(გურია ნიუსი, ლანჩხუთი) _ ბოლო დროს გურულ ფეხბურთში გამოცოცხლება შეინიშნება _ ქართული ფეხბურთის ისტორიაში პირველად, პირველ და რეგიონულ ლიგებში ერთდროულად 5 აქაური გუნდი გამოდის, ასევე პირველად ჰყავთ ფარმ-კლუბები ერთდროულად “გურასა” და “მერცხალს”. წარსულს ჩაბარდა შიგაკუთხური ქიშპობაც და მართალია, გურული დერბები მოედანზე კვლავაც დაუნდობელია, მაგრამ სხვა მხრივ გურული ფეხბურთის მესვეურები ერთობლივად ცდილობენ რეგიონის ფეხბურთისთვის ძველი დიდების დაბრუნებას. ძალიან მნიშვნელოვანია ის ფაქტიც, რომ ოზურგეთში სტადიონი კეთდება, ლანჩხუთში კი სპონსორს ელიან. რა ხდება გურულ ფეხბურთსა და კონკრეტულად “გურიის” სპონსორსა და ოზურგეთის ცენტრალური სტადიონის რეკონსტრუქციასთან დაკავშირებით _ ეს ის ძირითადი თემებია, რის შესახებ სასაუბროდ გურიის რეგიონული ფეხბურთის ფედერაციის თავკაც კახა ებრალიძეს შევხვდით. მასთან სასაუბრო სხვაც გვქონდა _ კახა ერთ წელზე მეტია სათავეში უდგას რეგიონულ ფედერაციას და ჩვენი საუბარიც სწორედ რეგიონული ოფისის მუშაობის შეფასებით დავიწყეთ:
_ კახა, წელიწადზე მეტი გავიდა, რაც გურიის ფედერაციას ხელმძღვანელობთ. რა ხდება დღეს გურულ ფეხბურთში?
_ მოგეხსენებათ, არის ფინანსური პრობლემები, მაგრამ ჩვენ მაქსიმალურად ვცდილობთ გურიაში ფეხბურთის პროპაგანდა გავწიოთ. ამ კუთხით ვატარებთ რამდენიმე შეჯიბრს ჭაბუკებს შორის. როგორც იცით, გასული წლის ბოლოს ფეხბურთის ფედერაციამ ჭაბუკთა შერჩევის პროცესი განახორციელა, ყოველკვირეულად ჩამოგვყავდა რეგიონებიდან მოზარდები. ვფიქრობ, რომ ეს იყო ძალიან მნიშვნელოვანი პროექტი _ გარდა იმისა, რომ “მერცხალის” აღზრდილი რუსლან ბედიევი 14-წლამდელთა ნაკრებში მოხვდა და დღეს მისი კაპიტანია, სხვა ჭაბუკებისთვის ეს არის დიდი სტიმული.
გურიაში ფეხბურთი უყვართ და კარგი იქნება, თუ ინვესტორები შემოვლენ, ბიზნესმენები დაეხმარებიან საფეხბურთო სკოლებს, კლუბებს. რეგიონში ფეხბურთი რომ უყვართ, იქიდანაც ჩანს, რომ პირველ ლიგაში ორი კლუბი გვყავს, ხოლო რეგიონალლიგაში ერთბაშად 3 კლუბი გურიიდან პირველად გამოდის. ასევე პირველად მოხდა, რომ “გურიას” და “მერცხალს” _ ორივეს ჰყავს ფარმ-კლუბი. ცოტა ვორჭოფობდით ფარმ-კლუბების არსებობაზე, თუმცა სეზონის მანძილზე დადასტურდა მისი აუცილებლობა და ჩვენი გადაწყვეტილების სისწორე. რა თქმა უნდა, უკეთესი იქნება, ჩვენი კლუბები თითო ლიგით ზემოთ იყვნენ, გურიას ორი თუ არა ერთი კლუბი მაინც ჰყავდეს უმაღლეს ლიგაში, მაგრამ ვიყოთ რეალისტები _ არსებული ფინანსური მდგომარეობის თუ შესაძლებლობების ფონზე, ეს გამორიცხულია.
_ გურულ ფეხბურთში შიგა დაპირისპირება არ არსებობს, როგორ მოახერხეთ ამის გაკეთება?
_ ეს არანაირი პრობლემა არ ყოფილა _ დავჯექით სამივე რაიონის ფეხბურთის მესვეურები და ვთქვით, რომ ქიშპობას ბოლო უნდა მოღებოდა. ასეც მოხდა, ჩვენ გასაყოფი არაფერი გვაქვს და ერთად უნდა მოავხერხოთ გურიაში ფეხბურთის განვითარება. თუმცა ეს არანაირად არ ეხება სპორტულ კუთხეს _ თავიდანვე შევთანხმდით, რომ ჩვენს შორის თამაშები იქნებოდა ძველებურად დაუნდობელი. ამის მაგალითია ბოლო დერბიც _ როცა საკმაოდ რთულ მდგომარეობაში მყოფ “მერცხალს” მოგება ჰაერივით ჭირდებოდა, მაგრამ “გურიამ” არაფერი დაუთმო. ჩვენ ქომაგებისთვის ვთამაშობთ, ლანჩხუთელი და ოზურგეთელი გულშემატკივრები კი დერბს სულმოუთქმენლად ელიან და ამით ყველაფერია ნათქვამი.
_ არ შეიძლება არ გკითხოთ ჩაწყობილი თამაშების გახმაურებულ სკანდალზე _ თქვენ ხომ ამავდროულად აღმასკომის წევრი ხართ. ზოგმა თქვენი გადაწყვეტილება ზედმეტად მკაცრად შეაფასა, ბევრს კი მიაჩნია, რომ ფეხბურთელებთან ერთად კლუბებიც უნდა დასჯილიყო.
_ შესაძლოა, გადაწყვეტილება მკაცრია, მაგრამ ეს უნდა იყოს მაგალითი, რომ მომავალში არავინ იფიქროს ანალოგიური მოიმოქმედოს. რაც შეეხება კლუბებს, ამის მტკიცებულება ჩვენ ამ დროისთვის არ გვაქვს, შესაბამისად, მათთან დაკავშირებით ვერანაირ გადაწყვეტილებას ვერ მივიღებდით. როგორც იცით, გამოძიება ამ საკითხზე გრძელდება.
_ სხვათა შორის, ტელესიუჟეტებში ითქვა, რომ ტოტალიზატორში იყო “იმერეთი”-“გურიის” შეხვედრაც…
_ როგორც გავარკვიეთ, ეს იყო “გურიის” ერთადერთი შეხვედრა, რომელიც ტოტალიზატორის ნუსხაში მოხვდა. მინდა ხმამაღლა განვაცხადო სრული პასუხისმგებლობით, რომ გურული კლუბებისგან რაიმე მაქინაციაში მონაწილეობა გამორიცხულია, რისი დასტურიც ზემონახსენები გურული დერბია და თუნდაც ლანჩხუთიდან “გაგრის” უქულოდ გაშვება.
_ როგორც აღმასკომის წევრს, არ დაგაინტერესათ რატომ მოხვდა ის შეხვედრა ტოტალიზატორის ინტერესში?
_ ეს ჩემთვის მხოლოდ ახლახანს ტელევიზიით გახდა ცნობილი. თუმცა ტოტალიზატორში თამაშის მოხვედრა, არ ნიშნავს, რომ ის აუცილებლად ჩაწყობილია ან რაიმე მსგავსი ხდება. რაც მთავარია, ის ერთადერთი შეხვედრაც “გურიამ” მოიგო და აქედან გამომდინარე, ჩვენი კლუბის თუნდაც ხსენება მაგ კონტექსტში არალოგიკური იყო.
_ გურულ ფეხბურთს დავუბრუნდეთ _ რა მდგომარეობაა კლუბებში, ფინანსურ კუთხეს ვგულისხმობთ?
_ მოგეხსენებათ, ჩოხატაურს გუნდი რეგიონულ ლიგაში ჰყავს, შედარებით ნაკლები ხარჯი აქვს და ასე თუ ისე, შეძლებისდაგვარად, “ბახმაროს” ამ კუთხით ნაკლებად აქვს პრობლემა. რაც შეეხებათ “გურიასა” და “მერცხალს”, გიდასტურებთ ამ კუთხით პრობლემები არის. თუმცა დღეს ჩვენს ქვეყანაში ფეხბურთი პრიორიტეტულია, ადგილობრივი ხელმძრვანელებიც მაქსიმალურად გვეხმარებიან და დიდი იმედი გვაქვს, რომ გურიაშიც და მთლიანად საქართველოში, ამ მხრივ ყველაფერი დალაგდება თავის ადგილზე, რაც კლუბებს არსებობის საშუალებას მისცემს. თუმცა ისევ ვიტყვი, რომ ზოგადად სასურველია გამოჩნდეს ინვესტორი და კლუბები კერძო გახდეს.
_ ბოლოს და ბოლოს, რა ხდება ბრიტანულ სპონსორთან დაკავშირებით _ როდის დაადგება “გურიას” საშველი?
_ მოლაპარაკებების პროცესში ვართ, უფრო ზუსტად, წინასწარი შეთანხმება არსებობს. ახლა ინვესტორის ჩამოსვლას ველით და გადაწყვეტილებაც სწორედ ამის შემდეგ იქნება მიღებული. გვერდით გვიდგას ფეხბურთის ფედერაციის პრეზიდენტი, ვისთანაც ამ საკითხზე ყოველკვირეულად გვაქვს კონტაქტი.
_ ამ წუთისთვის რომ გამოჩნდეს ინვესტორი, “გურიას” უპრობლემოდ შეიძენს?
_ მართალია, ამ წუთისთვის კლუბს ყადაღა ადევს, მაგრამ ფეხბურთის ფედერაციას აქვს სახელმწიფოსთან მიღწეული შეთანხმება, რომ ინვესტორს “გურიას” სიმბოლურ თანხად მიჰყიდიან და პრობლემა ამ მხრივ არ შეექმნება.
_ ყველაზე მნიშვნელოვანი აქ ის არის, გადასცემენ თუ არა ინვესტორს გრიგოლეთის ბაზას?
_ კი, რა თქმა უნდა! საწვრთნელ ბაზასაც გადასცემენ, თუმცა მოგეხსენებათ, აქ ჩადებული იქნება პირობა, რომ წელიწადში კლუბს მილიონი ლარი დაახარჯოს. სხვათა შორის, ამ საკითხზე ჩვენი გამგებელი გია გოგუაძე ფეხბურთის ფედერაციის პრეზიდენტს არაერთხელ შეხვდა. ზოგადადაც, ბატონ ზვიადისგან გურიის რეგიონი დიდ მხარდაჭერას ვგრძნობთ. ამის დასტურია ოზურგეთის სტადიონის რეკონსტრუქციის პროექტი, რომელიც ახლახანს დაიწყო. როგორც იცით, ამ მხრივ გურიაში კარგა ხანია არაფერი გაკეთებულა. გაკეთება კი არა, ფედერაციის პრეზიდენტები გურიაში არც ჩამოდიოდნენ, როცა ბატონი ზვიადი თითქმის ყოველთვიურად გვსტუმრობს.
_ დასასრულ, რა იმედს აძლევთ გურულ ქომაგს?
_ ერთ რამეს ვპირდები მათ _ “გურია” და “მერცხალი” ყოველთვის იქნებიან ანგარიშგასაწევი გუნდები. რა თქმა უნდა, ვიბრძოლებთ უმაღლეს ლიგაში გადასასვლელად და ვიქნები ბედნიერი, თუ ჩემი პრეზიდენტობის დროს ორივე მათგანი უმაღლეს ლიგაში იასპარეზებს და გურული დერბით გაალამაზებს მას.
