“თევზი ყოველთვის თავიდან ფუჭდება. ამის მაგალითი არის აჭარის მთავრობის თავმჯდომარე. რომ არა ხაბაძის ეს ქმედება, უბრალოდ მეტი პრინციპულობა რომ ჰქონოდა მას, დღეს ვერც მურმან დუმბაძე, ვერც ავთო ბერიძე და ვერავინ სხვა ასე ადვილად თავისიანების დანიშვნას ვერ შეძლებდნენ. არ არსებობს სტრუქტურა, სადაც თავისი შვილები, რძლები მშობლები და ახლო ნათესავები არ დაუნიშნავთ” – ამბობს ლეიბორისტული პარტიის აჭარის ორგანიზაციის ხელმძღვანელი დავით რობაქიძე.
აჭარის მთავრობის თავმჯდომარის მამა თამაზ ხაბაძე აჭარის ფინანსთა და ეკონომიკის სამინისტროს ქონების მართვის და პრივატიზების დეპარტამენტის საწარმოთა მართვის განყოფილების უფროსია.
ხაბაძე ამ თანამდებობაზე 2010 წლიდან მუშაობს. მანამდე, 5 წლის განმავლობაში, იმავე დეპარტამენტში მთავარ სპეციალისტად მუშაობდა. ხაბაძე სახელმწიფო უწყებაში 1992 წლიდან მუშაობს.
მთავრობის თავმჯდომარის და – დიანა ხაბაძე ბათუმის მერიაშია დასაქმებული. ხაბაძე მერიის ეკონომიკური პოლიტიკის სამსახურის შემოსავლების პროგნოზირებისა და ანალიზის განყოფილებას ხელმძღვანელობს. აჭარის პირველი პირის ოჯახის ორივე წევრი ხაბაძის დანიშვნამდე მუშაობდა.
“მაშინ მერიაში დიდ პროექტებს “ქართუ ბანკი” აფინანსებდა და შესაბამისად, არჩილ ხაბაძის ოჯახის წევრების დასაქმება როგორ მოხდა, გასაკვირი არაა. “საჭირო კაცი” იყო მაშინაც და ახლაც,” –_ ასე ხსნის ხაბაძეების დასაქმებას დავით რობაქიძე.
არჩილ ხაბაძის მეჯვარე გიორგი თავართქილაძე, დღეს აჭარის ფინანსთა და ეკონომიკის მინისტრია. ჩვენი წყაროს ცნობით, თავართქილაძის მინისტრად დანიშვნას ხაბაძე პირადად ლობირებდა.
არჩილ ხაბაძე კი ირაკლი ჭეიშვილის მეჯვარეა. ჭეიშვილი აჭარის ახალ მთავრობაში აპარატის უფროსად დაინიშნა. ჭეიშვილის მეორე მეჯვარე სულხან ღლონტი აჭარის უმაღლესი საბჭოს დეპუტატი და ფრაქცია “ქართული ოცნება – თავისუფალი დემოკრატების” ხელმძღვანელია.
უმაღლეს საბჭოში განათლების კომისიაში მრჩეველად დაინიშნა ბათუმის საკრებულოს წევრის, ფრაქცია “ბათუმისათვის” ხელმძღვანელის რესპუბლიკელი ირაკლი ჩავლეიშვილის ძმა, ზაზა ჩავლეიშვილი.
“აბაშიძის მთავრობამ ესენი ჩარეცხა. მერე სააკაშვილი მოვიდა და იმანაც ჩარეცხა. დიდი ხნის განმავლობაში ცდილობდნენ, რომ მოსულიყვნენ ხელისუფლებაში და გაეკეთებინათ ის, რაც მათ გულში და სულში ჰქონდათ. ნამუსიც კარგი საქონელია _ ვეტყვი ამ ადამიანებს. ოჯახში არ დარჩათ არავინ, ვინც დაუსაქმებელია.
ზაზა ჩავლეიშვილის შვილი არის ახალგაზრდული დეპარტამენტის თავმჯდომარის მოადგილე. როდესაც სხვაზე საუბრობენ და მე კარგად მახსოვს მათი ინტერვიუები, მათ გამოსვლები რაზე ჰქონდათ. რომ აქ არის კლანური მმართველობა. რამე შეიცვალა?” _ ამბობს ლეიბორისტების ლიდერი დავით რობაქიძე “გურია ნიუსთან” საუბარში.
თავად ზაზა ჩავლეიშვილი “გურია ნიუსის” მიერ გავრცელებულ ინფორმაციას მის დასაქმებასთან დაკავშირებით, ჩვენს მიერ გამოქვეყნებული წინა მასალის “დასაქმება ახალი მთავრობისგან ძველი მეთოდებით”, შემდეგ სოციალური ქსელით გამოეხმაურა და განაცხადა:
“სიამოვნებით გავეცანი თქვენს ინფორმაციას და ვთვლი, რომ ჟურნალისტის პირველი და შეიძლება მთავარი ამოცანაც მოსახლეობისათვის ახალი ინფორმაციის დროული მიწოდებაა! იმედია ამ ჩემს მცირე დაზუსტებას, თქვენს ჟურნალისტურ საქმიანობაში უხეშ ჩარევად არ ჩამითვლით!
უპირველესად მინდა შევნიშნო, რომ “კარგა ხანია” ბათუმელები მიცნობენ არა როგორც რესპუბლიკელი ირაკლი ჩავლეიშვილის ძმად, არამედ ზაზა ჩავლეიშვილად, ირაკლი ჩავლეიშვილის უფროს ძმად, რომელსაც რესპუბლიკური პარტიის წევრობის მასზე უფრო დიდი სტაჟი აქვს. ასე რომ, უფრო სწორი იქნებოდა, რომ დაგეწერათ, ირაკლი ჩავლეიშვილი, ზაზა ჩავლეიშვილის ძმაო!
რაც შეეხება უმაღლესი საბჭოს განათლების, მეცნიერების, კულტურისა და სპორტის საკითხთა კომისის თავმჯდომარის თანაშემწეობას! ეს ხელოვნურად, ჩემთვის შექმნილი თანამდებობა არ გახლავთ! ეს პოლიტიკური პოსტია. როდესაც მოვიდა ახალი პოლიტიკური ძალა, რომლის წარმომადგენელია ბატონი გიორგი მასალკინი (იმედია მის პროფესიონალიზმსა და კომისიის თავმჯდომარის პოსტზე მის შესაბამისობაში ეჭვს არ შეიტანთ), ძველი კომისიის თავმჯდომარე ავტომატურად გადადგა. ასევე გადადგა მისი თანაშემწეც! თუ თქვენ ჩემს პროფესიონალიზმსა თუ განათლების დონეში ეჭვი გეპარებათ, შემიძლია მოგაწოდოთ ჩემი სივი ( და ჩამოთვლილია ბატონი ზაზას პროფესიული გამოცდილება. ავტ.) _ აცხადებს ზაზა ჩავლეიშვილი.
ის უარყოფს თავისი ქალიშვილის ახალგაზრდულ დეპარტამენტში დასაქმების ფაქტსაც:
_ რაც შეეხება ჩემს შვილს, ქალიშვილს! მას არავითარი კავშირი არა აქვს ახალგაზრდულ დეპარტამენტთან! ჩემი შვილი კარგა ხანია საგანმანათლებლო ინგლისური ცენტრის, ETI-ს, ბათუმის ფილიალის მენეჯერია! _ აცხადებს ზაზა ჩავლეიშვილი.
დავით რობაქიძე სოფლის მეურნეობის მინისტრის შესახებაც საუბრობს: “სოფლის მეურნეობის მინისტრი არის ადამიანი, რომელმაც თავის დროზე სახელმწიფოს დაფინანსებით აიღო გრანტი და გააკეთა ‘სოფლის სახლი”. შემდეგ გაკოტრდა, ეს ქონება მიითვისა და ჩამოაყალიბა კომერციული სტრუქტურა. მძღოლი და დამლაგებელიც კი არ დატოვა. ყველა თავისი მოიყვანა. ზაურ ფუტკარაძემ მოადგილეებად მეჯვარე და ქვისლი მიიყვანა,” _ ამბობს ლეიბორისტების ლიდერი.
ნეპოტიზმით დანიშვნები აქტუალურია აჭარის უმაღლეს საბჭოშიც. საზოგადოებასთან ურთიერთობის განყოფილებაში აჭარის საკანონმდებლო ორგანოს ხელმძღვანელმა თავისი კლასელი, ვახტანგ თავბერიძე დანიშნა. ავთანდილ ბერიძე ამბობს, რომ ვახტანგ თავბერიძე მისთვის “მეტია” ვიდრე უბრალოდ კლასელი. ბერიძე ამავე დეპერტამენტში დანიშნულ მარინე კუპრეიშვილზეც ამბობს, რომ მისი მეგობარია.
საკანონმდებლო ორგანოში მუშაობს მურმან დუმბაძის ძმის ცოლი, მარინა ბერიძე. მარინა ბერიძე უმაღლეს საბჭოში ადრეც მუშაობდა, თუმცა წინა მოწვევის უმაღლესი საბჭოდან იგი გაათავისუფლეს. მისი სამუშაოზე აღდგენა ახალმა ხელისუფლებამ მოახდინა.
მურმან დუმბაძის რძლის, მარინა ბერიძის ძმა არჩევნების შემდეგ დაინიშნა ქედის რაიონის პოლიციის უფროსად. მარინა ბერიძის სიძე, სულიკო თებიძე კი აჭარის განათლების მინისტრის მოადგილედ.
მარინა ბერიძის სახელზეა რეგისტრირებული თევზის სამრეწველო კომპანია “იხტიოსი”. კომპანიას 4 დამფუძნებელი ჰყავს. აქედან მარინა ბერიძეს 30% აქვს, ლევონ სარქისიანს 20%, რუსლან შერვაშიძეს და ირაკლი სირაბიძეს თანაბარი 25-25%. ირაკლი სირაბიძე აჭარის მთავრობის თავმჯდომარის სიმამრია. სირაბიძეს მურმან დუმბაძის ძმის ოჯახთან ერთად ბიზნესი წლებია აქვს. ისინი პარტინორები არიან საკრუინგო კომპანიის ბიზნესშიც.
მურმან დუმბაძემ საკუთარი კადრი დანიშნა არქივის ბიუროს ხელმძღვანელად. საგზაო დეპარტამენტში ხელმძღვანელის მოადგილედ დაინიშნა მურან დუმბაძის ნათესავი სერგო დუმბაძე. მურმან დუმბაძის დეიდაშვილი როსტომ შერვაშიძე სოფლის მეურნეობის მინისტრის მოადგილე გახდა.
“გურია ნიუსი” მურმან დუმბაძესაც დაუკავშირდა თავისი ნათესავების დანიშვნასთან დაკავშირებით.
მურმან დუმბაძე ადასტურებს, რომ მისი რძალი მარინა ბერიძე უმაღლეს საბჭოში მუშაობს, ხოლო მარინა ბერიძის ძმა ქედის პოლიციის უფროსად დაინიშნა. დუმბაძე სამთავრობო დანიშვნების გადაწყვეტილებებში ჩარევასაც არ უარყოფს.
_ არა, არავითარი ნეპოტიზმის ნიშნები. ნეპოტიზმის არის როცა ნათესავს დააწინაურებ. მარინა ბერიძე 2004 წლიდან უმაღლეს საბჭოს მთავარი სპეციალისტი იყო და ბოლო ოცი წლის განმავლობაში ოთხი მთავრობის ცვლილება მის ოჯახში დაიგეგმა. ეს არის უაქტიურესი ადამიანი რომელიც იყო ამ საზოგადოებრივ მოძრაობებში, დაწყებული ასლან აბაშიძიდან დამთავრებული მიხელ სააკაშვილით. ასე, რომ ნეპოტიზმს ვერ დავაბრალებთ. რაც შეეხება ქედის პოლიციის უფროსს ეს არის დედაქალაქის გადაწყვეტილება და მასში ვერავინ ჩაერევა, მათ შორის ვერც დეპუტატი. ის კაცი არის წოდებით მაიორი ან ვიცე პოლკოვნიკი. ის დიდი ხნის განმავლობაში ქედის პოლიციის სამმართველოს ხელმძღვანელობდა.
_ ამბობენ, რომ თქვენთვის სასურველ კადრებს ნიშნავთ სხვადასხვა უწყებებში…
_ შავით თეთრზე დაწერეთ, უფრო მსხვილი შრიფტით: ნებისმიერი ადამიანი, ვისაც ერგება და ვფიქრობ, რომ რეკომენდაცია აქვს გასაწევი – გავუწევ! თუნდაც იყოს ჩემი ოჯახის წევრი. აქ არავითარი საფრთხე ამ თვალსაზრისით არ არის. მთავარია, იყოს კვალიფიციური წევრი იმ ადგილისა, რომლის მოპოვებასაც ის აპირებს.
აჭარის უმაღლეს საბჭოში თანამშრომელთა ატესტაცია 1 თებერვლამდე უნდა დასრულდეს. სწორედ 1 თებერვლიდან გაფორმდება შრომითი ხელშეკრულებები. ვიხილავთ თუ არა უმაღლეს საბჭოს თანამშრომელთა შორის მურმან დუმბაძის, ავთანდილ ბერიძის, არჩილ ხაბაძის ან სხვა პოლიტიკოსების ნათესავებს საკანონმდებლო ორგანოს თანამშრომლებად, ამას მხოლოდ 1 თებერვლის შემდეგ გავიგებთ. საკადრო ცვლილებები არც აჭარის მთავრობის აპარატში და რეგიონის ოთხ სამინისტროში დამთავრებულა. რეორგანიზაციას ექვემდებარება აჭარის ტელე-რადიო დეპარტამენტიც. დასაქმების მსურველები სივებით შაბათ დღეს ბათუმის მერიასთან (სადაც მურმან დუმბაძეს წარმომადგენლობა აქვს გახსნილი), ხოლო სხვა დღეებში უმაღლეს საბჭოში მიდიან. ხელისუფლება დასაქმების მსურველების ნაწილს, დასაქმებას ბათუმის მერიის და საკრებულოს “გათავისუფლების” შემდეგ პირდება.
