გიორგი ახვლედიანი გამოეხმარა მინისტრთა ახალი კაბინეტის შემადგენლობის წარდგენას და განაცხადა, რომ ამ პროცესმა კიდევ ერთხელ დაანახა ყველას, რომ ახალი პრემიერ-მინისტრი ჯერ კიდევ არ არის თავისუფალი საკუთარი გადაწყვეტილებების გამოტანაში.
“ის, რომ ღარიბაშვილმა ახალი მთავრობა წარადგინა და არანაირ ცვლილებას არ აქვს ადგილი, ეს ორ რამეზე მეტყველებს. პირველი ის, რომ მთავრობას ეკონომიკასთან დაკავშირებით არასერიოზული მიდგომა აქვს. ყველა ნორმალურ ქვეყანაში, სადაც საუბარია იმაზე, რასაც ბიუჯეტის 700მილიონიანი დანაკლისი ჰქვია, გამოიწვევდა პასუხისმგებელი პირების თანამდებობების დატოვებას. აქ კი ხედავთ, რომ კაბინეტში ცვლილება არ მომხდარა. წინასაარჩევნო დაპირებები გაქრა და საბოლოო ჯამში მთავრობამ გამოგვიცხადა, რომ არარეალურ პარამეტრებს ასახელებდა. საქმე გვაქვს ან ტყუილთან, ან არაპროფესიონალიზმთან. მეორე რაც ჩანს, ეს არის, რომ ღარიბაშვილი ჯერაც არ არის თავისუფალი გადაწყვეტილებების მიღებაში. დღეს ჯერ კიდევ გვყავს ივანიშვილის მთავრობა, რომელსაც ვერ ცვლის ახალი პრემიერი. ეს კი ნიშნავს, რომ ღარიბაშვილს ჯერ კიდევ აკონტრლებს რუხი კარდინალი არასამთავრობო სექტორიდან და მე ვისურვებდი, რაც შეიძლება ჩქარა განთავისუფლებულიყოს ახალი პრემიერი ძველის გავლენიდან და გადაწყვეტილებები თავად მიეღოს. იმედი მაქვს, გაზაფხულამდე ყველაფერი დარეგულირდება”.
ახვლედიანი აცხადებს, რომ ახალი პრემიერი შეეცდება პარტია “ქართული ოცნების” გაძლიერებას, რაც მთავრობის წარდგენის დღესაც გამოჩნდა.
გიორგი ახვლედიანმა აღნიშნა, რომ შეუძლებელია მოესწროს საკანონმდებლო ცვლილებები გაზაფხულამდე, ამიტომ ვადების გათვალისწინებით ადგილობრივი არჩევნების ჩატარება სავარაუდოდ 2014 წლის შემოდგომისთვის გადაიწევს, რასაც მისი აზრით მოჰყვება საპარლამენტო არჩევნებიც.
“დღეისათვის დგას სამი უმნიშვნელოვანესი საკითხი, რომლის ირგვლივ მიდის მსჯელობა არასაპარლამენტო ოპოზიციას შორის. ეს არის საარჩევნო კოდექსი, საკონსტიტუციო საკითხები და თვითმმართველობის რეფორმა. აი ამ საკითხების გარშემო მიდის მსჯელობა და იმედია მიიღწევა ერთიანი ფონი. სხვა არანაირ კოალიციაზე ჯერ საუბარი არ არის, ამ ეტაპზე მთავარია საერთო პოზიციების შეჯერება მოხდეს არასაპარლამენტო ოპოზიციაში”.
