(გურია ნიუსი, ლანჩხუთი) _ სანამ ირაკლი ალასანია შსს ლანჩხუთის რაიონულ სამმართველოსთან გამოჩნდებოდა, “გურია ნიუსი” ელგუჯა ჩხაიძის მეუღლეს, მადონა ჩხაიძეს ესაუბრა.
_ სამ საათზე დაურეკეს, თქვენი ფერმის დათვალიერება გვინდაო. სახლში ვიყავით, მაგიდასთან ვისხედით.
_ ვინ დაურეკა?
_ ალბათ, პოლიციიდან იყვნენ. შემდეგ, პოლიციის პიკაპით მოვიდნენ. ელგუჯაც წაყვა ფერმაში. იქ, როგორც, თქვეს ავტომატი აღმოაჩინეს. ელგუჯა სახლში აღარ დაბრუნებულა.
_ როცა მოიკითხეთ, რა გითხრეს?
_ არაფერი. სად იყო, არც ვიცოდით.
_ სახლში ჩხრეკა როდის ჩატარდა?
_ სახლის გასაჩხრეკად საღამოს ათ საათზე მოვიდნენ. ჩვეულებრივად იყვნენ მოსულები, თითქოს არაფერი. ერთ ოთახში შევიდნენ, მეორეში, მაგრამ ვერაფერი ვერ ნახეს. შემდეგ უკან გავიდნენ, საქათმეში შეანათეს ფანარი, შემდეგ ტუალეტის უკან ცელოფანში რაღაც აღმოაჩინეს _ თურმე, ქათმის ბუდეში ავტომატის მჭიდი უპოვიათ. პირველ რიგში, ეს მინდა დაიწეროს, რომ ბუდეს ჩვენ დღეში რამდენჯერმე ვამოწმებდით და კვერცხს ვიღებდით, ავტომატის მჭიდი იქ საიდან აღმოჩნდა, ეს არის საკითხავი! კვერცხის ზემოდან იყო დადებული ცელოფანი, რომელშიც ეს მჭიდი იყო ჩადებული…
აქ დაკავებულს მეუღლესთან საუბრის შეწყვეტა მოგვიხდა, რადგან პოლიციის შენობიდან გამოსულმა რამდენიმე ფორმიანმა გვითხრა, რომ საუბრის ჩაწერის და გადაღების უფლება არ გვქონდა:
_ არ შეიძლება გადაღება. მიბრძანდით და სხვაგან ჩაიწერეთ და გადაიღეთ!
_ რომელი კანონის საფუძველზე არ შეიძლება?
_ გთხოვთ, გადაბრძანდეთ და სხვაგან მოახდინოთ გადაღება.
_ გეკითხებით, რომელი კანონის საფუძველზე გვიკრძალავთ საუბარს?
_ კანონია ის, რომ, გთხოვთ, მიბრძანდეთ მიმდებარე ტერიტორიიდან.
_ ვინ მოგცათ მითითება, რომ არ გადაღება არ შეიძლება?
_ ჩემი მითითებაა.
ამის შემდეგ, იძულებულები გავხდით ქალბატონ მადონასთან საუბარი პოლიციის შენობიდან რამდენიმე მეტრის დაშორებით გაგვეგრძელებინა.
_ ქალბატონო მადონა, გავაგრძელოთ ჩვენი საუბარი…
_ როცა პოლიციამ სახლის ჩხრეკა დაიწყო, ერთმა პოლიციელმა მოითხოვა, ტუალეტში უნდა გავიდეო. როცა ის იმ მხარეს გავიდა, მარტო არ გავუშვით _ რძალი და მისი მამა გაყვა, თუმცა, ტუალეტში ხომ არ შეყვებოდნენ?! ტუალეტის შიგნით არის ფანჯარა, რომლიდანაც თავისუფლად შეიძლება მიწვდე ქათმის ბუდეს. აღმოჩნდა, რომ ქათამს დაუდია კვერცხი და ზემოდან დაუფარებია მჭიდი! ახლა ეს დასაჯერებელია?! სახლი ზერელედ გაჩხრიკეს, იმიტომ, რომ იცოდნენ, როგორც უნდა მოქცეულიყვნენ.
_ როცა სახლის ჩხრეკა მიმდინარეობდა, თქვენი მეუღლის დაკავების ამბავი იცოდით?
_ არა. პოლიციასაც არაფერი უთქვამს. ელგუჯა რომ დაკავებული იყო, პოლიციაში მისვლის შემდეგ გავიგეთ.
_ მოწმეები ესწრებოდნენ მჭიდის ამოღებას?
_ არავინ იყო. თავად ამოიღეს და თქვეს _ ავტომატის მჭიდიაო. მე ვუთხარი, სად გინახავთ ავტომატის გარეშე მჭიდი, ბარემ ავტომატიც ჩაგედოთ,-მეთქი. მიპასუხეს, ავტომატი ფერმაში ვნახეთო. ასე გავიგეთ, რატომ იყვნენ მოსულები.
_ თქვენ როგორ ფიქრობთ, ეს პოლიტიკური ანგარიშსწორებაა?
_ რა თქმა უნდა. 2 წლის წინ, ზაფხულში ჩემი შვილიც დაიჭირეს. მაშინაც პოლიტიკური ანგარიშსწორება გახლდათ.
მაშინ ელგუჯა ჩხაიძის შვილის დაკავების ფაქტი ოპოზიციონერმა მის პოლიტიკურ აქტიურობას და ადგილობრივ მაღალჩინოსნებთან დაპირისპირებას დაუკავშირა, ჩხაიძეს ასევე დაპირისპირება ჰქონდა ადგილობრივ სამართალდამცველებთან.
ელგუჯა ჩხაიძე ლანჩხუთის საკრებულოს ყოფილი წევრია, წლების განმავლობაში სოფელ ჩიბათის გამგებელი გახლდათ. ეს პოსტი წინა საპარლამენტო არჩევნების წინ სკანდალის შემდეგ დატოვა _ ჩხაიძე თანასოფლელ ავთანდილ ჯორბენაძეს უჭერდა მხარს. ექსსახმინისტრის მხარდაჭერა სოფლის თავკაცს არ აპატიეს და საკუთარი განცხადებით დაატოვებინეს პოსტი. სწორედ იმ დროიდან იწყება მისი ოჯახის წინააღმდეგ რეპრესიები.
