_ თუ კი რამე სამართალი არსებობს, მინდა სიმართლე დადგინდეს. არანაირი საშუალება არ მაქვს, რომ ადვოკატი ავიყვანო. ჩემს უფლებებს ეკა ბესელია იცავდა და მან მაქსიმუმი გააკეთა, _ გვითხრა ჯემალ შამათავამ.
ჯემალ შამათავა: _ ჩემი საქმით დაინტერესებული იყო აჭარის კუდის უფროსი თემურ პატარიძე, მაგის შვილის ნათლია ვარ, ბავშვობის მეგობარი და ძმაკაცები ვიყავით. მე იმის გამო დავინიშნე ურეკის პოლიციის უფროსად, ეს ჩემთვის მოგვიანებით გახდა ცნობილი, რომ იქ პატარ-პატარა ბინძური დავალებები უნდა შემესრულებინა, რაზეც უარი ვუთხარი პატარიძეს. ამის მერე დაიწყო ჩემზე საქმის შეთითხვნები. ჩამოიყვანეს აგენტი ფოლადაშვილი, ეს ადამიანი რომ აგენტია, მთელმა საქართველომ იცის, ასევე ის ქალბატონი კიდევ, ქალბატონი თ.წ. ხონიდან. მე უნდა ამეღო ქრთამი, ეს ქალი იჩივლებდა. ფოლადაშვილზე იტყოდა, რომ ეს არის ადამიანი, რომელმაც გამქურდა და შემდეგ ამ პიროვნებას დავაკავებდით. ვინ არ მირეკავდა, რომ ეს ადამიანი გამეშვა, მაგრამ ეს არ გავაკეთე და ეს ყველაფერი თურმე დადგმული ყოფილა და ერთი სული ჰქონდათ ქრთამი ამეღო. რადგან, ეს არ გამოუვიდათ, ახალი საქმე შეკერეს ოზურგეთში, ფოლადაშვილს აღიარებინეს ქურდობის ფაქტი და თქვა, რომ სიგარეტით მაწამესო, არაფერი ექსპერტიზის დასკვნა არ დევს საქმეში, რომ ეს ნამდვილად ასე იყო. 9 თვის განმავლობაში მიდიოდა პროცესი, რაც ექსპერტიზა ჩატარდა, ყველა ჩემს სასარგებლოდ იყო, მაგრამ 9 წელი მომისაჯეს და აქედან უკვე 6 წელი ციხეში გავატარე. ყველაფერი დაანგრიეს ჩემს ცხოვრებაში, რაც კი არსებობდა.
„გურია ნიუსი“ შეეცადა თემურ პატარიძეს დაკავშირებოდა, მაგრამ ჩვენს მიერ მოპოვებული ტელეფონის ნომერზე სხვამ გვიპასუხა, როგორც ჩვენთვის არის ცნობილი, ის სატელეფონო ზარებს არ პასუხობს და ბათუმში ხსენებულ თანამდებობაზე აღარ მუშაობს.
ჯემალ შამათავას სასამართლო პროცესების შესახებ “გურია ნიუსში” ხშირად იწერებოდა. მისი ადვოკატი ეკა ბესელია იყო.
ყველაფერი კი ასე დაიწყო: 2006 წლის 18 აგვისტოს, კონსტიტუციური უსაფრთხოების დეპარტამენტის ფარული თანამშრომლის დაკავება მოხდა, როგორც ცნობილია, ის ქურდობის ფაქტზე დააკავეს. მისი დაკავება ჯემალ შამათავას ბრძანებით მოხდა. დამნაშავემ დანაშაული აღიარა, შამათავას გარკვეული თანხა შესთავაზა და სთხოვა, რომ იგი გაეშვათ. შამათავამ მას ამაზე უარი უთხრა. შემდეგ ფოლადაშვილმა იმ ღამესვე მოითხოვა ექსპერტი, ხოლო მეორე დღეს დაწერა განცხადება იმის შესახებ, რომ თითქოს იგი პოლიციაში აწამეს (თითქოს, პოლიციის უფროსმა შამათავამ მას სიგარეტი მიაწვა).
ეკა ბესელია, 2006 წელი: – ამ განცხადებიდან, დაახლოებით, ხუთ დღის შემდეგ, ჯემალ შამათავა დააკავეს და წაუყენეს ისეთი მძიმე ბრალდება, როგორიცაა ადამიანის წამება.
პირველი ექსპერტიზის დასკვნით (სახელმწიფო ექსპერტი გობრონიძე) და მისივე ჩვენებით გაირკვა, რომ ფოლადაშვილს ეს დაზიანებები (სიგარეტით მიყენებული დამწვრობები) მიღებული არ აქვს დაკავების დროს, არამედ დაკავებამდე. ამან განაპირობა, რომ პროკურორმა მოიტანა ექსპერტის ცნობა, რომლითაც დაზიანებების მიყენების არარეალური დრო დაფიქსირდა. ამას მოჰყვა დაცვის მხარის საპასუხო რეაგირება, ჩავატარეთ ალტერნატიული ექსპერტიზა, ჩვენმა ექსპერტებმა დაწერეს, რომ ფოლადაშვილს ეს დაზიანებები მიყენებული აქვს 18-24 საათით ადრე, რაც იმას ნიშნავს, რომ ეს იყო დაკავებამდე. ამის შემდეგ სასამართლომ, პროკურორის მოთხოვნით, დანიშნა კომისიური ექსპერტიზა, მაგრამ ერთი საოცარი ფაქტი მოხდა ამ სასამართლო პროცესზე: პროკურორმა, ექსპერტიზის პროცესში საიდანღაც შვიდი თვის შემდეგ წარმოადგინა ვიდეო კასეტა, რომელზეც აღბეჭდილია ფოლადაშვილი. პროკურორს სურს, ექსპერტიზას წარედგინოს ეს ვიდეომასალა და ამაზე ჩატარდეს ექსპერტიზა. ჩვენ დავსვით კითხვები: სად იყო ეს ვიდეო მასალა შვიდი თვის განმავლობაში? რატომ არ არის არსად დაფიქსირებული, რომ ეს გადაღება მოხდა? რატომ არ არის ის საგმომძიებლო მოქმედების ოქმში. სადმე ხომ უნდა ყოფილიყო ეს მტკიცებულება, კანონით, დადგენილი წესით. არ შეიძლება მტკიცებულებები ჩიტებივით იჩეკებოდეს პირდაპირ სასამართლო პროცესზე.
_ მაინც რა და ვინ ჩანს ამ ვიდეოფირზე?
_ ფოლადაშვილი ჩანს, მაგრამ არავინ იცის, როდის არის დაკავებული და როდის არის გადაღებული. უბრალოდ ჩანს, რომ მას კისერსა და ხელზე აქვს რაღაც დაზიანება. პროკურორი ამტკიცებს, რომ ეს გადაღებულია დაკავების შემდეგ, რაღაც კონკრეტულ დროს, მაგრამ არსად არ მტკიცდება, არანაირი დოკუმენტი არ არსებობს, რომ ეს ნამდვილად იმ დროს არის გადაღებული და ვერავინ ხსნის, რატომ არ იდო ეს ვიდეოკასეტა აქამდე საქმეში. საეჭვო დამთხვევაა: ექსპერტიზა მიმდინარეობს თბილისში და უცებ ექსპერტი, ბატონი ბახტაძე წერს წერილს, რომ საკმარისი მასალები არ არის ფოლადაშვილის დაზიანების ხარისხის შესამოწმებლად და გთხოვთ, გამომიგზავნოთ დამატებითი მასალებიო. ზუსტად იმავე დღეს, როცა ექსპერტი ამას წერს, წარმოადგინა პროკურორმა ფეტვიაშვილმა ეს კასეტა, ერთი და იგივე რიცხვით არის დათარიღებული ექსპერტიზის წერილი და პროკურორის მიერ წარმოდგენილი მტკიცებულება, ანუ რას ნიშნავს ეს? ისინი ერთმანეთთან შეთახმებულად მოქმედებდნენ. ეს ჩემი ლოგიკური დასკვნაა. მე ვადაშაულებ ეროვნულ ექსპერტებს – ბახტაძეს, ახალკაციშვილს, რომ ისინი აბსოლუტურად საეჭვო ალიანსში შევიდნენ ბრალდების მხარესთან და გასცეს არასწორი დასკვნა. მათ ექსპერტიზა ისე ჩაატარეს, რომ ჩვენი მხრიდან ჩართულ ექსპერტთან, ბატონ თოფურიძესთან კონსულტაციები არ უწარმოებიათ. დამოუკიდებლად მიიღეს გადაწყვეტილება, ორ თვეზე მეტია, ექსპერტები ტვინს იჭყლეტენ, როგორ „გადაარჩინონ“ ეს საქმე, დაწერონ დასკვნა, რომ ეს დაზიანებები ფოლადაშვილს მიყენებული აქვს დაკავების დროს, ანუ მოიგონონ ის, რაც არ არის.
ფოლადაშვილი ამბობდა, რომ ურეკის პოლიციის შენობის ერთ-ერთი ოთახის კედელზე მისი სისხლის კვალია. ჩვენ ჩავატარეთ ექსპერტიზა და კედელზე არანაირი სისხლის კვალი არ არსებობს, – აცხადებდა ბესელია.
