ციფრები, რომლებიც კრიზისს აშიშვლებს: რამდენი მოსწავლე დარჩა ჩოხატაურის სკოლებში და რატომ წყვეტენ ბავშვები სწავლას?

სანამ ქვეყნის საინფორმაციო სივრცე პოლიტიკურ განცხადებებს მიაქვს, რეგიონებში ყველაზე მძიმე და დემოგრაფიული კრიზისი განათლების სისტემას არტყამს. „გურია ნიუსის“ მიერ ჩოხატაურის საგანმანათლებლო რესურსცენტრიდან ოფიციალურად გამოთხოვილი დოკუმენტები საგანგაშო სურათს აშიშვლებს: მუნიციპალიტეტიდან ბავშვების გადინება მასშტაბურ ხასიათს იღებს, ხოლო სკოლების უმრავლესობა ელემენტარულ სტანდარტებსაც ვერ აკმაყოფილებს.

ავტორიზაციის კრიზისი და სკოლების რეალური კონტიგნეტი

მუნიციპალიტეტში მოქმედი 32 საჯარო სკოლიდან ავტორიზაცია მხოლოდ 12-ს აქვს გავვლილი, ხოლო 20 სკოლა (60%-ზე მეტი) ამ დრომდე შესაბამისი სტატუტის გარეშეა. რესურსცენტრში აცხადებენ, რომ სიტუაცია უახლოეს მომავალში გამოსწორდება: “ამ სკოლების სიას ახალი სასწავრლო წლისთვის კიდევ დაემატება სკოლები“.

მუნიციპალიტეტში სულ 2037 მოსწავლე ირიცხება. აი, როგორ ნაწილდება ეს რაოდენობა სკოლების მიხედვით, რაც ნათლად აჩვენებს სოფლების დაცლის ტენდენციას:

ნიკო მარის სახელობის დაბა ჩოხატაურის #1 საჯარო სკოლა _ 440 მოსწავლე; ბასილეთის საჯარო სკოლა _ 24 მოსწავლე; ბუკისციხის საჯარო სკოლა _ 47 მოსწავლე; ბუკნარის საჯარო სკოლა _ 92 მოსწავლე; ამაღლების საჯარო სკოლა _ 61 მოსწავლე; გოგოლესუბანის საჯარო სკოლა _ 62 მოსწავლე; გორაბერეჟოულის საჯარო სკოლა _ 32 მოსწავლე; გუთურის საჯარო სკოლა _ 90 მოსწავლე; დაბლაციხის საჯარო სკოლა _ 22 მოსწავლე; დიდივანის საჯარო სკოლა _ 6 მოსწავლე; ერკეთის საჯარო სკოლა _ 43 მოსწავლე; ვანზომლეთის საჯარო სკოლა _ 25 მოსწავლე; ზემოსურების საჯარო სკოლა _ 21 მოსწავლე; ზემოხეთის საჯარო სკოლა  _ 7 მოსწავლე; ზოტის საჯარო სკოლა _ 95 მოსწავლე; იანეულის საჯარო სკოლა _ 39 მოსწავლე; კოხნარის საჯარო სკოლა _ 58 მოსწავლე; ნაბეღლავის საჯარო სკოლა _ 35 მოსწავლე; სამების საჯარო სკოლა _ 34 მოსწავლე; საჭამიასერის საჯარო სკოლა _ 54 მოსწავლე; ფარცხმის საჯარო სკოლა _ 33 მოსწავლე; ქვაბღის საჯარო სკოლა _ 42 მოსწავლე; ქვენობნის საჯარო სკოლა _ 49 მოსწავლე; შუა ამაღლების საჯარო სკოლა _ 77 მოსწავლე; შუა სურების საჯარო სკოლა _ 25 მოსწავლე; შუაფარცხმის საჯარო სკოლა _ 56 მოსწავლე; ჯვარცხმის საჯარო სკოლა _ 67 მოსწავლე; ჩხაკაურას საჯარო სკოლა _ 15 მოსწავლე; წიფნარის საჯარო სკოლა _ 33 მოსწავლე; ხევის საჯარო სკოლა _ 16 მოსწავლე; ხიდისთავის საჯარო სკოლა _ 70 მოსწავლე; ჩოხატაურის ყოვლადწმინდა ღვთისმშობლის სახელობის მართლმადიდებლური სკოლა _ 267 მოსწავლე.

78 დაკარგული მოსწავლე და ქრონიკული გაცდენები

კიდევ უფრო დრამატულია იმ მოსწავლეთა სტატისტიკა, რომელთაც ბოლო ხუთი წლის განმავლობაში სწავლა შეწყვიტეს და სტატუსი შეუჩერდათ. საუბარია 78 ბავშვზე, რომელთა სკოლიდან წასვლის ოფიციალურად რეგისტრირებული მიზეზები მუნიციპალიტეტში არსებულ სოციალურ-ეკონომიკურ გამოწვევებს ასახავს.

რესურსცენტრიდან მოწოდებული დოკუმენტების მიხედვით, წლების მიხედვით სურათი ასე ნაწილდება:

2022 წელს სხვადასხვა მიზეზების გამო სწავლა შეწყვიტა სხვადასხვა სკოლის 14-მა მოსწავლემ; 2023 წელს _ 25-მა მოსწავლემ; 2024 წელს _ 8 მოსწავლემ; 2025 წელს _ 21-მა მოსწავლემ; 2026 წელს _10-მა მოსწავლემ.

რაც შეეხება მოსწავლის სტატურის შეჩერების მიზეზებს, 2022-2026 წლებში, გაცდენების გამო, მოსწავლის სტატუსი შეუჩერდა ნიკო მარის სახელობის დაბა ჩოხატაურის #1 საჯარო სკოლის საშუალო საფეხურის 24 მოსწავლეს; ბუკისციხის საჯარო სკოლის 3 მოსწავლეს და ამაღლების საჯარო სკოლის 2 მოსწავლეს _ საზღვარგარეთ გამგზავრების გამო; სოფელ გოგოლესუბნის 8 მოსწავლეს, რომელთაგან 4 საზღვარგარეთ გაემგზავრა, 3-ს ჯანმრთელობის მდგომარეობის გამო მოუწია ხანგრძლივი გაცდენა; სოფელ გორაბერეჟოულის საჯარო სკოლის 1 მოსწავლეს _ უცხოეთში სწავლის გაგრძელების გამო; გუთურის საჯარო სკოლის 2 მოსწავლეს _ საზღვარგარეთ გამზავრების გამო; დაბლაციხის საჯარო სკოლის 4 მოსწავლეს, რომელთაგან 3 გაემგზავრა საზღვარგარეთ; ერკეთის საჯარო სკოლაში 2022 წელს საშუალო საფეხურის მოსწავლემ სწავლა მიატოვა; ვანზომლეთის საჯარო სკოლის 1 მოსწავლეს _ 2023 წელს საზღვარგარეთ გამგზავრების გამო; კოხნარის საჯარო სკოლის 6 მოსწავლეს, რომელთაგანც 4 მოსწავლე გაემგზავრა საზღვარგარეთ, 2-ს მშობლების ავადმყოფობის გამო მოუწია გაცდენა; ნაბეღლავის საჯარო სკოლის 1 მოსწავლეს _ ოჯახი გადავიდა საცხოვრებლად სხვა ქალაქში; 2024 წელს საჭამიასერის საჯარო სკოლის მოსწავლე გარდაიცვალა; ქვაბღის საჯარო სკოლის 3 მოსწავლეს _ სამივე მოსწავლე საზღვარგარეთ გაემგზავრა; ქვენობნის საჯარო სკოლის 1 მოსწავლეს, რომელიც საზღვარგარეთ გაემგზავრა; შუა ამაღლების საჯარო სკოლის 6 მოსწავლეს, რომელთაგან 1-მა პროფესიულ სასწავლებელში გააგრძელა სწავლა, 2  საზღვარგარეთ გაემგზავრა, სამი საცხოვრებლად სხვა ქალაქში გადავიდა; ხიდისთავის საჯარო სკოლის 6 მოსწავლეს, რომელთაგან 3 მოსწავლე გაემგზავრა საზღვარგარეთ, 1 საცხოვრებლად გადავიდა სხვა ქალაქში, 2-მა კი პროფესიულ სასწავლებელში გააგრძელა სწავლა; ყოვლადწმინდა ღვთისმშობლის სახელობის მართლმადიდებლური სკოლის 6 მოსწავლეს, საიდანაც 3 გაემგზავრა საზღვარგარეთ, 1-ს ჯანმრთელობის მძიმე მდგომარეობის გამო, 2-მა კი შეიცვალა საცხოვრებელი ადგილი.

კანონით დამტკიცებული „რეპეტიტორიუმი“ და ახალი რეგულაციები

სანამ რეგიონებში სკოლები უფროსკლასელების გაცდენებს ებრძვიან, პარლამენტმა „ზოგადი განათლების შესახებ“ კანონში შესატანი ცვლილებები დაჩქარებული წესით, მესამე მოსმენით (85 ხმით 10-ის წინააღმდეგ) დაამტკიცა.

კანონის თანახმად, სრული ზოგადი განათლება მოიცავს არანაკლებ 11 და არაუმეტეს 12 წელს: დაწყებითი (I−VI კლასები), საბაზო (VII−IX კლასები) და საშუალო (X-XI კლასები). 11 კლასის დასრულებისას გაიცემა სრული განათლების ატესტატი, ხოლო XII კლასი ხდება აბსოლუტურად ნებაყოფლობითი (საჯარო სკოლებშიც) მათთვის, ვისაც აკადემიური მომზადების განმტკიცება სურს.

ამავე რეფორმით, მე-11 კლასში იქმნება ე.წ. „რეპეტიტორიუმი“ _ ინტენსიური ერთწლიანი პროგრამა, სადაც მოსწავლეები მხოლოდ ეროვნული გამოცდებისთვის საჭირო საგნებს ისწავლიან. განათლების მინისტრის, გივი მიქანაძის განმარტებით, ეს ნაბიჯი ემსახურება სისტემის 8 მთავარ გამოწვევასთან ბრძოლას და მიზნად ისახავს ბავშვების სკოლაში დაბრუნებასა და ოჯახებიდან ფინანსური წნეხის მოხსნას.

კაბინეტის რეფორმები მიწაზე არსებული კრიზისის პირისპირ: 2028-2029 წლების ბუნდოვანი პერსპექტივა

თბილისურ გეგმებსა და რეგიონულ სინამდვილეს შორის არსებულ დისონანსს ჩოხატაურის მთავარი საგანმანათლებლო კერა ყველაზე თვალსაჩინოდ ირეკლავს. ნიკო მარის სახელობის #1 საჯარო სკოლის ისტორიული ნანგრევების ფონზე, ახალი შენობის კონტურები მხოლოდ ახლა იკვეთება. მანამდე კი, ასობით ბავშვი დროებით გარემოში სწავლობს. „ვიმედოვნებთ, მშენებლობის ტენდერიც გონივრულ ვადებში დასრულდება და 2028-2029 სასწავლო წლისათვის თანამედროვე სტანდარტების შესაბამისი სკოლა გვექნება“, _ ნათქვამია სკოლის ოფიციალურ განმარტებაში.

სწორედ ეს რეალობა აჩვენებს, რომ მაშინ, როდესაც თბილისში მობილურების შეზღუდვით, ფორმების შემოღებითა თუ სხვა სისტემური გამოწვევებით არიან დაკავებულები, გურიის სოფლებისთვის უმთავრეს საზრუნავად გამართული სახურავი, თბილი საკლასო ოთახი და მოსწავლეთა შენარჩუნება რჩება.

დაჩქარებული წესით დამტკიცებული კანონის ქმედუნარიანობა სწორედ იმ დემოგრაფიულ კრიზისთან ჭიდილში გამოიცდება, რომელიც დღეს რეგიონს ცლის და ამ გამოცდის შედეგებს უახლოესი წლები სრულიად უტყუარად დაგვიწერს.