კანონპროექტი სასოფლო-სამეურნეო კოოპერატივების შესახებ, “ოზურგეთის დემოკრატიული ჩართულობის ცენტრში” განიხილეს._ კოოპერატივი არის ნებაყოფლობითი გაერთიანება და მსოფლიოში თუკი სადმე განვითარდა სოფლის მეურნეობის, ეს ყველგან კოოპერაციულ საფუძვლებზე მოხდა. ნება თქვენია, გირჩევთ კი, რომ ახლავე დაიწყოთ ფიქრი კოოპერატივების 
ჩამოყალიბებაზე! _ თქვა ფერმერებთან შეხვედრისას ევროკავშირის ექსპერტმა მათი ლამპიმ.
_ სოფლის მეურნეობის აღორძინებისთვის ხელშეწყობაზე საუბარი, ქვეყნის მაღალი ტრიბუნებიდან არაერთხელ სმენია ქართველ კაცს, თუმცა, სულ ცოტა, ბოლო ათი წლის მანძილზე, გლეხკაცს 20-30 ლარიანი ვაუჩერის იმედად აცხოვრობენ და მარად განვითარებაზე ორიენტირებული სოფლის მეურნეობა მაინც მარად განუვითარებელია, _ ასეთი საუბარი ისმოდა ფერმერთა რიგებში.
_ პროექტს სასოფლო-სამეურნეო კოოპერატივების შესახებ, რომელიც საქართველოს პრეზიდენტის მიერაა შემუშავებული, მალე პარლამენტი დაამტკიცებს, ამიტომ ხდება მისი განხილვა ახლა, გურიისა და იმერეთის რეგიონის ფერმერებთან. თქვენი მოსაზრება უმნიშვნელოვანესია ამ პროცესში, _ მიმართა აიპ “სოფლის მეურნეობის სამსახურის უფროსმა” გიგა ხარაბაძემ ფერმერებს.
შეხვედრის მსვლელობისას დეტალურად განიხილეს 12 მუხლისგან შემდგარი კანონი, რომელმაც ფერმერთა დიდი ინტერესი გამოიწვია და ისინი აქტიურად ჩაებნენ განხილვაში.
დაისვა კითხვა, შესაძლებელია თუ არა, სამეწარმეო საქმიანობისთვის გაიცეს გრანტი, რაზეც ექსპერტებმა უპასუხეს, რომ აქამდე ეს არ შეიძლებოდა, ახლა კი ახალი კანონპროექტის მიხედვით მზადდება ცვლილება.
არასამთავრობო ორგანიზაციის “ადამიანი გაჭირვებაში” წარმომადგენელმა მარიანა ლოთიაშვილმა ისაუბრა, თუ როგორ მუშაობდა 2006 წლიდან იმერეთის რეგიონში საგრანტო მხარდაჭერისთვის: _ თავიდან ეს იყო ინდივიდუალური გრანტები, ამაში ჩაბმული იყვნენ აგროსაწარმოები და საკმაოდ წარმატებულად. ამიტომ, კოოპერატივების არსებობის შემთხვევაშიც ეს ეფექტური შედეგის მომტანი იქნება.
დისკუსიის დროს ხაზგასმით აღინიშნა კოოპერატივის საჭიროების ერთ-ერთი უმთავრესი ფაქტორი _ ის სჭირდება მცირემიწიან გლეხს. აღინიშნა ისიც, თუ სხვადასხვა ოდენობის მიწა ან შენატანი აქვთ კოოპერატივის წევრებს, ეს პრობლემას არ წარმოქმნის _ ვინც მეტს შეიტანს, გაიტანს მეტს.
რა არის სასოფლო-სამეურნეო კოოპერატივი? ამ კანონისა და “მეწარმეთა შესახებ” საქართველოს კანონის შესაბამისად, კოოპერატივის სამართლებრივი ფორმით დაფუძნებული იურიდიული პირი, რომელიც ეწევა სასოფლო-სამეურნეო საქმიანობას და რომელსაც საქართველოს სოფლის მეურნეობის სამინისტროს მიერ მინიჭებული აქვს სასოფლო-სამეურნეო კოოპერატივის სტატუსი _ განმარტებულია პროექტში. აქვეა ხაზგასმული საქმიანობის სფეროები: სასოფლო-სამეურნეო პროდუქციის წარმოება; სასოფლო-სამეურნეო პროდუქციის შენახვა და გადამუშავება; სასოფლო-სამეურნეო საქმიანობის წარმოებისთვის აუცილებელი მატერიალურ-ტექნიკური რესურსებისა და მომსახურების ერთობლივი შეძენა; სასოფლო-სამეურნეო ტექნიკით მომსახურება; სასოფლო-სამეურნეო პროდუქციის გასაღება, _ მითითებულია პროექტში.
იურისტმა ლაშა ინაურმა შეხვედრის დასასრულს კიდევ ერთხელ განმარტა კოოპერატივის ზუსტი მნიშვნელობა და ხაზგასმით მიუთითა, რომ იგი პრიორიტეტული მიმართულებაა. ამ კანონპროექტიდან კი გვექნება სოფლის მეურნეობის აღორძინებისა და მიგრაციის შეჩერების მოლოდინი.
მათი ლამპიმ შეხვედრის დასასრულს დემოკრატიული სვლა არჩია: _ კოოპერატივის შექმნა ნებაყოფლობითია, _ მიმართა მან ფერმერებს _ ეს თქვენს სურვილზეა დამოკიდებული. თუმცა, გირჩევთ ახლავე დაიწყოთ ფიქრი მის ჩამოყალიბებაზე, რადგან საქართველოს პარლამენტი, მალე განიხილავს და დაამტკიცებს კანონპროექტს სასოფლო-სამეურნეო კოოპერატივების შესახებ, რომლის არსებობის უტყუარობა დაამტკიცა ევროკავშირის ქვეყნების სოფლის მეურნეობის წარმატებამ.
