შინაგან საქმეთა სამინისტროს ფოთის საქალაქო სამმართველოში, “ქართული ოცნების” კიდევ ორ აქტივისტს იბარებენ _ ზვიად შუბითიძეს, რომელიც ფოთის შტაბის წევრად მოაიაზრება, პოლიციის უწყება მოწმის სტატუსით დაკითხვაზე გამოცხადებასთან დაკავშირებით, გუშინ ღამით, 21.00 საათზე მიუტანეს. ამის შესახებ ჩვენთან საუბრისას, თავად ზვიად შუბითიძემ განაცხადა. მისივე განმარტებით, ის ამჟამად თბილისში იმყოფება და პოლიციაში, ჩვენების მისაცემად ხვალ გამოცხადდება.
“ჩემს მიმართაც 348-ე მუხლითაა საქმე აღძრული. ხვალ მივალ ჩვენების მისაცემად. მიზეზი ჩემს შემთხვევაშიც იგივეა _ კონტროლის პალატის წარმომადგენელთან ახსნა-განმარტების მისაცემად არგამოცხადება, რაც იმით იყო გამოწვეული, რომ უწყებაში სხვადასხვა უზუსტობები იყო”, _ გვითხრა შუბითიძემ სატელეფონო საუბარში.
“ქართული ოცნების” კიდევ ერთი აქტივისტი, წარსულში “კონსერვატიული პარტიის” ფოთის ორგანიზაციიის თავმჯდომარე, თამაზ სოსელია ამბობს, რომ მისი ქალაქში არყოფნის გამო, მოხუც მშობლებზე და მეზობლებზე ფსიქოლოგიური ზეწოლა ხდება. მისი თქმით, წუხელ ორჯერ და დღეს დილით კიდევ ორჯერ იყვნენ მის სახლში მისულები პოლიციის მანქანებით. პოლიციის თანამშრომლები, სოსელიას განცხადებით, დაჟინებით ითხოვენ დაკითხვაზე მის მისვლას. როგორც ის ამბობს, ფსიქოლოგიური ზეწოლა, არა მარტო მის ოჯახის წევრებზე, არამედ მეზობლებზეც ხორციელდება.
_ ფოთში არ ვიმყოფები, თორემ კანონს არ ვეწინააღმდეგები და აუცილებლად მივალ პოლიციის განყოფილებაში, რადგან აქ მხოლოდ ჩემზე არ არის საუბარი _ პენსიონერი დედ-მამა და ძმა მყავს, ვარ 6 შვილის მამა, დადიან პოლიციის პიკაპებით ჩემი სახლის წინ, დღისით და მზისით, ამას უყურებენ მეზობლები, ამას უყურებენ ის ადამიანები, ვინც გვერდში მიდგას და სწორედ მათი დაშინების მიზნით აკეთებენ ამას. იმის მიუხედავად, რომ ჩემი სახლი ძალიან კარგად იციან, ჩემი ქუჩის ყველა პარალელურ ქუჩაზე დადიან და ვითომ ჩემს საცხოვრებელს ეძებენ, რაც ფსიქოლოგიურ ზეწოლაზეა გათვლილი. 14 წელი ვიმუშავე ძალოვან სტრუქტურაში და პოლიციის მაიორი ვარ წოდებით, კანონები მათზე ნაკლებად არ ვიცი, მაგრამ ეს არც ერთ კანონში არ წერია,” _ აცხადებს სოსელია.
მისივე განცხადებით, ის ამჟამად არც ერთ პოლიტიკურ პარტიაში არ არის და კონტროლის პალატა მისით მხოლოდ იმიტომ დაინტერესდა, რომ “ქართულ ოცნებას” გაზეთების გავრცელებაში ეხმარება: “ფოსტალიონობის უფლება არ მაქვს? შეიძლება, მათ ჩემს მისამართით პროვოკაციები მოაწყონ, მაგრამ, იცოდნენ, რომ არ მეშინია. ამ წუთებშიც დამირეკა გამომძიებელმა, ვინმე ელგუჯა ძიძიგურმა, რომელიც დაშინებით და დაჟინებით მთხოვს პოლიციის სამმართველოში მისვლას, იმის მიუხედავად, რომ ქალაქგარეთ ვარ”, _ განაცხადა თამაზ სოსელიამ.
გუშინ, საღამოს, საათნახევარი გაგრძელდა “რესპუბლიკური პარტიის” ფოთის ორგანიზაციის თავმჯდომარის, გაიოზ ქინქლაძის ვაჟიშვილის, რევაზ ქინქლაძის დაკითხვა. მან პოლიციის შენობა უკომენტაროდ დატოვა. დაკითხვისას ქინქლაძის უფლებებს “ახალგაზრდა იურისტთა ასოციაციის” ადვოკატი, რაჟდენ ხიმშიაშვილი იცავდა, რომლის განცხადებითაც, დაკითხვის პერიოდში, არავითარ ზეწოლას ადგილი არ ჰქონია. ადვოკატისვე განმარტებით, სისხლის სამართლის საქმე სსკ-ის 348 მეორე მუხლი, რომელიც ქინქლაძის წინააღმდეგ აღიძრა, სასჯელს ერთ წლამდე თავისუფლების შეზღუდვით, ან ფულად ჯარიმას ითვალისწინებს.
რევაზ ქინქლაძის წინააღმდეგ შსს ფოთის საქალაქო სამმართველოში ადმინისტრაციულ წარმოებაში ჩვენებაზე მიცემის უარის თქმისთვისაა აღძრული. შეგახსენებთ, რომ 12 მარტს რევაზ ქინქლაძე დაბარებული იყო ფოთის მერიის ადმინისტრაციულ შენობაში კონტროლის პალატის წარმომადგენლებისთვის ახსნა-განმარტების მისაცემად, თუმცა, არც ის და არც მისი ოჯახის წევრები, ახსნა-განმარტებისთვის არ მისულან.
