მიუხედავად ამისა, “გურია ნიუსმა” ლექსი მაინც მოიპოვა, რომელსაც უცვლელად გთავაზობთ:
“ამ ბოლო დროს, ქართველები ზაფხულობით სად დადიან?
ხან კანარის კუნძულებზე, ხან თურქეთში გადადიან.
ჩვენ კი მივალთ ბახმაროზე, აგერ ორ ნაბიჯზე როა,
ჩვენი ოჯახის კურორტი, ჩვენი ტურფა ბახმაროა.
ნაძვი, ნაძვი, ნაძვნარია, ბახმარო,
ლამაზია მისი მთები, ნისლიანი ცხრა წყარო,
კაი, კაი, არ დამიწყო, დიდი ტრაბახა ხარო,
ყველა კურორტს მირჩევნია ჩემი კოხტა ბახმარო.
ერთი კაცი მადლიანი, ამ გურიის მთების შვილი,
ააყვავებს ჩვენს ბახმაროს რამაზ ნიკოლაიშვილი.
დაპირებებს საქმედ აქცევს და მე ამის მართლაც მჯერა,
როცა სადმე რამე გვიჭირს, გურულების გვერდით დგება.
ჰოდა, მოდით, მაშინ ნახეთ, ჩვენი კარგი ბახმარო,
დაგავიწყებთ სხვა კურორტებს, არსად აღარ წახვალთო.
გადაყლაპეთ ეს ჰაერი და დალოცეთ ცხრაწყარო.
ნაძვნარშიაც ისეირნეთ, გული რომ გაახაროთ”.
21 ივნისს, ოზურგეთის სკოლამდელი სააღმზრდელო – საგანმანათლებლო ცენტრის ორგანიზებულ საღამოზე, რომელიც რესტორან “გურიაში”გაიმართა, სარწმუნო წყაროს ცნობით, სწორედ ეს სიმღერა უნდა გაჟღერებულიყო, მაგრამ როგორც ჩანს, “გურია ნიუსის” იქ გამოჩენის შემდეგ, ეს ამბავი გადაიფიქრეს. დაგეგმილი ღონისძიება 5 საათზე უნდა ჩატარებულიყო, მაგრამ რამაზ ნიკოლაიშვილს ელოდებოდნენ და საღამოს 9 საათისთვის გადაიდო.
რეგიონული განვითარებისა და ინფრასტრუქტურის მინისტრი რამაზ ნიკოლაიშვილი, გურიის გუბერნატორის მოადგილესთან, ლელა თავართქილაძესთან ერთად გამოჩნდა. აღსანიშნავია, რომ ღონისძიებას არც გუბერნატორი ვალერი ჩიტაიშვილი, არც საკრებულოს თავმჯდომარე ალეკო მამეიშვილი და არც გამგებლის მოვალეობის შემსრულებელი ილია ვაშაყმაძე დასწრებიან.
ოზურგეთის სკოლამდელი სააღმზრდელო-საგანმანათლებლო ცენტრის ხელმძღვანელი მაკა ჭყონია “გურია ნიუსთან” საუბარში აღნიშნავს, რომ ღონისძიების ორგანიზატორებიც და ხარჯების გამწევიც თავად ცენტრის თანამშრომლები იყვნენ.
_ ჩემი იდეა იყო, რომ ბაღების გაერთიანებას ასეთი ლამაზი ღონისძიება ჩაეტარებინა, ძალიან მიხარია, რომ ჩვენ ეს გამოგვივიდა. ძალიან თამამად შემიძლია განვაცხადო, რომ ღონისძიებაზე დახარჯული თითოეული თეთრი, ჩვენმა თითოეულმა თანამშრომელმა პირადი სახსრებით გაიღო.
_ ქალბატონო მაკა, ინფორმაცია გვქონდა, რომ აქ დღეს ერთ-ერთი სიმღერა ბატონ რამაზ ნიკოლაიშვილს საპატივცემულოდ უნდა შესრულებულიყო. თუმცა, აღარ გაჟღერდა… გადაიფიქრეთ?
_ არანაირად. აბა, მითხარით ტექსტი, რა უნდა ყოფილიყო. რა ლექსი გაქვთ?
_ ბახმაროს ეხება, რომელიც რამაზ ნიკოლაიშვილმა უნდა ააყვავოს…
_ რა შუაშია ბახმაროს ლექსი რამაზ ნიკოლაიშვილთან? ბახმაროს ლექსი არის ბახმაროზე. ნიკოლაიშვილი აქ არაფერ შუაშია ნამდვილად. თუ თქვენ გაქვთ ან იცით რამე, მითხარით.
_ კი, რა თქმა უნდა, ჩვენ გვაქვს ამ სიმღერის ტექსტი.
_ მაჩვენეთ.
_ გასაგები მიზეზების გამო, ნამდვილად ვერ გაჩვენებთ, მაგრამ ჩვენს ვებგვერდზე ნახავთ მალე…
_კი, ბატონო. მაშინ ვიტყვი, რომ თქვენი დაწერილია, _ გვითხრა ჭყონიამ.
სამწუხაროდ, ასეთი “უნიკალური” ლექსების წერის ნიჭი ნამდვილად არ გვაქვს. ტექსტი ექსკლუზიურად მოგვაწოდეს და რა თქმა უნდა, წყაროს ვინაობას არ გავამჟღავნებთ _ მსგავსი ფაქტის გაჟღერების შემდეგ, რასაც სასულიერო გიმნაზიაში ჰქონდა ადგილი, უთქვამთ, _ “გააქრეთ დისკები და ლექსები, ჟურნალისტებს ხელში არ ჩაუვარდეთ”; იმ ადამიანის ვინაობასაც გულდაგულ ეძებენ, ვინც “გურია ნიუსს” ინფორმაცია მიაწოდა.
ჩვენ სხვა წყაროებიდანაც შევიტყვეთ, რომ ბახმაროსა და რამაზ ნიკოლაიშვილზე სიმღერის რეპეტიციას ბავშვები ბოლო დღემდე ოზურგეთის კულტურის ცენტრის ოფისში გადიოდნენ.
