_ მიმდინარეობს ამ საკითხებთან დაკავშირებით მუშაობა, რომელიც ამ კვირაში ჩატარდება და საკრებულოს სხდომა 30 ოქტომბერს, დილის 12:00 საათზე ჩატარდება, _ გვითხრა საკრებულოს პრესსამსახურის უფროსმა, ნანა თავდუმაძემ.
სხდომაზე “ქართული ოცნების” ფრაქციის შექმნასთან დაკავშირებით განცხადება უნდა გაკეთებულიყო, რომელსაც ფრაქცია “უმრავლესობიდან” წამოსული სამი დეპუტატი ქმნიდა. თავმჯდომარე ლევანი ნინიძე იქნებოდა, წევრები _ ილია ფორჩხიძე და დავით მდინარაძე. მაგრამ, მოგვიანებით, ლევან ნინიძემ დაწერილი განცხადება უკანვე გაიტანა.
23 ოქტომბერს, საკრებულოში ახალი განცხადება შევიდა, რომლის მიხედვით ფრაქციის თავმჯდომარე ოპოზიციონერი დეპუტატი თემურ სალუქვაძე იქმნებოდა, წევრები _ ლევან ნინიძე და დათო მდინარაძე, ილია ფორჩხიძე ფრაქციას გამოაკლდა. რატომ და რისთვის თქვა უარი ილია ფორჩხიძემ, ჯერჯერობით გაურკვეველია.
მოგვიანებით გაირკვა, რომ ლევან ნინიძემაც უარი თქვა ფრაქციაში შესვლაზე. თუმცა, მანამდე, ჩვენთან საუბრისას განაცხადა, რომ თემურ სალუქვაძის ფრაქციაში იქნებოდა:
_ მგონი, ამ ქვეყნიდან წასვლა მომიწევს ისეთი ამბავი ატყდა ამ ფრაქციის შექმნასთან დაკავშირებით. ყველა წუთში მირეკავენ ჟურნალისტები და აღარ მინდა ამდენი კომენტარის მოცემა. შესულია ახალი განცხადება ფრაქციის შექმნასთან დაკავშირებით, რომლის ხელმძღვანელი თემურ სალუქვაძე იქნება, მე კიდევ ამ ფრაქციაში შევალ, _ გვითხრა ლევან ნინიძემ.
ლევან ნინიძის ფრაქციის წევრობაზე უარის თქმას, „გურია ნიუსთან“ საუბრის დროს ოზურგეთის მუნიპალიტეტის საკრებულოს სამანდატო, საპროცედურო და იურიდიულ საკითხთა კომისიის თავმჯდომარე, პეტრემ სალუქვაძე ადასტურებს.
კიდევ ერთი ოპოზიციონერი დეპუტატი ლელა ნაცვალაძე ამბობს, რომ არ არის გამორიცხული, ლევან ნინიძეზე ზეწოლას ჰქონდეს ადგილი.
თემურ სალუქვაძე ამბობს, რომ “ნაციონალური მოძრაობის” მხრიდან სკამების შენარჩუნების მცდელობას აქვს ადგილი.
_ ასევე, დიდია მცდელობა, როგორმე ხელი შეუშალონ ახალი ფრაქციის ჩამოყალიბებას საკრებულოში, მაგრამ ვარწმუნებ ყველას, როგორც მიხეილ სააკაშვილი დავაბრუნეთ ღრუბლებიდან, ისე მათაც დავანახებთ რეალობას. მინდა დავპირდე ყველას, ფრაქციაც ჩამოყალიბდება, ყველა ღირსეული ადამიანი ერთად მოიყრის თავს და ჩვენ რაიონში სიმართლის, ღირსებისა და რეალური აღმშენებლობის ხანა დადგება. ხოლო საზოგადოებას ვთხოვ, ყურადღებით ადევნოს თვალყური მიმდინარე მოვლენებს, რადგან ამ პროცესში, რეალურად, ყველა ახდენს საკუთარი თავის ლუსტრირებას, _ თქვა თემურ სალუქვაძემ.
