“ჩვენ ყველას გვახსოვს როგორ ირგებდა სააკაშვილი და “ნაციონალური მოძრაობა” საკანონმდებლო ბაზას თავის თავზე, იგივეს იმეორებს დღევანდელი ხელისუფლება. აი, ამ შეცდომების კასკადმა გამოიწვია მათი რეიტინგის ვარდნა და ხელისუფლება ხვდება, რომ მათი კანდიდატი, ბატონი ნარმანია ვერაფრით აიღებს 50%-ს, სწორედ ამიტომ გადაწყვიტეს ბარიერის 40%-მდე დაწევა, მაგრამ ნარმანია იმდენ შეცდომას უშვებს, ამ ბარიერსაც ვერ გადალახავს, მერე გაიაზრებენ ამას და ისევ დაწევენ ბარიერს. ჩვენ ვერ დავუშვებთ კანონების ჭრა-კერვას კანდიდატების რეიტინგის მიხედვით”.
ბაღათურია ამბობს, რომ ხელისუფლებას ჯერ არ გაუთვალისწინებია კაჭრეთში შეხვედრის დროს ოპოზიციის მიერ წარდგენილი შენიშვნები და ვარაუდობს, რომ ახლაც, როგორც საპრეზიდენტო არჩევნების წინ ხელისუფლება დროის გაწელვის მეთოდს მიმართავს.
“ეს საკითხები იდგა საპრეზიდენტო არჩევნებამდეც, მაშინ იმსჯელეს, იმსჯელეს, მერე თქვეს დრო არ გვყოფნის და ეს საკითხები ადგილობრივი თვითმმართველობის არჩევნებისთვის გადავდოთო, ახლაც იგივე ხდება. შეიძლება ვცდები, მაგრამ რატომღაც მგონია, რომ ხელისუფლება ისევ დროს წელავს”.
“ქართული დასის” ლიდერი აცხადებს, რომ მიდის მოლაპარაკებები სხვადასხვა ოპოზიციურ პარტიასთან ერთიან კანდიდატზე შესაჯერებლად, მაგრამ სანამ არ იქნება საბოლოო შეთანხმება მიღებული და არ განისაზღვრება, როგორ გადანაწილდება ოპოზიციური სპექტრი, უმჯობესია დეტალები არ გასაჯაროვდეს. მისი განცხადებით დღევანდელი შეხვედრა ოპოზიციის პარტიებს შორის ეხება საარჩევნო კოდექსთან დაკავშირებულ საკითხებს.
ოპოზიციისგან განსხვავებით 40%-ან ბარიერს წინგადადგმულ და მნიშვნელოვან ნაბიჯად მიიჩნევს უმრავლესობის წევრი ზურაბ აბაშიძე. მან დღეს გამართულ ბრიფინგზე აღნიშნა, რომ ბარიერის თემა არის განხილვის საგანი, თუმცა სავსებით მისაღებია კოალიციაში შემავალი პარტიებისთვის.
“კოალიციაში შემავალ პარტიებს შორის მოხდა შეთანხმება, რომ მისაღებია 40%-ანიბარიერი, რადგან ეს ადეკვატურია დღევანდელი პოზიციისთვის. 50%იქნებოდა უკეთესი, მაგრამ არც 40%არ არის ცუდი. ეს არის საკმაოდ წინგადადგმული ნაბიჯი დემოკრატიის განვითარებისთვის”.
ცნობისთვის, დღეს, 15:00 საათზე, “ქართული დასისა” და “თავისუფალი საქართველოს” ერთობლივ ოფისში არასაპარლამენტო ოპოზიციის შეკრება გაიმართება. შეხვედრის თემა იქნება 40 პროცენტიანი ბარიერი და საარჩევნო კოდექსზე მიმდინარე მოლაპარაკებები.
