სასულიერო პირების თქმით, ისინი ღამეს აქ გაათევენ, ილოცებენ და ამით გააპროტესტებენ ხვალ, 17 მაისს, ჰომოფობიასთან და ტრანსფობიასთან ბრძოლის საერთაშორისო დღის აღსანიშნავად დაგეგმილ მშვიდობიან აქციას.
ორგანიზაცია “იდენტობა”, რომელიც ამ აქციის ორგანიზატორია, მიიჩნევს, რომ მსოფლიოს მრავალ ქვეყანაში, 17 მაისს, 2004 წლიდან მოყოლებული, სახელმწიფო და კერძო, საერთაშორისო და ადგილობრივი, საგანმანათლებლო, უფლებადაცვითი და სხვა ორგანიზაციები საინფორმაციო კამპანიაში ერთვებიან, რათა ამით ფართო საზოგადოების ყურადღება მიაპყრონ ჰომოსექსუალი, ბისექსუალი და ტრანსგენდერი ადამიანების დისკრიმინაციის პრობლემისკენ.
ორგანიზაციის წარმომადგენლები იმედოვნებენ რომ 2012 წლის 17 მაისს, თბილისში მშვიდობიანი მსვლელობის დარბევისგან განსხვავებით, აქციის მონაწილეთა უსაფრთხოება უზრუნველყოფილი იქნება სამართალდამცავთა მიერ.
რუსთაველზე შეკრებილი სასულიერო პირების მოსაზრებას “გურია ნიუსთან” სიონის საკათედრო ტაძრის დეკანოზი დავით ლასურაშვილი აფიქსირებს და მიიჩნევს, რომ ამ ჯგუფებმა საკუთარ ოჯახებში და სახლებში რაც უნდათ ის აკეთონ, მაგრამ დაუშვებელია მათი ქმედებების პროპაგანდა და დემონსტრაცია.
_ ამგვარი აქციის გამართვა განსაკუთრებით მიუღებლად მიგვაჩნია მაშინ, როცა, აქვე, ქაშვეთის ტაძარში დაღუპული ქართველი მებრძოლების ცხედრები იყო დასვენებული და სულ ახლახან გადაასვენეს ოჯახებში… ამ ადგილას, სადაც უამრავი წმიდანის სისხლია დაღვრილი, დაუშვებლად მიგვაჩნია ამგვარი აქციის გამართვა. საკუთარ ოჯახებში და სახლებში რაც უნდათ ის აკეთონ, მაგრამ დაუშვებელია მათი ქმედებების პროპაგანდა და დემონსტრაცია, _ ამბობს დეკანოზი დავით ლასურაშვილი.
17 მაისის დღესთან დაკავშირებით არასამთავრობო ორგანიზაციებმა უკვე გამოხატეს პოზიცია და ერთობლივი განცხადებაც გააკეთეს, რომელშიც ნათქვამია: “17 მაისი მსოფლიოში სექსუალური ორიენტაციისა და გენდერული იდენტობის ნიშნით ადამიანის უფლებათა დარღვევის პრაქტიკისა და სტიგმატიზების წინააღმდეგ პროტესტის ფორმას წარმოადგენს.
… პარლამენტის ყოფილი შენობის წინ ლგბტ აქტივისტები და მათი მხარდამჭერები აპირებენ მდუმარედ გამოხატონ მათი წინააღმდეგობა დისკრიმინაციისა და ლგბტ ადამიანების უფლებების დარღვევის ფაქტების მიმართ. აღნიშნული აქციის საპასუხოდ სხვადასხვა ჯგუფებმა ყოფილი პარლამენტის შენობის მახლობლად დაგეგმეს კონტრდემონსტრაციის გამართვა, რომელიც 17 მაისის აქციას ლგბტ თემის პროპაგანდად, უზნეობად განიხილავს და აპროტესტებს მას.
კონტრდემონსტრანტების მხრიდან დაანონსებულია მასშტაბური მსვლელობის მოწყობა რუსთაველის გამზირზე. აღსანიშნავია, რომ კონტრდემონსტრაციის უფლება ასევე დაცულია ადამიანის უფლებათა სამართლით, თუმცა, არსებითია მან მშვიდობიანი ხასიათი შეინარჩუნოს და კანონით გათვალისწინებული მოთხოვნების ფარგლებში მოთავსდეს. მიუხედავად იმისა, რომ კონტრდემონსტრაციის ორგანიზატორები მიუთითებენ მათი შეკრების მშვიდობიან ხასიათზე, სოციალურ ქსელებში გავრცელდა არაერთი ინფორმაცია, რომელშიც კონტრდემონსტრაციის მონაწილეები აცხადებენ, რომ ისინი არ მისცემენ ლგბტ აქტივისტებს 17 მაისის აქციის ჩატარების შესაძლებლობას. მეტიც, აღნიშნული განცხადებები ხშირად მუქარისა და სიძულვილის ენის შემცველია…”
წინა წლის სამწუხარო გამოცდილების მიუხედავად, არასამთავრობო ორგანიზაციები იმედოვნებენ, რომ პოლიცია ეფექტურად შეძლებს შეკრების თავისუფლების დაცვას და მის ვალდებულებებს ლგბტ პირების უფლებების დაცვისა და მათი პატივისცემის სულისკვეთებით განახორციელებს. ამ მოლოდინს, მათ შორის, მაღალი თანამდებობის პირების მიერ გაკეთებული პოზიტიური განცხადებები აძლიერებს.
საზოგადოებრივი ორგანიზაციები მოუწოდებენ აქციების ორგანიზატორებსა და მონაწილეებს, “დაიცვან კანონის მოთხოვნები, შეინარჩუნონ აქციის მშვიდობიანი ხასიათი და ტოლერანტული ქცევა, რაც დემოკრატიული და პლურალური საზოგადოების განვითარების წინაპირობაა”.
