ლანჩხუთის მუნიციპალიტეტის სოფელ სუფსაში მცხოვრებმა ცისანა გურგენაძემ, ოზურგეთში არსებული ქარხნის მიერ წარმოებული “გულისტანის” პურის ფქვილის ტომარაში ქაღალდების გროვა იპოვა.
“ვითარების გარკვევის მიზნით, ტომარაზე მითითებულ ნომერზე დავრეკე. ეს ჩემი პრობლემა არ არის, წაიღეთ და გამოცვალეთ, თუ ისევ შეგემთხვათ მსგავსი რამ, ისევ გამოცვალეთ; ასე მიპასუხა ოპერატორმა”, _ ტელეფონით აცნობა მომხდარის შესახებ ცისანა გურგენაძემ “გურია ნიუსის” რედაქციას.
როგორც თვითონ ამბობს, ეს არ ყოფილა პირველი შემთხვევა და რამდენიმე დღის წინ, მისმა ახლობელმა ტომარაში ქაღალდების ნაცვლად, ბეწვის გროვა იპოვა.
“ტომარა და ქაღალდები შენახული მაქვს. ამის უყურადღებოდ დატოვება არ შეიძლება”, _ამბობს გურგენაძე.
როგორც ის აკონკრეტებს, მან “გულისტანის” პროდუქტი ქალაქ ფოთში, მ. ჯალაღონიას მაღაზიაში შეიძინა.
“გურია ნიუსმა” “გულისტანის” ტომარაზე მითითებულ ნომერზე დარეკა. ჩვენთან საუბრისას ოპერატორმა გვითხრა, რომ პურის ფქვილის დამზადების პროცესში ტომარაში ქაღალდების მოხვედრა პრაქტიკულად შეუძლებელია.
“ერთადერთი შესაძლებლობა არსებობს, ალბათ, ვიღაცას “გულისტანისთვის” სახელის შელახვა უნდა; სხვა შემთხვევაში, ტომარაში უცხო სხეული ვერ მოხვდებოდა”, _ გვითხრა ქალბატონმა.
რამდენიმე წუთის შემდეგ, “გულისტანიდან” თავად დაგვიკავშირდნენ და გვითხრეს, რომ ცისანა გურგენაძის ზარის დაფიქსირებიდან რამდენიმე წუთში, ისინი თავად შეეცადნენ მასთან დაკავშირებას, თუმცა ზარი უპასუხოდ დარჩა.
“გვინდოდა ქალბატონისთვის შეგვეთავაზებინა, რომ ტაქსი აეყვანა და მოსულიყო ჩვენს ქარხანაში, რათა თავად ენახა პურის ფქვილის დამზადების პროცესი. ხარჯების ანაზღაურებას ჩვენ თავზე ვიღებდით, მაგრამ მან ჩვენს ზარს არ უპასუხა. ახლაც მზად ვართ ყველა ხარჯი კომპანიამ დაფაროს და მომხმარებელს მოვემსახუროთ”, _ გვითხრა სატელეფონო საუბარში “გულისტანის” წარმომადგენელმა. ჩვენ ქალბატონ ცისანასთან ერთად ვეწვევით “გულისტანის” ქარხანას და მკითხველს შესაბამის რეპორტაჟსაც შევთავაზებთ.
