“თელასის” მოშიმშილე თანამშრომლებს “თელასში” მომუშავე კოლეგებიც უერთდებიან

პროტესტის უკიდურესი ზომისთვის მიმართვა ყოფილმა თანამშრომლებმა მას შემდეგ მიიჩნიეს საჭიროდ, რაც ცნობილი გახდა, რომ “თელასის” გენერალურ დირექტორსა და სამსახურში აღდგენის მოლოდინში მყოფ თანამშრომლებს შორის არსებული შეთანხმება დაირღვა;

_ გენერალური დირექტორი აშოტ მანუკიანი შეგვპირდა, რომ ორშაბათიდან დაიწყებოდა უსამართლოდ დათხოვნილთა სამსახურში აღდგენის პროცესი, მაგრამ, აღმოჩნდა, რომ გენერალურმა დირექტორმა დილით, გამთენიისას, საქართველო დატოვა _ 6 საათზე მძღოლმა სარფის საზღვარზე გადაიყვანა. ამიტომ, ხვალიდან ჩვენი ორი თანამშრომელი შიმშილობის დაწყებას აპირებს და საპროტესტო აქციებიც გაგრძელდება, _ ამბობს “გურია ნიუსთან” საუბარში საინიციატივო ჯგუფის წევრი ნინო ტივაძე.

დათხოვნილი თანამშრომლები ფიქრობენ, რომ “თელასის” ხელმძღვანელები დროს სპეციალურად ჭიმავენ, რადგან მათი ინფორმაციით, ენერგეტიკის მინისტი კახი კალაძე და “თელასის” მეპატრონე ბორის კოვალჩუკი ამ საკითხთან დაკავშირებით უახლოეს პერიოდში უნდა შეხვდნენ ერთმანეთს.

“თელასიდან” გათავისუფლებული თანამშრომლები მიიჩნევენ, რომ ისინი უკანონობის მსხვერპლნი არიან და შელახული უფლებების აღდგენას ითხოვენ. დღეისთვის სამსახურში აღდგენას რამდენიმე ათეული თანამშრომელი ითხოვს.

„როგორც ცნობილი ხდება, ხვალ, საქართველოს ენერგეტიკის მინისტრი, კახი კალაძე, 12 საათზე, თურქეთში „ინტერრაოს“ წარმომადგენელს ბორია კავალჩუკს ხვდება. ველოდებით რა შედეგით დასრულდება მოლაპარაკება.

მინისტრმა კალაძემ “პირველი არხის” ეთერში განაცხადა, რომ ყველაფერი დალაგდება და ამ ხალხს დააბრუნებენო. იცით როგორ ეტაპამდე ვიყავით მისული?! ბატონმა მანუკიანმა დავალება მისცა პროფკავშირებს, კომერციული დირექტორის მოვალეობის შემსრულებელს, მოაგროვეთ განცხადებები, დამიხარისხეთ, მე დავიწყებ აღდგენით სამუშაოებს და დავწერ ბრძანებებსო. ორშაბათს, 12 საათამდე ჰქონდათ ვადა. ამ ადამიანებმა იმუშავეს, ყველაფერი გაამზადეს და მოხდა ისე, რომ მანუკიანი სასომხეთში წავიდა. დავრჩით გაღიმებულები. ამის შემდეგ მივმართეთ უკიდურეზ ზომას შიმშილობას,” _ აცხადებს ნინო ტივაძე “გურია ნიუსთან.”