მიმართვის ტექსტს უცვლელად გთავაზობთ.
“მოგახსენებთ, რომ ქვეყანაში ბოლო 9 თვის განმავლობაში დაგროვდა იმაზე მეტი კითხვა ვიდრე ოდესმე არსებობდა და ის ყველაფერი, რის გამოც მოქმედი მთავრობა მუდამ აკრიტიკებდა ძველს არა მხოლოდ დარჩა ისე, როგორც არის, არამედ მკვეთრად გაუარესდა. დიახ ძველ მთავრობას ჰქონდა გარკვეული შეცდომები, მაგრამ ისიც უნდა აღვნიშნოთ რომ სწრაფ და მოქნილ რეფორმებს დანგრეულ ქვეყანაში ვერ განახორციელებ რაღაც შეცდომების გარეშე და ამას თავად ყოფილი მმართველი გუნდიც აღიარებს. თქვენი წინასაარჩევნო დაპირება იყო ხელისუფლებაში მოსვლის მეორე დღიდანვე სოციალური მდგომარეობის მკვეთრი შეცვლა გაუმჯობესებისკენ, რის გამოც თქვენ ამომრჩეველთა 54%-მა მოგცათ ხმა თუმცა… თუმცა აგერ უკვე 9 თვის თავზე საზოგადოებამ ვერაფერი ვერ იხილა, გარდა მაღალჩინოსანთა დაპატიმრებებისა და კრიმინალთა გარედ გამოშვების, რასაც ქვეყანაში კრიმინოგენური მდგომარეობის მკვეთრი გაუარესება მოჰყვა და ეს ფაქტია. ამის გარდა შსს-ში არის უამრავი გამოუძიებელი საქმე, რომელთა გამოძიებასაც ზემოდ ხსენებული უწყება საზოგადოებას 1 თვეში ჰპირდებოდა, მაგრამ უკვე 9 თვე გავიდა და…..
1. ბარბარე რაფაელიანცის საზარელი მკვლელობა.
2. ციხის გახმაურებული კადრები.
შემდეგ შსს-ს უმოქმედობის სია გაგრძელდა და მას დაემატა კიდევ რამდენიმე გახმაურებული საქმე, რომლის გამოძიების არანაირი ნიშანწყალი არ არსებობს, მათ შორის ჯიჰადის ცნობილი ვიდეოები, ეს საუბარია გახმაურებულ საქმეებზე, რომ აღარაფერი ვთქვათ იმ საქმეებზე, რომლებიც საზოგადოებისთვის ცნობილი არ არის. ამის ნაცვლად ჩვენ ვხედავთ ქვეყანაში აშკარა პოლიტიკურ დევნას, ზეწოლას, როგორც ოპონენტ პოლიტიკურ ძალაზე, ასევე სამოქალაქო საზოგადოებაზე, შეგახსენებთ ცოტნე მამულაშვილის საქმესა და გიორგი ხმელიძის მოდულის შენობაში მიყვანას მხოლოდ გაზიარებული სტატუსისა და პრეზიდენტთან გადაღებული ფოტოსურათის გამო, რაც ყოველგვარ სამართლებრივ და მორალურ ზღვარს სცდება. ვხედავთ ბაჩო ახალაიას დაუსრულებელ სასამართლო პროცესებს, რომლების მიმდინარეობისას პროკურატურა აბსოლუტურ უსუსურობას იჩენს და ეს პროცესები კლოუნადას ემსგავსება, ვხედავთ ოპონენტი პოლიტიკური პარტიის გენერალური მდივნის დაკავებას, რაც სახიფათო სიგნალია საქართველოს დემოკრატიული განვითარების გზაზე, ვხედავთ უპრეცედენტო ზეწოლას ადგილობრივი თვითმმართველობის ორგანოებზე, და ბოლო დღეებში თბილისის მერიისა და საკრებულოს წევრების, ყოველგვარ სამართლებრივ ჩარჩოებს გაცდენილ, სპეცოპერაციის შედეგად სამჯერ დაპატიმრებას-განთავისუფლებასა და ისევ დაპატიმრებას, რაც ნონსენსია იურიდიულ პრაქტიკაში, ვხედავთ მთავრობის ზოგიერთი წევრის მხრიდან აფხაზეთისა და ცხინვალის რეგიონის “დამოუკიდებლობის” პირდაპირ წახალისებას, რაც დამანგრეველია ჩვენი ქვეყნის სუვერენიტეტისთვის, ვხედავთ ოკუპანტი ქვეყნის მიერ ჩვენს ტერიტორიებზე მავთულხლართების გავლებას, რაც პირდაპირ არღვევს ჩვენი ქვეყნის სუვერენიტეტსა და ტერიტორიულ მთლიანობას და ამაზე მთავრობას რატომღაც არ გაუკეთებია შესაბამისი რეაგირება, ვხედავთ გაზრდილ უმუშევრობასა და მოქალაქეთა მკვეთრ უკმაყოფილებას არსებული სოციალური მდგომარეობის მიმართ, ვხედავთ აშკარა პრობლემებს განათლების სფეროში და მცდელობას ბათუმის ტექნოლოგიური უნივერსიტეტის გაუქმებისა, იმ უნივერსიტეტის, რომელიც საქართველოს განვითარებული მომავლის გარანტია, ვხედავთ გაუგებარი “სამართლიანობის აღდგენისთვის” მებრძოლი ასევე გაუგებარი სუბიექტების არც თუ კანონიერ ჩარჩოებში მოქცეულ ქმედებებს, ვხედავთ ჩვენი დასავლელი პარტნიორების აშკარა დაშორებას საქართველოსგან, რაც დამანგრეველი იქნება, საქართველოს, როგორც სახელმწიფოს არსებობისთვის, ეს სია შესაძლოა კიდევ გაგრძელებულიყო, თუმცა მიგვაჩნია რომ ის ძირითადი უკუსვლები, რაც არის აქ მეტ-ნაკლებად ჩამოვაყალიბეთ.
ყოველივე ზემოდ აღნიშნულიდან გამომდინარე მიგვაჩნია რომ ხელისუფლებაში მოსვლიდან 9 თვის შემდეგ ქვეყანაში შეინიშნება მკვეთრი რეგრესი, რაც ჩვენის ღრმა რწმენით სულაც არ ყოფილა ამომრჩეველთა 54%-ის ოცნება.
დროა შეწყვიტოთ ის უმსგავსობა, რომელიც დღეს ქვეყანაში ხდება და შეუდგეთ იმ დაპირებების შესრულებას, რომლის გამოც საქართველოს მოსახლეობამ მოგცათ ხმა, ვინაიდან ხალხის ნება არის უზენაესი და მიგვაჩნია, რომ ხალხს დღეს აწუხებს სოციალური პრობლემები რომელთაგანაც 9 თვის განმავლობაში არც ერთი, ყველაზე ელემენტარულიც კი არ მოგვარებულა, რაც სამწუხაროა.
მოგიწოდებთ გამოიყენოთ თქვენთვის კონსტიტუციით მონიჭებული მთავრობის თავმჯდომარის უფლებამოსილება და შეწყვიტოთ ქვეყანაში პოლიტიკური დევნა, კრიმინალის წახალისება, უკვე არსებული ინფრასტრუქტურისა და პროექტების შეჩერება-დანგრევა და დაიწყოთ რეალური სოციალური პრობლემების მოგვარება, რის გამოც იყავით არჩეულნი!”.
