გაპოლიტიკოსებული ბიძინა ივანიშვილი, რამდენიმე დღეა, სოციალური ქსელის _ ფეისბუქის მომხმარებლების შეკითხვებს საკუთარ ოფიციალურ გვერდზე პასუხობს. კითხვების დიდი რაოდენობის გამო, ივანიშვილის პასუხები ეტაპობრივად ქვეყნდება. როგორც საიტის ადმინისტრაცია ამბობს, ბიზნესმენი უპასუხოდ არც ერთ შეკითხვას არ დატოვებს.
ჩვენ უცვლელად გთავაზობთ პასუხებს რამდენიმე კითხვაზე.
_ როგორ აპირებთ უმუშევრობის დაძლევას?
_ უმუშევრობის დაძლევა შეუძლებელია ხელისუფლების ნების და სახელმწიფოს ჩარევის გარეშე. ძალიან მნიშვნელოვანია ინვესტიციების შემოდინების ხელშეწყობა, მაგრამ იმავდროულად ხელშეწყობა სჭირდება იმ დარგების განვითარებას, სადაც დასაქმების დეფიციტი და იმავდროულად, დიდი პერსპექტივაა.
ასეთი მიმართულებებია სოფლის მეურნეობა, ადგილობრივი წარმოება, მომსახურების სფერო, ტრანსპორტი, ჯანდაცვის და განსაკუთრებით განათლების სფეროები. ჩვენ ხელი უნდა შევუწყოთ ამ დარგებისთვის კვალიფიკაციის ამაღლების და პროფესიული გადამზადების ცენტრების შექმნას, რათა დასაქმების პერსპექტივა არ იყოს მხოლოდ ძალოვან სტრუქტურებში, წვრილ ვაჭრობასა და სამშენებლო ობიექტებზე.
საქართველო დიდი კულტურის მატარებელი ერია, მხოლოდ მომსახურება და ვაჭრობა არაა საკმარისი დასაქმების პრობლემის მოსახსნელად. სახელმწიფომ ხელი უნდა შეუწყოს ინჟინრების, ხელოვნების მუშაკების, მეცნიერების და განათლების მაღალკვალიფიციური კადრების შექმნას. განსაკუთრებით მინდა აღვნიშნო სოფლის მეურნეობა _ არა მარტო როგორც დასაქმების პერსპექტივა, არამედ როგორც ქართული სოციალ-კულტურული ცხოვრების განუყოფელი ნაწილი.
სოფელს სჭირდება ინოვაციები და თანამედროვე ტექნოლოგიების დანერგვა, რათა ქართული პროდუქტი კონკურენტუნარიანი გახდეს და დაიბრუნოს ბაზარი.
დასაქმების პროგრამა ფართო და მრავალმხრივი საკითხია, ყველა დარგის განვითარების ჩემეული ხედვის ერთ პასუხში ჩამოყალიბება შეუძლებელია, მაგრამ ამ საკითხის განმსაზღვრელი მიდგომა უნდა ვთქვა _ სახელმწიფომ უნდა წაახალისოს განათლება, ინოვაციები და ახალი ტექნოლოგიები.
_ როგორ დავაბრუნოთ ემიგრანტები? როგორია ემიგრანტებისადმი თქვენი დამოკიდებულება?
_ ძირითადი მიზეზი, რის გამოც ქართველები მასიურად გავიდნენ საზღვრის გარეთ, არის ის, რომ მათ თავის ქვეყანაში ვერ შეძლეს პატიოსანი შრომით თავიანთი ოჯახების რჩენა.
ამ ხალხის უმრავლესობა საკუთარი ნებითა და სურვილით დაბრუნდება, თუ მათ თავისი ქვეყანა ღირსეულ სამუშაო ადგილებს შესთავაზებს, თუ ისინი დარწმუნდებიან, რომ საკუთარი შრომით შეძლებენ ოჯახების რჩენას, თუ ჩვენს ქვეყანაში იარსებებს სამართლიანობისა და პატიოსანი საქმიანობის ხელშეწყობის გარანტიები.
მნიშვნელოვანია იმ პროფესიული პოტენციალის გამოყენება, რაც დაგროვილია უცხოეთში მცხოვრებ საქართველოს მოქალაქეებში. ასევე მნიშვნელოვანია იმ თანამემამულეების წახალისება, რომლებსაც შეუძლიათ ინვესტიციების განხორციელება თავის ქვეყანაში.
_ ხელისუფლებაში მოსვლის შემთხვევაში, გეგმავთ თუ არა ფართომასშტაბიან ამნისტიას?
_ ახალი ხელისუფლების მოსვლას მოჰყვება ძირეული რეფორმები სასამართლო ხელისუფლებაში. სასამართლო გახდება დამოუკიდებელი და იქნება შესაძლებლობა, კანონის შესაბამისად გადაიხედოს ის საქმეები, რომელთა მიმართ გამოტანილი განაჩენი საფუძვლიან ეჭვს იწვევს.
_ რა სტრატეგიული მეთოდებით აპირებთ ბრძოლას ელიტარულ კორუფციასთან?
_ სამოქალაქო აქტიურობის მაქსიმალური წახალისება, გამჭვირვალობა, თავისუფალი მედია, დამოუკიდებელი სასამართლო, აქტიური არასამთავრობო სექტორი _ ეს ყველაფერი უზრუნველყოფს, რომ არ დავუშვათ წვრილმანი თუ სისტემური კორუფციის აღორძინება და ბოლო მოვუღოთ კიდევ უფრო მახინჯ მოვლენას, რასაც ჩვენთან დღეს ელიტური კორუფცია წარმოადგენს.
_ იქნება თუ არა თქვენს რიგებში გიორგი კოდუა?
_ ეს საკითხი არ იხილება.
_ ხელისუფლებაში მოსვლისთანავე (რაშიც ეჭვი არ მეპარება) რა იქნება თქვენი პირველი ნაბიჯი?
_ კომპეტენტური, კვალიფიციური, პოლიტიკურად ჯანსაღი პროფესიონალებისგან შემდგარი მთავრობის ჩამოყალიბება.
ასევე, გაგრძელდება კონსულტაციები სამოქალაქო საზოგადოებასთან. ამ მიმართებით მუშაობას უკვე მოძრაობა „ქართული ოცნების“ ფორმატში დავიწყებთ.
_ ევრაზიის კავშირში ხომ არ აპირებთ საქართველოს შეყვანას?
_ ევროატლანტიკური ინტეგრაცია საქართველოს სტრატეგიული ამოცანაა და ჩვენ განუხრელად გავაგრძელებთ ამ სტრატეგიას. ევრაზიის კავშირში საქართველოს შეყვანას არ ვაპირებთ _ ჩვენი მიზანი ევროკავშირის წევრობაა, რაც გულისხმობს როგორც განვითარებულ ეკონომიკას, ასევე მაღალი ხარისხის დემოკრატიას.
_ თუ დაისჯებიან კანონის ფარგლებში ისინი, ვინც დანაშაულს ჩადის დღეს (იგულისხმება ჩინოსნები)?
_ სამართლებრივ სახელმწიფოში ყველა დამნაშავე უნდა დაისაჯოს, მაგრამ მოქალაქის ბრალეულობის საკითხი უნდა გადაწყვიტოს არა პოლიტიკოსმა, არამედ თავისუფალმა სასამართლომ. დაუშვებელია, დამნაშავეთა დასჯა პოლიტიკურ შურისძიებად იქცეს. მაშინ გამოდის, რომ ქვეყანაში არაფერი შეიცვლება.
_ როგორია თქვენი დამოკიდებულება დედა ეკლესიის მიმართ _ არსებული ხელისუფლების დამოკიდებულებიდან გამომდინარე, სახელმწიფო რელიგიად თუ გამოცხადდება?
_ ვფიქრობ, გულწრფელი რწმენა და რელიგიურობა არაა დამოკიდებული მართლმადიდებლური ეკლესიის სამართლებრივ სტატუსზე, თუმცა, სახელმწიფოსა და მართლმადიდებელ ეკლესიას შორის ურთიერთობები უნდა ეფუძნებოდეს მათ შორის დადებულ საკონსტიტუციო შეთანხმებას, რომელიც, შესაძლოა, მეტ კონკრეტიზირებას მოითხოვდეს. დაუშვებლად მიმაჩნია ხელისუფლების მხრიდან ეკლესიის დისკრედიტაციის და დაქვემდებარების მცდელობები, ისევე, როგორც პოლიტიკური ძალების სპეკულაციები რელიგიურ თემებზე.
_ თქვენ თქვით, რომ „ხალხს ასაქმებს ბიზნესი და არა მთავრობა“. ბიზნესი ითხოვს 35 წლამდე ინგლისურის მცოდნეებს. რა ქნან უფროსი ასაკის ადამიანებმა, პროფესიონალებმა და ქართულის მცოდნეებმა?
_ ინგლისურის ცოდნა უდაოდ კარგი საქმეა. ყველა, ასაკის ადამიანი უნდა სრულყოფდეს უცხო ენის ცოდნას ყოველდღიურად. თუმცა, სახელმწიფო ენის ცოდნა საქართველოში საკმარისი უნდა იყოს იმისთვის, რომ კომპეტენტურმა ადამიანებმა და კარგმა პროფესიონალებმა შესაფერისი სამსახური იშოვნონ და დასაქმდნენ. ვფიქრობ, სამუშაო ადგილების დასაკავებლად ასაკს არ უნდა ჰქონდეს მნიშვნელობა, მთავარი ყურადღება უნდა ექცეოდეს პიროვნების კვალიფიკაციას და პროფესიულ უნარ-ჩვევებს. ჩემთვის ხელისუფლების დღევანდელი მიდგომა ამ საკითხისადმი ფაქტობრივად დისკრიმინაციაა, რომელსაც ჩვენი მთავრობა არ დაუშვებს.
