მცირეწლოვანი შვილიშვილი სამი წლისაა, დანარჩენი ხუთი წევრი უმუშევარია. ერთი ვაჟს ჯანმრთელობის პრობლემები აქვს.
ვაჩნაძეებს ვერაფრით აუხსნიათ, სამი წლის წინ, რა მოტივით გაუუქმეს სოციალური დახმარება.
მას შემდეგ, ყოველ წელს გამუდმებით წერენ განცხადებას, რათა დახმარება ხელახლა დაუნიშნონ, თუმცა, უშედეგოდ. ფაქტობრივად, ოჯახი სოციალური დახმარებით სულდგმულობდა. მას შემდეგ კი, რის გაყიდვაც შეიძლებოდა, ყველაფერი გაყიდეს, რათა პური მაინც ჰქონოდათ. რაც შეეხება შუქისა და გაზის გადასახადს, გაჭირვებით ახერხებენ გადახდას.
ჩვენი იქ ყოფნის დროს, ელქსელებიდან მოსულმა ბრიგადამ ელექტროენერგია სწორედ იმ დროს გაუთიშა, წინა თვის გადაუხდელობის გამო. გაზი კი მხოლოდ ერთ წერტილზე აქვთ დამონტაჟებული და გასათბობად შეშის ღუმელს იყენებენ.
ქალბატონ ქეთევანს გული აწუხებს და გასულ წელს საავადმყოფოში იწვა, მეუღლეს შაქარი აქვს და მუდმივი მკურნალობა სჭირდება. სამუშაოს ოჯახის ყველა წევრი დაეძებს, მაგრამ ჯერჯერობით, ვერსად იშოვეს.
_ მარტო აფთიაქში 180 ლარი მაქვს წამლების ვალი, 120 ლარი კი პურის მაღაზიის გამყიდველის მმართებს. ვეცოდები იმ ქალს, მაგრამ ხომ ვერ მაჩუქებს? სამი წლის ერთადერთი შვილიშვილი რომ უკან დამდევს, კანფეტი და “სასისკი” მიყიდეო და მე ვალში ვიხრჩობი და ცრემლიც მახრჩობს, ესაა ცხოვრება? _ ამბობს ქეთევან ვაჩნაძე.
იგი უმადურობას არ გამოხატავს გურიის გუბერნატორისა თუ ოზურგეთის გამგეობის მიმართ და აღნიშნავს, რომ მეუღლის ავადმყოფობის დროს ჩიტაიშვილი 500 ლარით დაეხმარა, მანქანაც გამოუგზავნა საავადმყოფოში გადასაყვანად. ასევე ოზურგეთის გამგეობამ შეშის საყიდლად 80 ლარი სულ ახლახან გადასცა, მაგრამ ერთჯერად თანხას ოჯახი შიმშილის, სიცივის და უწამლობის გასაჭირიდან ვერ ამოჰყავს.
როგორც ქეთევან ვაჩნაძე ამბობს, მისი დაოჯახებული ვაჟი, ერთხანს ურეკში, “ვისოლის” ბენზინგასამართ სადგურზე მუშაობდა, თუმცა იმდენად ხარჯიანი იყო იქ სიარული, ზოგჯერ პურის ფულიც არ რჩებოდა, ამიტომ მუშაობას თავი დაანება. თვითონ ოჯახებში დამხმარედ არაერთხელ მუშაობდა, ახლა კი პატარა შვილიშვილის გამო, საკუთარ ოჯახს სჭირდება შემშველებელი.
_ როცა სოციალური დახმარება მომიხსნეს, სოციალური სააგენტოდან, უფროსიანად ყველა აქ მოვიყვანე. ერთმა თანამშრომელმა მითხრა, რაკი გიჭირს, გინდა, რომ სოციალური დახმარება პენსიასავით სულ გეძლეოდესო? გული თუ არ გამისკდებოდა, არ მეგონა. მათხოვარი კი არ ვარ, მაგრამ სადაა სამუშაო, რომ ჩემი ოჯახიდან ერთი ადამიანი მაინც დასაქმდეს? _ კითხვაზე პასუხს ითხოვს ქეთევან ვაჩნაძე.
სოციალური აგენტი, ბოლოს, 2012 წლის დეკემბერში ეწვია მათ ოჯახს და დაუბარა, ტელევიზორს თვალი მიადევნეთ, თუ რაიმე შეიცვლება კანონში, გაიგებთ და განცხადება კვლავ შემოიტანეთო. თუმცა, იმედი მაინც არ აქვს:
_ რატომ მომიხსნეს დახმარება, რამე შენაძენი ნახეს? უფრო გამიჭირდა, არათუ წინ წავიწიე, ორი ვაჟი მყავს, ერთი ცოლშვილიანი, მეორე ავადმყოფი და ყველა ერთად, სამოთახიან, გაურემონტებელ ბინაში ვცხოვრობთ, _ ტირის ქალბატონი ქეთევანი. მათ ოჯახს პოლისი კი აქვს, თუმცა, ყოველმხრივ მოსახმარი არც ისაა, თუ მძიმე ოპერაცია არ სჭირდება ადამიანს.
_ ჩემს მარადიულ გაჭირვებას, ერთჯერადი დახმარება ვერაფერს შველის, ხელისუფლებასთან სულ ხელგაწვდილი სიარულიც მრცხვენია. ცალკე ბანკის ვალი მაქვს და პროცენტი იზრდება. ჩემს ქმარს, ცუდად როცაა, საჭირო წამალი რომ არ მაქვს, ვალერიანის წვეთებს ვასმევ. არ ვიცი, ამას, ალბათ, ინსტინქტურად ვაკეთებ, მაგრამ მგონია, რომ რაღაცას ვშველი. ჩემს ოჯახში ერთი საძინებლის ავეჯი დგას, რძალს მზითევში მისცეს. ის თუ მოხვდა თვალში აგენტს. ჩემს რძალს თუ რამ გააჩნდა, გაყიდა და ახლა ამ საწოლებს და ტანსაცმლის კარადას ვერ გაყიდის, იატაკზე ხომ არ დაწვება?!
ქეთევან ვაჩნაძეს სამეზობლოშიც აქვს ვალი და როგორც თვითონ ამბობს, მისასვლელი არავისთან აქვს. ამიტომ, ვიდრე სადმე სამუშაოს იშოვიან მისი ოჯახის წევრები, გამოსავალს იმაში ხედავს, რომ სოციალური დახმარების დასანიშნად იბრძოლოს, დახმარების გაუქმების მიზეზად კი მაინც ოზურგეთის სოციალური მომსახურების სამსახური მიაჩნია.
სოციალური სააგენტოს ოზურგეთის განყოფილებაში ვაჩნაძეების ოჯახის შესახებ ამბობენ, რომ მათ სოციალური დახმარება სამი წლის წინ ნამდვილად მოეხსნათ: _ შეუძლიათ, გაარკვიონ, რატომ მოეხსნათ, მოვიდეს ოჯახის წარმომადგენელი, _ გვეუბნებიან სააგენტოში. სხვა პასუხი მათ არ აქვთ და ცდილობენ, აღარც გვიპასუხონ.
როგორც ვაჩნაძეები ამბობენ და უამრავი სოციალურად დაუცველიც იმეორებს, გაუმჯობესების ნაცვლად, სოციალური დახმარების დანიშვნის საკითხი გაუარესდა. არა ერთ ისეთ ოჯახს აქვს სოციალური დახმარება, რომელზეც გაცილებით უარესად გაჭირვებულს, ძალიან მაღალ ქულებს აძლევენ.
“გურია ნიუსმა” ერთხელ, გურიის სოციალური მომსახურების სააგენტოს ასეთი წინადადება შესთავაზა _ პირობითად შევქმნათ ერთობლივი კომისია და ჩვენ მიერ აღმოჩენილი სოციალურად დაუცველი ოჯახების ყოფა შევადაროთ იმ ოჯახებისას, ვისაც ამ სამსახურმა უკვე დაუნიშნა დახმარება. პასუხად დუმილი მივიღეთ, თუმცა, მოთხოვნა ძალაში რჩება და უახლოეს დღეებში ჩვენ ვგეგმავთ მსგავსი სახის ღონისძიების მოწყობას.
