ღირსების ორდენი გადაეცა გურიის ვიცე-გუბერნატორ ლელა თავართქილაძეს, ლანჩხუთის მუნიციპალიტეტის ყოფილ გამგებელ გიორგი გოგუაძეს, გურიის სამხარეო ადმინისტრაციის სამსახურის უფროს ისაკ ლომთათიძეს, “ერთიანი ნაციონალური მოძრაობის” ოზურგეთის რაიონული ორგანიზაციის ახალგაზრდული ფრთის ერთ-ერთი სახეს _ ვლადიმერ სურგულაძეს. ასევე, ღირსების ორდენი ერთი თვის წინ მიიღო გურიის ყოფილმა ვიცე-გუბერნატორმა, პაატა მანჯგალაძემ.
დაჯილდოებულთა სიაში აღმოჩნდა სოფელ ჭანიეთის რწმუნებული, დავით მჟავანაძე.
“ჯილდო, ჯერჯერობით, არ მიმიღია. თუმცა, დღეს ჩემთვის გახდა ცნობილი, რომ ჯილდოზე ნამდვილად ვარ წარდგენილი. თუ შენს შრომას ჯეროვნად აფასებენ და ამისთვის ქვეყნის პირველი პირი გაჯილდოებს, ეს სასიხარულო ფაქტია და ამაში ვერანაირ პრობლემას ვერ ვხედავ, რადგან დღემდე არცერთი პარტიის წევრი არ ვარ და პარტიულ ჯილდოდ არ მივიჩნევ ღირსების ორდენს,” _ უთხრა “გურია ნიუსს” დავით მჟავანაძემ.
“გურია ნიუსთან” საუბრის დროს, ოზურგეთის მუნიციპალიტეტის საკრებულოს დეპუტატი, ლელა ნაცვალაძე ამბობს, რომ ღირსების ორდენი უმეტესად გადაეცა იმ ადამიანებს, რომლებიც მიხეილ სააკაშვილის გვერდით ბოლომდე დარჩნენ:
“ეს არის დაფასება პრეზიდენტისგან, რაც მისი პრეზიდენტობის დროს ამ ადამიანების გვერდით დგომით გაკეთდა. საქართველოს ყოფილი პრეზიდენტი ძალიან უხვად არიგებდა ამ ჯილდოებს და სრულებითაც არ გამკვირვებია ეს ამბავი. ჩვენ კარგად ვიცით, რომ “ერთიან ნაციონალურ მოძრაობას” დიდი ამალა ჰყავდა მხარდამჭერებისა, ასევე, ვგულისხმობ წევრებს და საკრებულოს დეპუტატებს, საჯარო მოხელეებს, ისინი ცხრა წლის განმავლობაში მუხლჩაუდრეკლად ემსახურებოდნენ “ნაცმოძრაობას”, მაგრამ 2012 წლის არჩევნების შემდეგ ამ ადამიანთა რიცხვი საგრძნობლად შემცირდა და მე არ ვამტყუნებ იმაში მიხეილ სააკაშვილს, რომ გამოხატა დიდი პატივისცემა იმ ადამიანების მიმართ, რომლებიც ბოლო წუთამდე მისი იდეების და ხედვების გამტარებელი დარჩნენ,” _ განუცხადა “გურია ნიუსს” ლელა ნაცვალაძემ.
ოფიციალური სრული სია ამ ეტაპზე გასაიდუმლოებულია. საქართველოს პრეზიდენტ გიორგი მარგველაშვილის პიარ-მენეჯერ შალვა რამიშვილის თქმით, იმ პირთა ვინაობას, რომელთაც ორდენი გადაეცათ, მათივე ნებართვის გარეშე საჯაროდ ვერ დაასახელებს.
