იუსტიციის მინისტრის ინიციატივით გამოცხადებული აქციის ფარგლებში, 65 000-ზე მეტმა მოქალაქემ პირადობის მოწმობა 34 ლარის ნაცვლად 15 ლარად აიღო, ამათგან 60 319 –მა მოქალაქემ ძველი მოწმობა შეცვალა ახლით.
თბილისის იუსტიციის სახლში, დღეს, სახელმწიფო სერვისების განვითარების სააგენტოს თავმჯდომარემ სოსო ბაღათურიამ და იუსტიციის სახლის აღმასრულებელმა დირექტორმა ირაკლი ლომიძემ, აქციის დასრულებამდე რამდენიმე დღით ადრე, ერთობლივი ბრიფინგი გამართეს, მოსახლეობას აქციით სარგებლობის პირობები განუმარტეს და ამ დრომდე გაცემული დოკუმენტების სტატისტიკაზე ისაუბრეს.
უწყების ინფორმაციით, აქციის პირობების თანახმად, პირადობის ახალი მოწმობის მიღების მსურველები პირადობის დამადასტურებელ ახალ დოკუმენტს 15 ლარად, სტანდარტულად 10 დღის ვადაში მიიღებენ და გათავისუფლდებიან ფოტოსურათის გადაღების 3 ლარის გადასახადისგანაც. დაჩქარებული მომსახურების მიღების მსურველებს კი 15 ლართან ერთად, მხოლოდ დაჩქარების ღირებულებს გადახდა მოუხდებათ.
აქციით სარგებლობის საშუალება ნებიემიერი ასაკობრივი კატეგორიის, როგორც სრულწლოვან, ისე არასრულწლოვან მოქალაქეებს ექნებათ. აქციაში ჩართვა შეუძლიათ იმ მოქალაქეებსაც, რომლებიც მისამართის გარეშე არიან რეგისტრირებულნი. პირადობის ახალი მოწმობის მისაღებად მოქალაქეებმა იუსტიციის სახლებს, სახელმწიფო სერვისების განვითარების სააგენტოს ფილიალებს ან საზოგადოებრივ ცენტრებს უნდა მიმართონ.
მხოლოდ იმ შემთხვევაში, თუ დოკუმენტის გაცემასთან ერთად ხდება რეგისტრაციის ადგილის შეცვლა, მოქალაქემ უნდა მიმართოს სერვისების განვითარების სააგენტოს/იუსტიციის სახლის იმ ფილიალს, რომლის სამოქმედო ტერიტორიასაც განეკუთვნება მისი ამჟამინდელი საცხოვრებელი მისამართი.
იუსტიციის მინისტრის ინიციატივით გამოცხადებული აქცია 20 აგვისტოდან დაიწყო და 20 სექტემბრამდე გაგრძელდება.
დღეის მონაცემებით, ელექტრონული პირადობის მოწმობას უკვე 1 311 769 ადამიანი ფლობს.
