_ თუ ხელაძე არ გადადგება, მაშინ ის უკიდურეს ზომას მივმართავ და თავს დავიწვავ! _ იმუქრებოდა ჩიჩუა.
დღეს გამგებლის მოადგილემ ვახტანგ ზენაიშვილმა პრესკონფერენცია გამართა და ორ საკითხზე ისაუბრა _ ერთი საკითხი გულნარა ჩიჩუას თემას იყო, მეორე კი პირადი შეურაცხყოფას _ იგი შეურაცხყოფაში ნუგზარ ცინცაძე-უმცროსს სდებს ბრალს და აპირებს სასამართლოს მიმართოს.
პრესკონფერენცია ყვირილისა და ხმაურის, ურთიერთდაპირისპირებული მხარეების ბრალდებების ფონზე მიმდინარეობდა _ “ქართული ოცნების” აქტივისტები _ ნუგზარ ცინცაძე-უმცროსი და ნუგზარ ჩხაიძე ზენაშვილს “ნაციონალების” ადგილობრივ ხელისუფლებაში დაბრუნებაში სდებდნენ ბრალს.
მაშინ, როცა ზენაიშვილი აკეთებდა განცხადებას, რომ მას სიტყვიერი შეურაცხყოფა მიაყენა ნუგზარ ცინცაძე-უმცროსმა, დარბაზში თავად ნუგზარ ცინცაძე-უმცროსი და ნუგზარ ჩხაიძე შემოვიდნენ. ცინცაძე საკმაოდ ხმამაღლა აცხადებდა, რომ “უნდა დასრულდეს ეს კოჰაბიტაცია, რომელსაც სათავეში ზენაიშვილი უდგას”.
ვახტანგ ზენაიშვილმა ცინცაძეს გუშინ მომხდარი ფაქტი შეახსენა და სასამართლოში ჩივილით დაემუქრა:
_ ძალიან არ მსიამოვნებდა ამაზე საუბარი, მაგრამ დამალვას აღარ ვაპირებ. გუშინ მე, ლევან ჩხაიძე და რომან ბიწაძე მივდიოდით სკვერის მიმდებარე ტერიტორიაზე ფეხით, იქედან გამოვიდა ნუგზარ ცინცაძე, უფრო მეტად გასაგები რომ იყოს “ცანცუა”, რომან ბიწაძეს ხმამაღლა უთხრა, თამარ ასკურავას ნაციონალები გაჰყავს საუბნო სარჩევნო კომისიის წევრებადო და დააყოლა გინება _ იგი ელგუჯა ჩხაიძეს დედას და პარტიის წევრებსა აგინებდა. ეს რომ გავაპროტესტე, მეც მიმაყოლა, მაგრამ ვინაიდან საჯარო მოხელე ვარ, საკადრისი პასუხი ვერ გავეცი _ ჩემი კულტურა და თანამდებობა იმის უფლებას არ მაძლევს, რომ მუშტიკრივი გავმართო უზნეო ახალგაზრდასთან. ამის შემდეგ შევიტყვეთ გულნარა ჩიჩუას პრეტენზიების შესახებ, რომ მისი ხალხი არ აირჩიეს კომისიის წევრებად. არავის არ დაუვალებია გულნარა ჩიჩუასთვის სიების შედგენა და თანამდებობის გამოყენება ამ საქმისთვის, ამ საკითხს შეისწავლის გამგეობის სპეციალური კომისია. რაც შეეხება ნუგზარ ცინცაძის მხრიდან შეურაცხყოფას, სამართალიდამცავ ორგანოებში შევიტან სარჩელს, მით უმეტეს, რომ ეს პირველი შემთხვევა არ არის მისის მხრიდან, _ თქვა ზენაიშვილმა მაგალითად მოიყვანა გამგეობის შენობის კედელზე მიწერილი მისი მისამართით გამოთქმული უცენზურო სიტყვები.
ნუგზარ ცინცაძე-უმცროსმა, რომელიც ამ განცხადებას ისმენდა, არ უარყო და დადასტურდა, რომ უცენზურო სიტყვები სწორედ მან დაწერა გამგეობის შენობის კედელზე: არ უარვყოფ! თქვენსავით კი არ ვარ, 9 პარტია რომ გამოიცვალეთ! _უთხრა ცინცაძემ ზენაიშვილს, რომელმაც მას პროვოკატორი უწოდა.
ამის შემდეგ ცინცაძემ გამგებლის მოადგილეს ხალხის შეურაცხყოფაში დასდო ბრალი: _ თამუნა ასკურავა ნაციონალია და თქვენ პარტიას წარმოადგენს საოლქოში; სირცხვილია, შენ რომ გამგებლის მოადგილე ხარ! შენ იძახდი, ლანჩხუთში ფეხბურთი უნდა გაუქმდესო, როცა ეს ჩვენი ისტორიაა.
დიდი ხმაურის შემდეგ ცინცაძემ დარბაზი დატოვა.
დარბაზში შემოსულმა ნუგზარ ჩხაიძემ კითხვის დასმა ითხოვა, რაზეც გამგებლის მოადგილემ უარი უთხრა და მას ამ, მისი თქმით, “სიბინძურის” იდეოლოგი და პროვოკატორი უწოდა:
_ თქვენი წაქეზებით იქცევა ეს ხალხი ასე. მე ამას ასე არ დავტოვებ, საჩივარი შემაქვს სასამართლოში! პრესკონფერენცია მოვიწვიე და ვამბობ ჩემს გულისტკივილს _ რატომ მიშლით ხელს, რა გინდათ! _ ამბობდა განერვიულებული ზენაიშვილი.
პრესკონფერენცია საკმაოდ დიდხანს გაგრძელდა და ხმაურით მიმდინარეობდა, დაპირისპირებული მხარეები ერთმანეთი ხმამაღლა უყვიროდნენ. გულნარა ჩიჩუას მიერ ჩადენილ საქციელზე პასუხი ზენაიშვილმა ნუგზარ ცინცაძეს მოსთხოვა და მის წაქეზებაშიც დასდო ბრალი: _ რაც მას დაემართება, ისიც შენი ბრალი იქნება! არავის არ დაუყენებია “ცანცუა” და ნუგზარ ჩხაიძე მშრომელთა მასების დამცველად. რაც შეეხება ჩვენს პოზიციას ადმინისტრაციული რესურსის გამოყენების შესახებ, ამას კატეგორიულად ვეწინააღმგედეგებოდით _ რა თქმა უნდა, მნიშვნელობა აქვს ჩემთვის არჩევნების შედეგს, მაგრამ კატეგორიულად მოვითხოვთ არჩევნების ობიექტურად ჩატარებას. რაც შეეხება ქალბატონ ჩიჩუას, მე ჩემს თავზე ვერ ავიღებ იმის გადაწყვეტას, რამდენად ჯდებოდა კანონის ფარგლებში მისი საქციელი, მაგრამ ვაცხადებ, რომ ჩემი აზრით ეს არაკანონიერია.
ნუგზარ ჩხაიძემ ზენაიშვილს ჩიჩუას ამბავი მოჰკითხა:
_ თუ იცით მაინც, როგორ მდგომარეობაშია გულნარა ჩიჩუა დღეს? ქალი, რომელსაც ბენზინი ჰქონდა ბოთლით ჩანთაში ჩადებული, თავის დაწვით იმუქრებოდა და მე კი ამ “ყველაფრის იდეოლოგი” მის გვერდით ვიდექი ღამის პირველის ნახევრამდე, შენ რა ზომები მიიღე?!
_ რა ზომები უნდა მიმეღო, მე ის გავაფრთხილე, რომ არ გეხება შენ არჩევნები და ნუ ერევი ამ საქმეში,-მეთქი. რადგან არ ჩერდები ამასაც ვიტყვი _ გუშინ 4 საათი იყო, როცა დამირეკა გიორგი ხელაძემ და მითხრა, გულო ჩიჩუა მისი მოთხოვნის არდაკმაყოფილების გამო ითხოვს ჩემს გადადგომას და მიიღეთ ზომებიო. თქვენ ამტკიცებთ, რომ ჩიჩუამ არასამუშაო საათებში გააკეთა ეს განცხადება, მე კი ვაცხადებ, რომ ხელაძის ზარი ჩემთან განხორციელდა 4 საათზე. ახლა რაც მოხდება, იქნება შენი ბრალი! _ მიმართა ზენაიშვილმა ჩხაიძეს, თუმცა, რა უნდა მოხდეს, არ დაუკონკრეტებია.
