“ომის დროს წითელი ხიდისკენ გარბოდნენ, მერე კი მობრუნდნენ და დევნა აქეთ დაგვიწყეს”

_ ჩვენ მეომარი ხალხი ვართ, არავისტები ვართ, მხოლოდ საკუთარი სახელი და გვარი გვაქვს და თუ სამშობლოს დასჭირდა, კვლავ ვიბრძოლებთ. ვართ მეომარი ხალხი, აფხაზეთში, სამაჩაბლოში, ავღანეთში თუ ერაყში ნაბრძოლი. მოვითხოვთ, გადადგნენ გუბერნატორი, გამგებელი, საკრებულოს თავმჯდომარე. ჩატარდა არჩევნები, ნაციონალებმა წააგეს და მაინც ხელისუფლებაში სხედან. რას ელოდებიან? კაი ჯიპები, კაი ხელფასები, თან გაიორმაგეს. პრივილეგიები… რაშია საქმე? ომში თქვენ იბრძოლეთო და კაი ცხოვრება ჩვენ გვინდაო, _ ასე დაიწყო თავისი გამოსვლა ვეტერანმა მურთაზ აბაშიძემ. საკუთარი უკმაყოფილება გამოხატეს ვეტერანებმა ზურაბ ურუშაძემ, ზურაბ ჭელიძემ, ავთანდილ ჩავლეშვილმა.

_ მათ ჩვენი უფლებები ფეხქვეშ გათელეს. 2008 წლის ომი რომ იყო, ზოგი წითელ ხიდთან გარბოდა და ზოგი – თურქეთში. მერე მობრუნდნენ და აქეთ დაგვიწყეს დევნა. ნუ გადაგვრევენ! ჩვენ არაფრის დამტვრევას არ ვაპირებთ, ის შენობა ჩვენი და ჩვენი შვილებისაა. შეიგნონ და წავიდნენ დროულად, თუ არა და, არც მათი გამოყვანა გაგვიჭირდება გუბერნიიდან, _ ისმოდა აქციაზე.

ომის ვეტერანების აქცია მალე დასრულდა. მათ კიდევ ერთხელ გაიმეორეს, რომ არ არიან რომელიმე პარტიის წევრები, აქვთ მხოლოდ საკუთარი სახელი და გვარი და მხოლოდ საკუთარ მოსაზრებას აფიქსირებენ იმის გამო, რომ ნაციონალური ხელისუფლების გადამკიდე, ომის ვეტერანები, ფაქტობრივად, მშივრები არიან _ 22 ლარის ამარა დარჩნენ. მათთვის არც პოლისია და არც ყურადღებას აქცევს ვინმე.

აქციის დასრულების შემდეგ, ოზურგეთელი ომის ვეტერანები ლანჩხუთში წავიდნენ.

_ იქაც იმართება ასეთი აქცია და ლანჩხუთელ ვეტერანთა მხარდასაჭერად მივდივართ, _ თქვეს მათ.