“დაკანონებული მკვლელობების _ ჩვილთა მკვლელობების _ აბორტების წინააღმდეგ.”
“გურია ნიუსი“ აქციის ერთ-ერთ ორგანიზატორს, Sibrdzne.ge -ს ადმინისტრატორს, ვახტანგ თანდილაშვილს ესაუბრა.
_ აქცია Sibrdzne.ge -ს და ეროვნული ფრონტის ორგანიზებით იმართება. ვინ არიან ის კონკრეტული პიროვნებები, რომლებიც აქციას გაუძღვებიან?
_ აქციას გაუძღვებიან ევგენი მიქელაძე, მე და კიდევ რამდენიმე ადამიანი.
_ ალბათ სიმბოლურია, რომ ეს აქცია სწორედ 7 აპრილს, ხარება დღეს იმართება.
_ წარმოიდგინეთ, შემთხვევითი დამთხვევაა და ჩვენც აღარ შევცვალეთ თარიღი. თუმცა, ნამდვილად სიმბოლურია.
_ რამ განაპირობა ამ აქციის ჩატარება და რა იქნება მთავარი მოთხოვნა?
_ ღვთისმშობელს რომ აცნობეს ჩვილის შობა, სიხარულისგან ცას ეწია. დღევანდელ ქართველ ქალთა უმეტესობა ამ დროს დეპრესიაში ვარდება და იწყებს ფიქრს, თუ როგორ და როდის მოკლას თავისი ყრმა. კატასტროფული დემოგრაფიული მდგომარეობის უმთავრესი განმაპირობებელი ფაქტორი სწორედ ეს მოვლენა გახლავთ _ ჩვილთა ხოცვა. ყოველდღიურად გაცილებით მეტი იკვლება მუცელში, ვიდრე _ იბადება. დღეის მდგომარეობით, აბორტი, შეიძლება ითქვას, რომ სრულად ლეგალიზებულია. კანონით 12 კვირამდე ჩვილის მოკვლა შეუძლია დედას. 12 კვირაზე მეტი ასაკის ჩვილებს 12-კვირიანებად აფორმებენ, თუ საერთოდ აფორმებენ. ჩვენი ინფორმაციით, გაცილებით მეტია გაუფორმებელ ჩვილთა ხოცვა, ვიდრე გაფორმებულებისა, იმ მიზეზით, რომ გაუფორმებელი აბორტების შემთხვევაში, არც ქალის სახელი ფიქსირდება და არც ექიმების შემოსავალს დააკლდება რამე. კრიმინალიზაცია უნდა მოხდეს ამ საკითხის და მკაცრად იქნას ყველა ის პიროვნება დასჯილი, რომელიც გარეულია აბორტის გაკეთებაში. იურიდიული თვალსაზრისით, აქ უპირველესად ირღვევა ადამიანის უმთავრესი უფლება _ სიცოცხლის უფლება, მისი სიცოცხლის დაწყებიდან რამდენიმე თვის შემდეგ. ამიტომ საჭიროა პირველ რიგში სახელმწიფომ აკრძალოს აბორტის ლეგალიზება, სახელმწიფო აპარატი ჩაერთოს სრულად და გახორციელდეს კრიმინალიზაცია.
_ შეცვლის კი სახელმწიფო ამ კანონს?
-ჩვენზეა დამოკიდებული, რამდენად აქტიურად მოითხოვს ერი და რამდენად სწრაფად მოახდენს პარლამენტი ამ კანონის ცვლილებას. აღარავინ დაობს იმაზე, რომ სიცოცხლის ხელოვნურად შეწყვეტა არის მკვლელობა. აქ საუბარია იმაზე, რომ არა მხოლოდ მკვლელობაა, არამედ უმწეოს, სუსტის, დაუცველის მკვლელობა და ამავე დროს, წამებით მკვლელობა. ხელისუფლებამ უნდა გაითვალისწინოს თითოეული მოქალაქის აზრი და პრობლემა, მით უფრო, რომ ეს მთელი ერის უმთავრესი პრობლემაა. აღსანიშნავია ერთი ფაქტი _ ხშირია თითქმის დაბადებამდე მისული ბავშვების მიმართ აბორტი, მაგალითად _ 6.5 თვის ჩვილების. როცა ამ დროს აკეთებენ აბორტს, ხმას არავინ იღებს, მაგრამ თუ გაჩენილს რაიმე საფრთხე შეექმნა ან გარდაიცვალა, ამაზე მთელი საქართველო ფეხზე დადგება, როგორ თუ ჩვილი გარდაიცვალაო. არადა, თვალებს ხუჭავენ მუცელში ყოველდღიურად ასობით ასეთ გარდაცვლილზე _ მუცელი აქციეს ადგილად, სადაც მკვლელობა არ ისჯება.
_ აბორტის აკრძალვა დემოგრაფიული მდგომარეობის გამოსწორებასაც შეუწყობს ხელს, ალბათ, მთავრობა გაითვალისწინებს და გადახედავს კანონს.
_ არა თუ შეუწყობს, გამოასწორებს ამ პრობლემას. დღეს, აბორტებთან ერთად, ხდება დემოგრაფიულ პრობლემასთან დაკავშირებული ბევრი ცუდი მოვლენა _ უცხოელების მასობრივი შემოდინება; ქართველების მასობრივი გადინება; სიკვდილიანობის ზრდა; სიღარიბის გამო შვილების გაჩენის სურვილის არქონით შობადობის შემცირება.
ასე რომ, აბორტის აკრძალვას ძალიან დიდი მნიშვნელობა აქვს საქართველოს მომავლისთვის.
_ როგორ ფიქრობთ, აქციაზე ბევრი ხალხი მოვა?
_ ამის პროგნოზირება არ გვიცდია. ვფიქრობ 20 კაცი იქნება თუ 200, ხელისუფლებისთვის არ უნდა იყოს განსხვავება ამ საკითხთან მიმართებაში _ სათქმელს მაინც მივიტანთ მათთან.
