“ეს ხალხის ფულები იყო _ მელენტი ბაბუას კი არ დაუტოვებია ჩიტიძისთვის”

დავით წულაძემ მედიით განცხადება გააკეთა, რომ ახლანდელი ხელისუფლება წინა მთავრობას ხელს აფარებს, თუმცა, კონკრეტულად რას გულისხმობდა, არ დაუკონკრეტებია.

_ ბატონო დავით, თქვენ ბრძანეთ, რომ ახლანდელი საკრებულო ძველს ხელს აფარებს და რაღაც საიდუმლო შეთანხმებებს აქვს. კონკრეტულად რას გულისხმობდით?

_ ლანჩხუთის რაიონში საკრებულო 1992 წლიდან ფუნქციონირებს. იმ დროიდან საკრებულოს წევრი ვარ, ორჯერ საკრებულოს თავმჯდომარეც ვიყავი. მაგრამ რაც ახლა ხდება, ჩემთვის გაუგებარია, როგორც გაირკვა, არც ჩოხატაურსა და ოზურგეთში განიხილეს 9 თვის შედეგები. მე უკვე დიდი ხანია მოვითხოვ კვარტლის შედეგების საკრებულოზე განხილვას, ვინაიდან ყველა პროგრამა გაწერილი იყო წინასაარჩევნოდ, მაგრამ არავინ მისმენს. ეს დანაშაულია, ამაზე ყველამ უნდა აგონ პასუხი, ყველამ ვინც თანამდებობაზეა სამივე მუნიციპალიტეტის მასშტაბით. მიუხედავად იმისა, რომ ამას ასევე დაჟინებულად ითხოვს დეპუტატი, მაინც არავინ ისმენს და ჩემს მოთხოვნებს ყურადღებას არ აქცევენ. როცა ამერიკის შეერთებულ შტატებში ვიმყოფებოდი, იქ ერთ-ერთი ქალაქის მერმა მითხრა, მე რომ საკრებულოს წევრმა ჰალსტუხის გამო შენიშვნა მომცეს, მაშინვე დავტოვებ მერობასო. წარმოგიდგენიათ, ესენი კი ბიუჯეტს არ განიხილავენ!

ყველა საკრებულოს რეგლამენტშია გაწერილი, რომ გამგეობა ვალდებულია წარუდგინოს საკრებულოს ბიუროს ყოველკვარტლური ანგარიში. 9 თვეში რომ 200 000 ლარზე მეტი პრემიები დაიწერეს, იმას მოვითხოვ. ხალხის ფულია ეს, რეზო ჩიტიძისთვის მელენტი ბაბუას კი არ დაუტოვებია. სწორედ ამას ვგულისხმობდი მე ხელის დაფარებაში, _ თქვა წულაძემ.

ჩვენ ამ თემაზე კომენტარი საკრებულოს თავმჯდომარეს, ამირან გიგინეიშვილს ვთხოვეთ:“ეს საკითხი ბიუროზეც და კომისიაზეც განხილულ იქნა, მერე ბიურომ ჩათვალა საჭიროდ, რომ არ არის აუცილებელი დაავალოს გამგებელს, გაიტანოს საკრებულოზე 9 თვის შედეგები. მიზეზი მარტივია _ მთელი წლის ანგარიში მაინც უნდა წარმოადგინონ წლის დასრულებიდან ორი თვის შემდეგ. ეს წლის ანგარიში უკვე წარმოდგენილია, ასევე 9 თვისაც, მათ შორის. ჩვენ, საკრებულოს განკარგულებით, მოვიწვიეთ გარე აუდიტი, გამოვაცხადეთ ტენდერი და ვალდებულები ვართ, მაისამდე მთელი წლის ანგარიში ან დავამტკიცოთ ან _ არა. თუ არ დავამტკიცეთ, მაშინ გამგეობა მიდის სახლში _ ასეთი წესია თვითმმართველობის კანონის მიხედვით. ამჯერად ველოდებით გარე აუდიტის დასკვნას, მერე, მთელი წლის ანგარიშს და მათ შორის 9 თვისაც, განიხილავს სხვადასხვა კომისიები. ამის შემდეგ მოხდება მისი განხილვა საკრებულოზე. სად წავა ის 9 თვე, გამაგებინეთ? ვინც ტენდერს მოიგებს, ჩაატარებს აუდიტს დაწყებული საფინანსო ანგარიშიდან, დამთავრებული არსებულ შედეგებამდე. აუდიტმა ეს ყველაფერი უნდა დადოს და დასკვნა გამოიტანოს. ამის შემდეგ ეს დასკვნა შედის დარგობრივ კომისიაში, მათი დასკვნებიც დაიდება მაისამდე. ჩვენ გაგვაქვს ეს საკრებულოს სხდომაზე., რომელიც ჩაითვლება დამაკმაყოფილებლად ან _ არადამაკმაყოფილებლად. ასე რომ, დამალული და რაღაც ისეთი აქ არაფერი არ არის,” _ გვითხრა გიგინეიშვილმა.