფად მიიჩნევენ.

“წარმოიდგინეთ, 2016 წელს აშენებული თუ რეაბილიტირებული რვა ბაღის შენობიდან, ექვსი უკვე რამდენიმე წელია მწყობრიდან გამოვიდა და დაანგრიეს. დარჩენილია ლესისა და ჩოლობარგის შენობები, სადაც ბზარები გაჩნდა და ლესაში სასწავლო პროცესი თვეებია უკვე გაჩერებულია, ბაღიც დახურულია, ხოლო ჩოლობარგში მიმდინარე სასწავლო წლის დასრულებას ელოდებიან და ისიც დაიხურება. წარმოუდგენელია ის, რომ ათი წელიც კი ვერ გაძლო ამ შენობებმა და მილიონობით ლარი წყალში ისე ჩაიყარა, არავინ არაფერი იცის. უბედურება ის არის, რომ პასუხისმგებელი ამ თემაზე არავინაა, არადა საბიუჯეტო თანხების მიზნობრივ ხარჯვაზე გვაქვს საუბრები.

ცალკე თემაა დანგრეული შენობების სანაცვლოდ ახალი ბაღების მშენებლობის საკითხი. ჯურუყვეთისა და ეწერის საბავშვო ბაღების მშენებლობა დაწყებისთანავე შეჩერდა, რამეთუ შპს “ჯავამ” ქუდი დაიხურა და აგერ უკვე ორი წელი გადის არც გამოჩენილა. ანალოგიური მდგომარეობაა ჩიბათის საბავშვო ბაღის შემთხვევაშიც“, _ ამბობს საკრებულოს წევრი პარტია”ლელოდან” გოჩა ჯანაშია.

საბავშვო ბაღების თემაზე საუბრისას კორუფციაზე აკეთებს აქცენტს “ერთიანი ნაციონალური მოძრაობის” ლანჩხუთელი ლიდერი კახა ასკურავაც და ყველაფერში ადგილობრივი ხელისუფლების პასუხისმგებლობის საკითხს ხედავს:

“ურუშაძეს, ვისი გამგებლობის დროსაც აშენდა და გარემონტდა ეს საბავშვო ბაღები, არც სამართლებრივი და არც პოლოტიკური პასუხისმგებლობა არ დაკისრებია; მოქმედი ადგილობრივი ხელისუფლება კი ისე პოზირებს, თითქოსდა ურუშაძე მათი წინამორბედი არ იყო და თავად არ იყვნენ იმ ყველაფრის სამართალმემკვიდრე, რაც მაშინ ხდებოდა. არადა, მე დღემდე ვიღაც ბედუკაძის ამბებს მაძახებენ, თავად კი იმ კორუმპირებულ წარსულზე, რომელიც ამ ხელისუფლების პირობებში იყო და სამწუხაროდ, დღესაც არის, ვერანაირ პასუხისმგებლობას ვერ გრძნობენ“, _ ამბობს ასკურავა.

2016 წელს აშენებული და უკვე მწყობრიდან გამოსული საბავშვო ბაღების თემა საკრებულოს ერთ-ერთ ბოლო სხდომაზეც გაჟღერდა.

ოპონენტთა მხრიდან დასმული შეკითხვის პასუხად მუნიციპალიტეტის მერმა, ალექსანდრე სარიშვილმა თქვა, რომ ამ კუთხით მართლაც არასახარბიელო მდგომარეობაა შექმნილი და რომ საქმე შესასწავლად შესაბამის უწყებებს გადაეცემა: “ნამდვილად არ არის სახარბიელო მდგომარეობა ავარიულ ბაღებთან მიმართებაში. მზადდება შესაბამისი დოკუმენტაცია იმ უწყებისთვის გადასაცემად, რომელმაც უნდა გამოიძიოს რა მოხდა სინამდვილეში და რამ გამოიწვია 10 წელიწადში ამ ბაღების ფაქტობრივად, ამორტიზირება“, _ თქვა სარიშვილმა.

მისივე ინფორმაციით, სოფელ წყალწმინდაში 100 ბავშვზე გათვლილი საბავშვო ბაღი უნდა გაკეთდეს, მანამდე კი აქაური აღსაზრდელები, უსაფრთხოების მიზნით, ალტერნატიულ ფართში არიან გადაყვანილები.

ცნობისთვის, საბავშვო ბაღი ჯურუყვეთში 2016 წლის 19 სექტემბერს გაიხსნა და ღირებულება 258 520 ლარი იყო, ხოლო წყალწმინდაში _ ერთი თვის შემდეგ, 17 ოქტომბერს და ის სახელმწიფოს 236 800 ლარი დაუჯდა. ორივე ბაღი “საბა ჯგუფმა” ააშენა.

ლანჩხუთის მუნიციპალიტეტის გამგეობამ ლესისა და ჩოლობარგის ბაგა-ბაღების საძირკველი 2016 წელს გაჭრა და სამშენებლო სამუშაოებს შპს “დამბა” აწარმოებდა.