“დაუდგით ტელევიზორი მერაბიშვილს საკანში და აყურებინეთ, როგორ აწამებდნენ ხალხს”

და აღნიშნავს, რომ “ნაციონალური მოძრაობა” ამ ფაქტზე პოლიტიკურ პასუხისმგებლობას ცალსახად ვერ გაექცევა. ვაშაძე მიიჩნევს, რომ სიტუაცია მალე უნდა დასტაბილურდეს და არავის მიეცეს პოლიტიკური სპეკულაციების საშუალება.

“რთული სიტუაციაა, საკმაოდ რთული და ამაზრზენი ფაქტებია. უნდა მოხდეს სრული გამოძიება. ყველა უნდა დაისაჯოს. “ნაციონალური მოძრაობა” ცალსახად ვერ გაექცევა ამაზე პოლიტიკურ პასუხისმგებლობას, მაგრამ რაც ყველაზე მთავარია, ყველას სურვილია, რომ ქვეყანაში სტაბილური სიტუაცია იყოს შენარჩუნებული. მე ვფიქრობ, საქართველოში არის ძალები, რომლებსაც აინტერესებთ ქვეყანაში დესტაბილიზაცია და რთული გარემოს შექმნა. საჭიროა, მალე ავირიდოთ სიტუაციის ესკალაცია და პოლიტიკური სპეკულაცია. უნდა ვიფიქროთ პრევენციული ზომების შემუშავებაზე, რომ მსგავსი რამ არ განმეორდეს,” _ განაცხადა საპარლამენტო უმცირესობის წევრმა გიორგი ვაშაძემ.

უმცირესობის მსგავს კომენტარებს, საკმაოდ მწვავე შეფასება და გამოხმაურება მოჰყვა პარლამენტის ვიცე-სპიკერის მანანა კობახიძის მხრიდან. მან ცინიკური უწოდა იმ განცხადებებს, რომ თითქოს უმცირესობამ და მაშინდელმა ხელისუფლებამ არაფერი იცოდა იმის შესახებ, რაც ხდებოდა ქვეყანაში. მან პოლიტიკურ ოპონენტებს გირგვლიანის საქმე შეახსენა და მიუთითა, რომ მხოლოდ ეს საქმე იყო საკმარისი იმაზე დასაფიქრებლად, როგორ მართავდნენ ქვეყანას. კობახიძემ თავის განცხადებაშივე აღნიშნა, რომ დაუდგან ტელევიზორი ვანო მერაბიშვილს ციხეში, რათა 24 საათი აყურებინონ როგორ აწამებდნენ ხალხს.

“ცინიკური არის ის განცხადებები, რომ, თურმე, არაფერი იცოდნენ. მერაბიშვილი ფეისბუქით ბოდიშებს გვიხდის. თურმე, არ იცოდა და ეს ხალხი შევარდნაძის ხელისუფლებისგან შემოეპარათ. სირცხვილია, საზოგადოება გისმენთ! მხოლოდ გირგვლიანის საქმე იყო საკმარისი იმისთვის, რომ დაგენახათ, როგორ აშენებდით ქვეყანას. სად იყავით მაშინ, რატომ არ ებრძოდით ამ ძალადობას?! შევარდნაძის რეჟიმზე საუბრობთ _ თქვენ შექმენით, მისი რეჟიმი: მაჭავარიანმა, სააკაშვილმა და გოგორიშვილმა. “მოქალაქეთა კავშირი” მეტი პასუხისმგებლობით მოეკიდა საქმეს _ დაიხურეს ქუდი და წავიდნენ, თქვენ კი ისევ საპრეზიდენტო კანდიდატებს აყენებთ. დაუდგით ტელევიზორი მერაბიშვილს საკანში და 24 საათი აყურებინეთ, როგორ აწამებდნენ ხალხს. სახალხო დამცველის ანგარიშები აიღეთ, იგივე თქვენს მიერ ხელდასმული ტუღუშის. თქვენ არ იცოდით, რომ ხალხს აწამებდნენ?!” _ ასე უპასუხა პარლამენტის ვიცე-სპიკერმა მანანა კობახიძემ უმცირესობის გამოსვლებს და კომენტარებს იმასთან დაკავშირებით რომ მათ ადამიანთა წამებისა და არაადამიანური მოპყრობის შესახებ არაფერი იცოდნენ.