მშობლები და მასწავლებლები განათლების მინისტრს, გიორგი მარგველაშვილს საკითხის გადახედვას და სკოლისთვის ავტონომიის დაბრუნებას სთხოვენ.
დარეჯან კვაშილავა, ყოფილი სკოლის დირექტორი: “სრულიად მოულოდნელად, ისე, რომ გაფრთხილებაც არ ყოფილა, მოხდა ჩვენი სკოლის ლიკვიდაცია. კერძოდ, ოპტიმიზაციის შედეგად 2012 წლის ივნისში ჩვენი სკოლა, ნაფიჩხოვოს N 2 საჯარო სკოლა, შეუერთდა ნაფიჩხოვოს N1 საჯარო სკოლას. მივმართეთ განათლების მაშინდელ მინისტრს, დიმიტრი შაშკინს, მაგრამ უშედეგოდ _ პასუხიც კი არ გაუციათ. გაუგებარია, რატომ მოხდა ჩვენი სკოლის გაუქმება, როცა რაიონში დღესაც არსებობს უფრო მცირეკონტიგენტიანი სკოლები. მიუხედავად იმისა, რომ კლასკომპლექტებია, ჩვენ მაინც ცალ-ცალკე ვატარებთ გაკვეთილებს, ერთი გაკვეთილიც არ ჩაგვიტარებია გაერთიანებული. ვმუშაობთ ორმაგს და ანაზღაურებას ვიღებთ მესამედს. ახლა, როცა განათლებას დიდ ყურადღებას აქცევს ახალი მთავრობა, იქნებ, ჩვენი თხოვნაც გაითვალისწინონ და გადახედონ წინა წლების ბრძანებებს. ჩვენი სკოლის პედაგოგიური კოლექტივის სახლით ვთხოვთ ახალ მინისტრს, ბატონ მარგველაშვილს, გულთან ახლოს მიიტანოს პედაგოგების, მოსწავლეების და მათი მშობლების თხოვნა და დაუბრუნოს ნაფიჩხოვოს N 2 საჯარო სკოლას ყოფილი სტატუსი, დაუბრუნოს ავტონომია და მოგვცენ შესაძლებლობა ჩვეულ რიტმში გავაგრძელოთ მომავალი თაობების აღზრდა.”
როგორც გავარკვიეთ, სკოლების ოპტიმიზაციის პერიოდში, ჩხოროწყუს რესურსცენტრში მივიდა ინფორმაცია, რომ უნდა გაუქმებულიყო რაიონის ოთხი სკოლა – ლესიჭინის #2 საჯარო სკოლა, ახუთის #2 საჯარო სკოლა, მუხურის #2 საჯარო სკოლა და ნაფიჩხოვოს #2 საჯარო სკოლა. რესურსცენტრის უფროსის დიდი ძალისხმევის შედეგად მოხერხდა მხოლოდ ლესიჭინის და ახუთის საჯარო სკოლების ოპტიმიზაციის გაუქმება.
“გურია ნიუსმა” ვერ შეძლო ჩხოროწყუს საგანმანათლებლო რესურსცენტრის უფროსთან, ლია ჯალაღონიასთან დაკავშირება, ამიტომ მუნიციპალიტეტის გამგებელს, დათო გოგუას დაუკავშირდა.
დათო გოგუა: “ოპტიმიზაციის შედეგად, ჩხოროწყუს რაიონში რამდენიმე სკოლის შეერთება მოხდა. ავტონომიის დაბრუნებას ნაფიჩხოვოს N 2 საჯარო სკოლასთან ერთად, სხვა სკოლებიც ითხოვენ. მე ვფიქრობ, ამ საკითხს კომპლექსური მიდგომა სჭირდება, სკოლების ოპტიმიზაცია გლობალური პრობლემაა ჩვენს რაიონში. ვერ გეტყვით, აღუდგებათ თუ არა სკოლებს ყოფილი სტატუსი, მაგრამ მუნიციპალიტეტი ამ პედაგოგების და მოსწავლეების ინტერესებს ყოველთვის დაიცავს. ვფიქრობ, განათლების სამინისტრო გადახედავს ამ პრობლემის გამომწვევ მიზეზებს და სათანადო რეაგირებას მოახდენს.”
