საქართველოში ყველაზე დიდ სამშენებლო სკანდალის დეტალებზე ორგანიზაციის მკვლევარები 5 თვის განმავლობაში მუშაობდნენ. ამ სკანდალში კი ყოფილი მაღალი თანამდებობის პირები და მათი კომპანია, “ცენტრ პოინტი ჯგუფი” მონაწილეობდა. “საერთაშორისო გამჭვირვალობა საქართველოს” მკვლევარების განცხადებით, “ერთიანი ნაციონალური მოძრაობის” მიერ დაკომპლექტებულ მთავრობაში “ცენტრ პოინტი ჯგუფის” დამფუძნებლების სტატუსი და კავშირი, ბადებს ეჭვს, რომ ეს, კომპანიის ხელმძღვანელობას დაეხმარა, კლიენტებისთვის მიყენებული ზარალის გამო პირადი პასუხისმგებლობა თავიდან აეცილებინათ.
“მშენებლობის პროექტის ფარგლებში “ცენტრ პოინტი ჯგუფმა” 310 მილიონი აშშ დოლარი მიიღო. თუ რატომ ვერ მოახერხა ჯერ ცენტრ პოინტმა და შემდეგ “დექსუსმა“, ვალდებულებების შესრულება, ამ საკითხთან დაკავშირებით ბევრი კითხვის ნიშანია… სამართალდამცავი ორგანოები თავის დროზე ამ ფაქტით არ დაინტერესდნენ. ადამიანები, რომლებიც “ცენტრ პოინტი ჯგუფის” მფლობელები არიან, დაკავშირებული იყვნენ ხელისუფლებასთან. ვფიქრობთ, სწორედ ამან განაპირობა ხელისუფლების მხრიდან მათ მიმართ შერჩევითი სამართალწარმოება,” _ გვითხრა “საერთაშორისო გაჭვირვალობა საქართველოს” აღმასრულებელმა დირექტორმა ეკა გიგაურმა.
“ცენტრ პოინტი ჯგუფი” 70 კომპანიისგან შედგება, მათ შორის 55 შეზღუდული პასუხისმგებლობის საზოგადოება და 15 ამხანაგობაა. ცენტრ პოინტი საქართველოს ძველ ხელისუფლებასთან დაახლოებულ პირებს: ვახტანგ რჩეულიშვილს, მაია რჩეულიშვილსა და მის დას, რუსუდან კერვალიშვილს ეკუთვნის.
“საერთაშორისო გამჭვირვალობა საქართველოს” მკვლევარების განცხადებით, მას შემდეგ, რაც ცენტრ პოინტმა ვერ შესძლო თავდაპირველი კლიენტებისთვის ბინების აშენება, კომპანიამ შემდგომი კლიენტების თანხები, ძველი პროექტების განსახორციელებლად გამოიყენა. მიუხედავად ამისა, “ცენტრ პოინტი ჯგუფმა” აღებული ვალდებულებების შესრულება ვერ მოახერხა, რის შემდეგაც ამ საქმეში ახალი კომპანია გამოჩნდა.
2010 წლის 23 აგვისტოს 100 ლარიანი საწესდებო კაპიტალით დარეგისტრირებულმა კომპანია “დექსუსმა”, ორი კვირის შემდეგ “ცენტრ პოინტი ჯგუფის” ვალდებულებები გადაიბარა და პირობა დადო, 3 წლის განმავლობაში ყველა დაზარალებული დაეკმაყოფილებინა. “დექსუსმა” “ცენტრ პოინტი ჯგუფის” კომაპნიებთან კლიენტების მიერ დადებული პირველადი ხელშეკრულების პირობები გააუარესა და მათ დამატებითი გადასახადებისა და მშენებლობის თანხების გადახდა მოსთხოვა. “დექსუსი” სავარაუდოდ, მონაწილეობდა უკანონო გარიგებებში, რომლის მეშვეობითაც დაზარალებული კლიენტების კუთვნილი ფასეული ქონება “ცენტრ პოინტი ჯგუფის“ დამფუძნებლებს გადაეცათ… “დექსუსმა” შეჩერებული 30 სამშენებლო პროექტიდან 8 პროექტი დაასრულა და დამატებით 7 ობიექტზე სამშენებლო სამუშაოებს ახორციელებს, _ ამბობს “საერთაშორისო გამჭვირვალობა საქართველოს” მკვლევარი ლაშა გოგიძე.
“საერთაშორისო გამჭვირვალობა საქართველოს” წარმომადგენლების განცხადებით, მიუხედავად იმისა, რომ არსებობდა მყარი მტკიცებულებები და მაღალი საზოგადოებრივი ინტერესი, საქართველოს მთავარმა პროკურატურამ არ დაიწყო “ცნტრ პოინტი ჯგუფის” საქმის გამოძიება.
