„საქართველოს დემოკრატიული ინიციატივის“ თავმჯდომარე გიორგი მშვენიერაძე სასამართლო სისტემაში არსებულ კლანურ მმართველობასთან დაკავშირებით „გურია ნიუსთან“ საუბრობს.
მშვენიერაძე მიიჩნევს, რომ უზენაესი სასამართლოში უვადოდ გასამწესებელ კანდიდატთა მიერ თვითაცილების შესახებ გაკეთებული განცხადება კიდევ ერთხელ ადასტურებს, რომ სასამართლო სისტემა კლანურად იმართება.
„ათი მოსამართლის ერთობლივი განცხადება სასამართლო სისტემაში კლანური მმართველობის არსებობას კიდევ ერთხელ ადასტურებს. აღნიშნული მოსამართლეების სიის ჩაგდება წარმატებაა, თუმცა კრიტერიუმების გაწერის შემდეგ, უზენაესი სასამართლოს მოსამართლეობის კანდიდატებად იგივე ადამიანების დასახელების საფრთხე კვლავ არსებობს. იმ ადამიანებმა, რომლებმაც ამ სიას მხარი დაუჭირეს, იუსტიციის უმაღლესი საბჭო უნდა დატოვონ. სხვა შემთხვევაში, სასამართლო სისტემაში მდგომარეობის გაუმჯობესების საშუალება არ გვექნება. სასამართლო ჩინჩალაძისა და მურუსიძის კლანის ხელში დარჩება, რომლებიც კვლავ შეეცდებიან, რომ ერთადერთ ორგანოს, რომელსაც დღეს ვერ აკონტროლებენ, დაეპატრონონ “,_ აღნიშნა მშვენიერაძემ.
მისივე თქმით, მართლმსაჯულების რეფორმირების სამუშაო ჯგუფის ფორმატიდან გამომდინარე, ცალსახად ჩანს, რომ პარლამენტის გარკვეული ნაწილი სასამართლო სისტემაში არსებული, ე.წ. მოსამართლეთა კლანური ჯგუფისთვის აპირებს მხარდაჭერას.
„ერთი მხრივ, ბატონი ირაკლი კობახიძე თავის რამდენიმე აბსოლუტურ თანამოაზრესთან ერთად სასამართლო სისტემასთან დაკავშირებული პრობლემების განსახილველად გვეპატიჟება, სადაც წარმოდგენილი იქნება მამუკა მდინარაძე თუ დავით მათიკაშვილი, რომლის მეუღლე სასამართლოში გამოსაცდელი ვადით არის არჩეული. მერე მხრივ, რეფორმირების ჯგუფში გვეპატიჟებიან იმისთვის, რომ ბატონი ირაკლი კობახიძის კურსელ მიხეილ ჩინჩალაძესთან და მის კლანთან განვიხილოთ საკითხები. ასეთი სახის ფორმატში, ამ თემის განხილვა სასამართლოს სისტემასთან დაკავშირებული პრობლემების დაკნინების მცდელობაა. ცალსახად ჩანს, რომ დიახ, ისინი აპირებენ, რომ კლანს მიემხრონ“,_ამბობს მშვენიერაძე.
გიორგი მშვენიერაძე ტელეკომპანია „იმედის“ ეთერში, მასსა და თბილისის სააპელაციო სასამართლოს ადმინისტრაციულ საქმეთა პალატის მოსამართლე ლევან მურუსიძეს შორის, გამართულ დებატებს აფასებს.
„ლევან მურუსიძის მიმართ ჩემი შთაბეჭდილებები არ შეცვლილა. ბატონო მურუსიძე არის ადამიანი, რომლის მიმართ, ფაქტობრივად, არ დარჩა ევროკონვენციის მუხლი, რომლითაც მის მიერ მიღებულ გადაწყვეტილებებზე არ უმსჯელიათ და საქმე არ წაუგია. ეს არის სამართლიანი სასამართლოს უფლების დარღვევა, ევროსასამართლოს გადაწყვეტილებით არის დადასტურებული, რომ წინა ხელისუფლების დროს, სასამართლო სისტემაში მოსამართლეების დევნა სწორედ ლევან მურუსიძის ხელით ხორციელდებოდა. დღეს სასამართლო სისტემა მურუსიძეებით არის სავსე. მოსამართლეები თავადაც ამბობენ, რომ მურუსიძეები არიან და ამით ამაყობენ. გვინდა თუ არა ასეთი სასამართლო?! მინდოდა, ეს საზოგადოებას კარგად დაენახა და ვფიქრობ, დაინახა კიდეც“, _ აღნიშნა მშვენიერაძემ.
