“2012 წლის 13 იანვარს აღძრული სისხლის სამართლის საქმე ჩემს წინააღმდეგ როგორც იქნა შეწყდა. მინდა ვთქვა, რომ ბოლო პერიოდში მიდიოდა საუბარი, თუ ვაღიარებდი, რომ იარაღი რომელიც ჩამიდეს და მართლაც იყო ჩემი თითების ანაბეჭდები, შემეხებოდა ამინისტია. თუმცა, ეს ღირსების საქმე იყო, მე ბოლომდე მივყევი საქმეს და მიიღეს გადაწყვეტილება, რომ შეეწყვიტათ ჩემი დევნა. სასამართლოზე ბოლოს ისიც განვაცხდე, რომ დაიწყო სამართლიანობის აღდგენა. ეს ალბათ პირველი ფაქტია საპრეზიდენტო არჩევნების შემდეგ”.
როგორც ელგუჯა ჩხაიძემ განაცხადა, ის არ აპირებს შეჩერებას. აპირებს სარჩელი შეიტანს, რათა დაიწყოს ძიება თუ როგორ აღმოჩნდა მის ფერმაში ავტომატი და მასზე მისი თითების ანაბეჭდები.
“თუ დამტკიცდა, რომ ავტომატი ჩემი არ იყო, მაშინ ისიც საეჭვოა როგორ აღმოჩნდა ანაბეჭდები მჭიდზე. მოვითხოვ დადგენას, ბოლომდე მივყვები და არ შევეშვები სანამ სიმართლე არ გაირკვევა. ახლო მომავალში ვგეგმავ სარჩელი შევიტანო იმ ხალხის წინაამღდეგ, ვინც ეს საქმე ჩაიდინა. ძირითადად მაინტერესებს იარაღის ჩადება როგორ მოხდა, ან თითის ანაბეჭდები როგორ აღმოჩნდა მასზე. ვვარაუდობ, რომ წამაქციეს და ისე აიღეს ანაბეჭდები, მაგრამ მინდა ეს გამოძიებამ დადგინოს. აბსურდული ბრალდებებით 22 თვე გვაწვალეს და როგორც იქნა სამართლიანობა აღდგა”, _ ამბობს ჩხაიძე.
შეგახსენებთ, რომ ეს საკმაოდ გახმაურებული საქმეა რომელიც 2012 წლის 13 იანვარს მოხდა. როგორც თავად ელგუჯა ჩხაიძე ყვება, სტუმრებთან ერთად ქეიფობდა, რა დროსაც მას პოლიციის უფროსმა დავით ინარიძემ დაურეკა და სთხოვა ფერმაზე წაყოლოდა. კარავში შევიდნენ და პირდაპირ იმ ადგილზე მივიდნენ, საიდანაც შემდეგ ავტომატი ამოიღეს.
“მე მაშინვე ვუთხარი, რომ ეს მათი გაკეთებული იყო. 22 თვე მიმდინარეობდა სასამართლო პროცესი, ცრუმოწმეები ჰყავდა პოლიციას ჩემს წინააღმდეგ შმაგი ურატაძისა და ემზარ ჩხაიძის სახით. საქმე იმაშია, რომ ის ყველა იარაღისა და ნარკოტიკის ჩამდები პოლიციელი ისევ სამართალდამცავ ოგანოებში მუშაობენ”, _ იხსენებს “გურია ნიუსთან” საუბრისას ჩხაიძე.
