ბაღდათში _ ადვოკატი პაატა კიკნაველიძე; სამტრედიაში _ ასოცირებული პროფესორი, იურისტი გიორგი კახიანი; თბილისში, ნაძალადევის რაიონში კი _ ჟურნალისტური ეთიკის ქარტიის აღმასრულებელი დირექტორი თამარ კორძაია.
კულუარებში მოარული ხმების მიხედვით, არ იყო გამორიცხული “ქართულ ოცნებას” მხარი დაეჭირა “ქართული დასის” ლიდერისთვის. მიიღებს თუ არა მონაწილეობას შუალედურ არჩევნებში ჯონდი ბაღათურია და რას ფიქრობს ის პარლამენტს გარეთ დარჩენილ პარტიებზე? ამის შესახებ ის თავად გვესაუბრება.
_ ფიქრობდნენ, რომ “ქართული ოცნება” “ქართული დასის” ლიდერს დაუჭერდა მხარს. არ შედგა მოლაპარაკება, ვერ შეთანხმდით თუ საერთოდ არ ყოფილა ეს გათვალისწინებული და მიიღებთ თუ არა შუალედურ არჩევნებში მონაწილეობას?
_ კი, იყო და არის მცდელობა შეთანხმების, მაგრამ ინტრიგები აფერხებს ამ შეთანხმებას. ინტრიგებით კი დაკავებულია ხალხი, რომელსაც საკუთარ შესაძლებლობებში ეჭვი ეპარება. რაც შეეხება “ქართული დასის” მონაწილეობას შუალედურ არჩევნებში, ვფიქრობთ, რომ აქ განსაკუთრებული მდგომარეობაა, რადგან ბევრი პარტია თავდადებით შეეწინააღმდეგება ჩვენს წარმატებას და მიუხედავად იმისა, რომ ერთმანეთთან მუდმივი კინკლაობა აქვთ პოლიტიკური თუ მერკანტილური ინტერესების გამო, ჩემს წინააღმდეგ უეჭველად გაერთიანდებიან, მე ამის გამოცდილება მაქვს. ამიტომ ვეძებ მოკავშირეებს და პირველ რიგში ამ მოკავშირეს ვეძებ პრემიერმინისტრში. თუ ივანიშვილი შეძლებს გაარღვიოს ის ბლოკადა, რომელიც მის ირგვლივ შეიქმნა, მაშინ მე შევალ პარლამენტში და იქ საქმეს გავაკეთებ.
_ უკვე გახდა ცნობილი შუალედურ არჩევნებში “ქართული ოცნების” კანდიდატების ვინაობა. ბუნებრივია, პრემიერმინისტრი და მისი გუნდიც საკუთარ კანდიდატს დაუჭერენ მხარს. ნაძალადევის რაიონში თამარ კორძაია დასახელდა.
_ არ ვიცი, არ ვარ ინფორმირებული კანდიდატების შესახებ და არც თქვენს მიერ დასახელებულ კანდიდატს ვიცნობ, თუმცა, დარწმუნებული ვარ ღირსეული იქნება.
_ ბატონო ჯონდი, დღეისთვის ქართულ პოლიტიკურ სპექტრს მხოლოდ ორი პოლიტიკური ძალა ავსებს. ამ ფონზე, აქვს თუ არა შანსი და საერთოდ რა ბედი ელით სხვა პოლიტიკურ პარტიებს?
_ არ მესმის, რას ნიშნავს პოლიტიკური სპექტრის შევსება.
_ პარლამენტში მხოლოდ ორი პარტიაა.
_ ანუ პარლამენტს და არა პოლიტიკურ სპექტრს… ყველა ადამიანი თვითონ განაგებს თავის ბედს თავისი საქციელით. ღმერთმა ადამიანს მისცა თავისუფალი ნება და არჩევანის უფლება, ასევეა ამ პარტიების ამბავიც, რა გზასაც აირჩევენ, ის ელით. სხვათაშორის, მინდა გითხრათ, რომ პარლამენტი არ ასახავს ხალხის განწყობას. ხალხს 53 წიკლაური და მინაშვილი არ აურჩევია, ეს არ არის ხალხის არჩევანი. მთავარი არ არის ახლა მანდატი, ახლა მართლა ძალიან მჭირდება მოკავშირეები და ბევრი კარგი საქმის გაკეთება შეიძლება. სირცხვილია ბოლოს და ბოლოს ასეთი დიდი ამბავი რომ არის ატეხილი პარლამენტის წევრობაზე. იქნებ, ისიც მოეკითხა ვინმეს, ვინც უკვე შევიდა რითი არის დაკავებული და რატომ გაწყვიტა კონტაქტი ხალხთან ან იქნებ გამოვიდნენ პარლამენტის წევრები და ჩააბარონ ანგარიში ხალხს. რამდენ კაცს შეხვდა და რა საქმე გააკეთა, დღეში რამდენი საათი ხვრინავს და რამდენი საათი მუშაობს, რამდენი ნათესავი დაასაქმა და რამდენი ამომრჩეველი. ჩვენი პოლიტიკური სპექტრის დიდმა ნაწილმა საკუთარი თავი ამოწურა, ბიძაშვილ-მამიდაშვილების დასაქმება არ არის პოლიტიკა. ჰოდა თქვენ, ჟურნალისტებმა უნდა დასვათ ეს შეკითხვა, როცა ვიღაცა რიხით ლაპარაკობს.
_ როდის გახდება საბოლოოდ ცნობილი, მიიღებთ თუ არა შუალედურ არჩევნებში მონაწილეობას?
_ საზოგადოება მალე შეიტყობს ამის შესახებ.
_ ისევ ნაძალადევის ოლქში?
_ დიახ.
