მუნიციპალიტეტის გამგებლის მოვალეობის შემსრულებლის, თამაზ ჯინჭარაძის ინფორმაციით, ააიპ-ის დირექტორის ხელფასი 700 ლარი გახდა, მოადგილის _ 600, ხოლო ბუღალტრებს 50 ლარით მეტი ანაზღაურება მიეცემათ.
როგორც გავიგეთ, ამის პარალელურად, მხარეთმცოდნეობის მუზეუმის დირექტორს, ნათია კალანდაძეს და სამუსიკო სკოლის სასწავლო ნაწილის გამგეს, დოდო მამალაძეს ხელფასები შეუმცირდათ. ამ ორი კონკრეტული პირის ხელფასების შემცირების მიზეზად თამაზ ჯინჭარაძე ყველას თანაბარ მდგომარეობაში ჩაყენებას ასახელებს:
_ ნათია კალანდაძეს და დოდო მამალაძეს, ამდენი ხნის განმავლობაში, ააიპ-ების დირექტორებზე მეტი ხელფასი ჰქონდათ. ასე იმიტომ ხდებოდა, რომ მათ პატრონი ჰყავდათ. მათი ხელფასების შემცირება განაპირობა იმან, რომ ყველა თანაბარ მდგომარეობაში ჩავაყენეთ, _ გვითხრა ჯინჭარაძემ.
რამდენად არის თანაბარ მდგომარეობაში ჩაყენებული მხარეთმცოდნეობის მუზეუმის ხელმძღვანელი სხვა მუზეუმის ხელმძღვანელებთან შედარებით, არ იცის სამუზეუმო გაერთიანების ხელმძღვანელმა შოთა ჩანტლაძემ. თუმცა, “გურია ნიუსთან” საუბრისას ადასტურებს, რომ მხარეთმცოდნეობის მუზეუმს, სხვა მუზეუმებთან შედარებით, უფრო მეტი დატვირთვა აქვს:
_ ჩვენ არ განვსაზღვრავთ საშტატო განრიგს. ეს დამტკიცებული მოვიდა გამგეობიდან, _ ამბობს ჩანტლაძე.
აღსანიშნავია, რომ არასამეწარმეო იურიდიულ პირებში არსებული გაბერილი შტატების შესახებ დღევანდელი ხელისუფლება ოპოზიციაში ყოფნის დროს ხშირად საუბრობდა _ ისინი ორი წლის წინ ამბობდნენ, რომ სულაც არ იყო საჭირო ააიპ-ის დირექტორს ორი მოადგილე ჰყოლოდა (ასეთი შემთხვევები კი ჩოხატაურის მაგალითიდან გამომდინარე, სულაც არ არის იშვიათი). ამბობდნენ იმასაც, რომ მათი მუშაობა აუცილებლად უნდა შესწავლილიყო, თუმცა, ეს თემა დღეს დავიწყებას მიეცა.
საქართველოს კანონმდებლობის თანახმად, სახელფასო ანაზღაურებაზე ადგილობრივი მუნიციპალიტეტის ბიუჯეტის მხოლოდ 25% შეიძლება გაიცეს. თუმცა, ხელისუფლება ამ კანონს დიდი ხანია არღვევს _ ამ დრომდე ადგილობრივი ბიუჯეტის თითქმის 40% სწორედ წლების განმავლობაში ხელფასებზე იხარჯებოდა. 2014 წლიდან კი, ეს პროცენტული მაჩვენებელი, გამომდინარე ხელფასების მატებიდან, მკვეთრად გაიზრდება.
ოფიციალური ინფორმაციით, ჩოხატაურის მუნიციპალიტეტში არსებულ ააიპ-ებში 384 პირია დასაქმებული (2014 წელს ეს ციფრიც იზრდება, რადგან რამდენიმე ადგილზე ახალი შტატი დაამატეს) _ ააიპ “მომავალს” (სკოლამდელი სააღმზრდელო დაწესებულებები), რომლის აღსაზრდელთა რაოდენობა 470 შეადგენს, 128 თანამშრომელი ჰყავს. სპორტსკოლას, რომლის აღსაზრდელი 250 მოზარდია _ 23 თანამშრომელი; მუსიკალურ სკოლას, სადაც 150 მოსწავლე სწავლობს _ 26; სამხატვრო სკოლაში, რომელსაც 85 მოსწავლე ჰყავს _ 16 შტატია; ამდენივე თანამშრომელი ჰყავს მოსწავლე-ახალგაზრდობის სახლს, რომელშიც 90 მოსწავლე სწავლობს.
მუზეუმებში 21 ადამიანია დასაქმებული; სპორტის განვითარების ცენტრში _ 14; ბიბლიოთეკებში _ 21; კომუნალურ სამსახურში _ 42; საფეხბურთო კლუბში _ 4; კულტურის ცენტრში _ 65; ჯანდაცვის ცენტრში _ 13.
აღსანიშნავია ისიც, რომ 2103 წლის დასაწყისში, საკრებულოს სხდომაზე გამგეობის საფინანსო სამსახურის უფროსმა, ზურაბ ჩანტლაძემ “გურია ნიუსის” შეკითხვაზე, მოხდა თუ არა 2012 წელს, წინასაარჩევნო პერიოდში, შტატების ხელოვნურად დამატება, დადებითი პასუხი გასცა.
მუნიციპალიტეტის ხელმძღვანელობამ კი პირობა დადო, რომ ამ საკითხს საფუძვლიანად შეისწავლიდა. უფრო მეტიც, ისიც თქვეს, რომ დაიწყებოდა შტატების შემცირება, თუმცა, გასული წლის საპრეზიდენტო არჩევნების დროს გაირკვა, რომ ააიპე-ბში შტატები ისევ დაემატა.
საშტატო ერთეულები ოზურგეთშიც დაამატეს, თუმცა არც გასულ და არც მიმდინარე წელს ორგანიზაციების ხელმძღვანელებს, მოადგილეებს და ბუღალტრებს ხელფასები არ მომატებიათ. წინასაარჩევნო დაპირება ოზურგეთში დაავიწყდათ და ააიპ-ების მუშაობა არც იქ შეუმოწმებიათ.
გამონაკლისი ლანჩხუთის მუნიციპალიტეტი იყო, სადაც აღნიშნული ორგანიზაციების საქმიანობა აუდიტის სამსახურმა შეისწავლა და სკანდალური დასკვნებიც დადო. თუმცა, დასკვნა დასკვნად დარჩა _ შესაბამისი რეაგირება და კონკრეტული პირის პასუხისმგებლობა ამ დრომდე არ დამდგარა.
“გურია ნიუსმა” მკითხველს ააიპ-ების მუშაობის შესახებ, მათ მიერ გახორციელებულ შესყიდვებსა და სხვა აქტივებზე არაერთი მოკვლევა შესთავაზა.
ამ თემაზე უფრო ვრცლად მომავალშიც გესაუბრებით, გაიგებთ რა პოზიცია აქვს ამ საკითხზე ახალდანიშნულ გუბერნატორს და რას ფიქრობენ ექსპერტები არასამეწარმეო იურიდიულ პირების მუშაობასთან დაკავშირებით.
