_ #7 საპყრობილეში კანონიერი ქურდები და ავტორიტეტები იხდიან სასჯელს. თუთბერიძის განცხადებით, “კრიმინალურ ავტორიტეტმა” ვატო ყიფიანმა კრიმინალური სამყაროს წარმომადგენლებს უთხრა, თუ რომელიმე გაბედავთ ბაჩო ახალაიას თითი დააკაროთ, მე შეგიწირავთ, მე უნდა მოვკლაო. თუთბერიძის აზრით, #7 საპყრობილეში ბაჩო ახალაიას სიცოცხლეს საფრთხე ემუქრება.
იმის შესახებ, თუ ვინ და როდის დაემუქრა ბაჩო ახალაიას და რა საფრთხეზე საუბრობს “გურია ნიუსი” თეა თუთბერიძეს ესაუბრა.
_ ვინ არის ვატო ყიფიანი და საიდან იცნობს ის ბაჩო ახალაიას?
_ ვატო ყიფიანი იყო ადამიანი, რომელმაც ბაჩო ახალაიას სასჯელაღსრულების სისტემაში მისვლის შემდეგ შემოუთვალა, რომ უნდოდა მისი ნახვა.
ბაჩო მივიდა #5 სასჯელაღსრულების დაწესებულებაში, სადაც ვატო ყიფიანი იჯდა. სხვათა შორის, ბაჩო ახალაია როდესაც გადავიდა მე-5-ში, მასთან სასაუბროდ ვატო ყიფიანი შევიდა და “თვალი” შეჰყვა. ბაჩომ იკითხა, ეს ვატოა, მაგრამ ის ვინ არის, რომ შემოყვაო? – ის “თვალიაო”, უთხრეს.
_ რა მოთხოვნა ჰქონდა ვატო ყიფიანს?
_ არ შემეხოთ და გპირდებით, არც ერთ ციხეში ბუნტი არ გექნებათ; არ გეყოლებათ არც ერთი პატიმარი, რომელიც იტყვის, ძალით მათამაშესო; არ გეყოლებათ არც ერთი პატიმარი, რომელიც იტყვის “ობშიაკი” ძალით დამადებინესო; არ გეყოლებათ არც ერთი პატიმარი, რომელიც თავს მოიკლავს. მკვლელობები საერთოდ არ იქნება ციხეშიო. გამოყავით ერთი ადამიანი, ვისაც ენდობით _ ყოველი თვის ბოლოს ის 300 000 დოლარს მოიტანსო.
_ ვისთან მიდიოდა ციხეში აკრეფილი ფული?
_ ჩემი ინფორმაციით, მთელ სისტემაში, დაახლოებით, მინიმუმ, 500 000 ამერიკული დოლარი იკრიბებოდა. რა თქმა უნდა, ეს ფული მარტო კანონიერ ქურდებთან არ რჩებოდა. ეს ფული ადმინისტრაციაში ნაწილდებოდა. უფრო ზევითაც მიდიოდა.
ძალიან ცუდ რამეს ვამბობ, არ ვიცი, უნდა ვთქვა თუ არა, მაგრამ, სოზარ სუბარი ძალიან კარგად იცნობს ერთ ადამიანს, რომელთანაც, რევოლუციის შემდეგ, წლების განმავლობაში მეგობრობდა. სოზარმა ძალიან კარგად იცის, როცა ეს ადამიანი იუსტიციის მინისტრად ახალდანიშნული იყო, როგორ მივიდა შოთა კოპაძე მასთან და უთხრა, რამდენი იყო “ზემოთ” საჭირო. ის დაიბნა, ვერ მიხვდა, როგორ გეკადრებათ, რას ამბობთ, არაფერიო. სოზარი ეუბნებოდა, შტერი ხარ, როგორ არ დათანხმდი და მერე დაგვეჭირა მაგაზეო. ახლა მაინტერესებს, რამდენს შესთავაზებენ სოზარს, რამდენი იქნება “ზემოთ” საჭირო, თუ “ობშიაკების” აკრეფა დაიწყება?! დარწმუნებული ვარ, დაიწყება. ეს კი საზოგადოებაზე ძალიან მალე აისახება, რადგან ეს ქვეყანაში დანაშაულის ზრდასთან პირდაპირ იყო მიბმული _ პატიმარს ყოველი თვის ბოლოს “ობშიაკი” რომ ჰქონდა დასადები, მას გარეთ თავისი “კუტოკები” ჰყავდა, უკავშირდებოდნენ და ეუბნებოდნენ თვის ბოლოს რამდენი უნდა შეეგზავნათ. ამ ფულის შესაგროვებლად გარეთ იწყებოდა მუშაობა _ ვიღაცას ჩანთას ჩამოგლეჯდნენ. ვიღაცას ოქროს საყურეს წაართმევდნენ, ვიღაცას მობილურს ართმევდნენ, ვიღაცას სახლში თავს ესხმოდნენ, ვიღაცას გაქურდავდნენ, ვიღაცას მანქანაზე საბურავს მოუხსნიდნენ.
რეალურად, ქვეყანაში დანაშაულის რიცხვი რამ შეამცირა? იმან კი არა, პატრულის მანქანაში უნიფორმებში ლამაზად ჩაცმული პატრულის თანამშრომლები რომ დადიოდნენ. რა თქმა უნდა პატრულის როლს არ ვაკნინებ, მაგრამ, რეალურად ბაჩო ახალაიას კრიმინალური სამყაროს კონტროლი რომ არ აღეკვეთა, როგორც ციხის შიგნით, ისე, გარეთ, ქვეყანაში დანაშაული ვერ შემცირდებოდა და ჩვენს ლამაზად შეღებილ პატრულის მანქანებში აგვიფეთქებდნენ პატრულის თანამშრომლებს.
ადამიანები, რომლებიც საუბრობენ “კანონიერ ქურდებზე” და ე.წ. კრიმინალურ ავტორიტეტებზე, მე მგონი, მათ წარმოდგენაც კი არ აქვთ, რა არის ეს სამყარო.
_ ციხეების მონიტორინგის ჯგუფის წევრები, რომლებმაც ციხეში ბაჩო ახალაია მოინახულეს, აცხადებენ, რომ ყოფილ მინისტრს საფრთხე არ ემუქრება. თუმცა, თქვენ, ახალაიას მეგობრები, დაჟინებით ითხოვთ “კრიტიდან” მის გადაყვანას.
_ დღეს რომ ლაპარაკობენ, არ მიდის ბაჩო ახალაიაზე ზეწოლა, არ ჰქონია ადგილი შეძახილებსო, თქვენ რა გგონიათ, კანონიერი ქურდები ის კატეგორიაა, რომ აქ ბაჩო ახალაიას დაუწყონ გინება და რაღაცა?! მათი ტვინი, ამ წუთში მომართულია სხვა მიმართულებით. ამას ვერ ხვდება სოზარ სუბარი?!
_ საზოგადოებაში საუბრობენ იმაზე რომ, შესაძლოა, ბაჩო ახალაიას საფრთხე ნაციონალური მოძრაობის წევრებისგან შეექმნას.
_ ჰო, ახლა აკაკი მინაშვილია შესული, რომ მოკლას ბაჩო ახალაია. ვინ ნაციონალები? აკაკი მინაშვილს აქვს უფლება მინიჭებული უსუფაშვილისგან, რომ შევიდეს ბაჩოსთან. საერთოდ, რაზე საუბრობთ? ვერ ვხვდები, რა ვურჩიო ადამიანებს, რომლებიც ასეთ სისულელეს ამბობენ.
_ სოზარ სუბარის მოადგილე ირაკლი წერეთელი, გავრცელებული ინფორმაციით, ვატო ყიფიანის ახლო ნათესავია.
_ ვცდილობდი ეს ინფორმაცია მის სხვადასხვა ახლო სანათესაოსთან გადამემოწმებინა. მე რა ინფორმაციაც მაქვს, იმის მიხედვით, ირაკლი წერეთელი ვატო ყიფიანის დეიდაშვილია. საპირისპირო შეუძლიათ ამტკიცონ თვითონ.
_ თქვენი ინფორმაციით, სად იმყოფება ვატო ყიფიანი?
_ ჩემი ინფორმაციით, ვატო ყიფიანი საქართველოში არ იმყოფება. იმისთვის, რომ ყიფიანმა სისრულეში მოიყვანოს ის მუქარა, რაც მან ბაჩოOახალაიას მისამართით გააჟღერა, არ აქვს არსებითი მნიშვნელობა, სად იმყოფება იგი. როგორც მე ვიცი, ეს მუქარა დღემდე ძალაში რჩება.
_ რა მუქარაზეა საუბარი?
_ მან თავისი სამყაროს წარმომადგენლებს უთხრა: თუ რომელიმე გაბედავთ ბაჩო ახალაიას თითი დააკაროთ, მე შეგიწირავთ _ მე უნდა მოვკლაო. ეს პირდაპირ აქვს ვატო ყიფიანს ნათქვამი.
_ ლალი მოროშკინა საპყრობილედან რომ გამოვიდა, მან თქვენ გითხრათ, რომ ბაჩო ახალიამ თქვენთვის დამაბარა ცალკე რაღაცო?
_ (იცინის) არ ვიცი. როგორ წარმოგიდგენიათ, ბაჩო ახალაია ლალი მოროშკინას რამეს ეტყოდა?!
_ საუბრობენ იმას, რომ ბაჩო ახალაიამ მოროშკინას დააბარა _ თეა თუთბერიძემ არ იხმაუროს და გაჩერდესო. გადმოგცათ ასეთი დანაბარები ლალი მოროშკინამ?
_ (იცინის) ლალი მოროშკინამ მე რა უნდა მითხრას, არ ვიცი, მაგრამ მისი დიდი ხნის მეგობარი რომ ყოფილა ბაჩო ახალაია… არა, ეს ყველაფერი სასაცილოა. არც კი ვიცი, რამდენად შეიძლება კომენტარის გაკეთება ამაზე. როცა ლალი მოროშკინა მე-7-ე საპყრობილედან გამოვიდა, იგი ჟურნალისტებს უცხადებდა, რომ, თურმე, ბაჩო ახალაიას დიდი ხნის მეგობარი ყოფილა. რამდენი წელია, 2000 წლიდან ბაჩო ახალაიასთან ვმეგობრობთ მე და აკო. აკოს არაფერს აბარებს და ლალისთვის დაუბარებია?! _ ამბობს თუთბერიძე.
“გურია ნიუსი” თუთბერიძის ბრალდებებთან დაკავშირებით, სასჯელაღსრულების, პრობაციის და იურიდიული დახმარების სამინისტროს მედიასთან ურთიერთობის სამსახურის უფროსს, რეზო ხოფერიას ესაუბრა და მისი მეშვეობით, ბრალდებების ადრესატებიდან კომენტარების მიღებას შეეცადა:
“სასჯელაღსრულების, პრობაციის და იურიდიული დახმარების მინისტრის მოადგილე, ირაკლი წერეთელი ვატო ყოფიანთან ნათესაურ კავშირს უარყოფს და მიაჩნია, რომ ამ აბსურდულ ბრალდებაზე კომენტარი ზედმეტია. მინისტრის მრჩეველი ლალი მოროშკინა არც უარყოფს და არც ადასტურებს ახალაიას მიერ თეა თუთბერიძის მისამართით ნათქვამს _ თუთბერიძემ არ იხმაუროს და გაჩერდესო. _ მე არც ვადასტურებ და არც უარვყოფ. ახალაიას ჰყავს ადვოკატი, ეს ინფორმაცია თუ ვინმეს აინტერესებს, თვითონ ადვოკატმა გამოიტანოს, _ ამბობს მოროშკინა.
რაც შეეხება მინისტრის სოზარ სუბარის მოსაზრებას, ის თეა თუთბერიძის მიერ გაჟღერებულ ინფორმაციებს, მათ შორის შოთა კოპაძესთან დაკავშირებულ მისი მეგობრის ისტორიას არასერიოზულად მიიჩნევს და ამბობს: “მართლაც ბევრი რამე მახსოვს, მაგრამ ქრთამის აღებასთან დაკავშირებულ ისტორიას ვერ ვიხსენებ”.
