ზენაიშვილი ლანჩხუთის ,,ადითის“ მედპერსონალს შეხვდა და მათ სახელფასო პრობლემებზე ესაუბრა. შეხვედრა კითხვა-პასუხის რეჟიმში წარიმართა. როგორც ზენაიშვილი ექიმებს დაპირდა, მათი ხელფასების ერთი ნაწილის დაფარვა, სავარაუდოდ დღეს დაიფარება, ნაწილი კი თვის ბოლოს.
ამირან ზენაიშვილმა ,,გურია ნიუსთან“ ლანჩხუთელი მედპესონალთან შეხვედრა შეაფასა:
_ ,,ჩემი ლანჩხუთში ვიზიტს რაც შეეხება, ეს არის არსებული პრობლემები ლანჩხუთისა და ჩოხატაურის საავადმყოფოებში, როგორც სახელფასო ანაზღაურებასთან დაკავშირებით, ასევე სალიცენზიო პირობების შესრულებასთან დაკავშირებით, რომელიც კომპანიას ჰქონდათ აღებული, ამ შემთხვევაში ,,ადითზე“ გვაქვს საუბარი. თვეების განმავლობაში ეს ადამიანები მიმართავდნენ, როგორც ჯანდაცვის კომიტეტს პარლამენტში, ასევე სამინისტროს და ითხოვდნენ მათგან ამ პრობლემებში გარკვევას. მინდა გითხრათ, რომ ბატონი დიმიტრი ხუნდაძე შეხვდა ამ ადამიანებს, მოისმინა მათი პრობლემები და აქტიურად ჩაერთო ამ საკითხების გადაწყვეტაში. ბატონი მინისტრიც დაინტერესდა ამ პრობლემით, ძალიან დიდი დრო დაუთმო მან ამ საკითხების განხილვას, შეხვდა სადაზღვევო კომპანიების წარმომადგენლებს, ასევე ,,ადითის“ ხელმძღვანელობას და აიღო მათგან გარანტიები, რომ უახლოეს მომავალში გაისტუმრებენ ამ სახელფასო დავალიანებას. როგორც ვიცი ორშაბათს უკვე ხელფასების ერთი ნაწილი დაირიცხება, მეორე ნახევარი ამ თვის ბოლოს და შემდეგ ისევ დასხდებიან იმ საკითხების მოსაგვარებლად რაც ,,ადითს” გააჩნია. მედიკოსებმა გამოთქვეს წუხილი სამუშაოს დაკარგვასთან დაკავშირებით და მე ვფიქრობ, რომ მათ ეს ადგილები უნდა შეუნარჩუნდეთ, ამისთვის საჭიროა მესაკუთრე კომპანიამ განავითაროს თავისი ორგანიზაცია, ბაზარზე გახადოს კონკურენტუნარიანი იმ დონეზე, რომ შენარჩუნებულ იქნას და პირიქით განვითარდეს ეს საავადმყოფო. ამისთვის რათქმაუნდა უნდა გადაიხედოს ის სატენდერო პირობები, რაც მათ გააჩნდათ არის თუ არა შესრულებული. დღეს მათთან ჩამოვედი იმისთვის, რომ გადმომეცა ის ანგარიში რაც მათი თხოვნის შემდეგ გამოვიკვლიეთ. სავარაუდოდ, ალბათ ის საერთო პროექტი, რომელიც უნდა განხორციელდეს ჯანდაცვის სისტემაში, უფრო მობილიზებულსა და მოქნილს გახდის სისტემას. არ იქნება ეს ადამიანები დამოკიდებული იმაზე თუ როდის დაურიცხავს სადაზღვევო კომპანია მათ ხელფასს. მიუხედავად იმისა, რომ სახელმწიფო დროულად ურიცხავს სადაზღვევო კომპანიებს თანხას, რატომღაც მათგან გვიანდება საავადმყოფოზე თანხის გადარიცხვა.
_ რაც შეეხება ხელშეკრულებას ,,ადითთან“, გაუგრძელდა თუ არა მას ხელშეკრულება?
_ მე ვესაუბრე ,,ადითის“ წარმომადგენელს. როგორც ასეთი, გაგრძელების საკითხი არ დგას. თუ ისინი არ შეასრულებენ ამ პირობას, ლიცენზიის შეჩერებს საკითხი შეიძლება დადგეს. მე ვერ გიპასუხებთ კონკრეტულად ხელშეკრულებაზე ვერაფერს, რადგან ვმუშაობდით ხელფასების პრობლემასთან დაკავშირებით. როგორც ვიცი, თვის ბოლომდე ორგანიზაციის ებრაელი ხელმძღვანელი უნდა ჩამოვიდეს და ერთხელ და სამუდამოდ მოგვარდეს ყველა საკითხი მათთან.
