ზვიად კუკავა წინა მოწვევის პარლამენტში ყოფილი მთავარი პროკურორის, მურთაზ ზოდელავას უფლებამონაცვლე იყო. კუკავა თავის ინტერვიუებში არც იმას მალავდა, რომ ნიკა გვარამიას პროტეჟე იყო და მანამდე მის იურიდიულ ფირმაში მუშაობდა მიხეილ სააკაშვილს ძმასთან, დავით სააკაშვილთან ერთად.
ზვიად კუკავას სახელს კიდევ ერთი საინტერესო დეტალი უკავშირდება. ის აუდიტის სამსახურის ამჟამინდელ გენერალურ აუდიტორთან, ლაშა თორდიასთან ერთად, პარლამენტში არაერთი კანონპროექტის ავტორი იყო, მაგრამ ამ კანონპროექტებზე მედიასაშუალებებთან კომენტარს თითქმის არასდროს აკეთებდა, რასაც მისი დაკავებულობით ხსნიდა.
როგორც ჩანს, აუდიტის სამსახურში, (ყოფილ კონტროლის პალატაში), “ნაციონალური მოძრაობა” ძალების მობილიზაციას ახდენს და უწყებას საკუთარი კადრებით აკომპლექტებს. მართალია, ეს კადრები საპარლამენტო არჩევნებში “ნაციონალური მოძრაობის” დამარცხებული მაჟორიტარები არიან, მაგრამ ამას ხელი შეუშლია იმისთვის, რომ აუდიტის სამსახურში ხელმძღვანელ პოზიციებზე დაენიშნათ. რა დამსახურებისთვის, ჯერჯერობით უცნობია.
ბოლო სამი კვირის განმავლობაში, საკმაოდ საპასუხისმგებლო თანამდებობებზე, მათ შორის ადმინისტრაციული დეპარატამენტის და ასევე ბიუჯეტების აუდიტის დეპარტამენტების უფროსად, ამ საპარლამენტო არჩევნებში „ნაციონალური მოძრაობის“ დამარცხებული მაჟორიტარები დაინიშნენ _ ანდრო ალავიძე და ბეჟან ბუცხრიკიძე.
ადმინისტრაციის ყოფილი უფროსი, ირენა მელუა კი ქუთაისის კონტროლის პალატაში გადაუყვანიათ.
ინფორმაციის გადასამოწმებლად, აუდიტის სამსახურის პრესსამსახურის უფროსთან ფატი მამიაშვილთან აღარ დაგვირეკავს, რადგან როგორც ყოველთვის, “გურია ნიუსთან” კომენტარს არ აკეთებს.
პირველი საკადრო ცვლილებების განხორციელების შემდეგ, მას დავუკავშირდით და კითხვის მოსმენის შემდეგ, _ ადასტურებდა თუ არა ის ამ საკადრო ცვლილებებს, მამიაშვილმა გაგვიცხადა, რომ უკვე სამუშაო საათები ამოწურული იყო და გვირჩია, ორშაბათს შევხმიანებოდით. აუდიტის სამსახურის„ ორშაბათი“ კი ჩვენი საკუთარი გამოცდილებით, მინიმუმ 6 თვე შეიძლება გაგრძელდეს და შემდეგ სასამართლოში შეტანილი სარჩელით დასრულდეს. რაც შეეხება სამუშაო საათებს, შეგახსენებთ, რომ ოპოზიციური პარტიების დაჯარიმებისას, ეს უწყება სადღეღამისო რეჟიმში მუშაობდა. იმ შემთხვევაში, თუ ზვიად კუკავას დასაქმება აუდიტის სამსახურში სიმართლეს არ შეესაბამება, უწყებას შეუძლია წერილობით მოგვმართოს და გამოვაქვეყნებთ მათ პასუხს. თუმცაღა, ჩვენი ინფორმაცია ანდრო ალავიძესა და ბეჟან ბუცხრიკიძესთან დაკავშირებით დადასტურდა, რაც შემდეგ აუდიტის სამსახურის ვებგვერდზეც აისახა ოღონდ არა ინფორმაციის სახით, არამედ მმართველობის ჩამონათვალში.
სამწუხაროდ, დაკავშირება ვერც ზვიად კუკავასთან მოვახერხეთ.
