თავისუფლების განვითარების ინსტიტუტის ცნობით, აბაშის მუნიციპალიტეტის გამგებელმა გოჩა ჭანტურიამ პრემია მიმდინარე წლის მარტში 2 650 ლარის ოდენობით აიღო.
გამგებლის მოადგილეებზე, მაია ბესელიაზე, გიორგი სიმონიასა და ზურაბ ლომიაზე ამავე თვეში 1 300-1 300 ლარი გაიცა.
გამგეობის სამსახურების ხელმძღვანელმა პირებმა 2013 წლის იანვარსა და მარტში 1 000-1 000 ლარი მიიღეს პრემიის სახით, მხოლოდ შრომის, ჯანმრთელობის და სოციალური დაცვის სამსახურის უფროსზე ამავე თვეების მანძილზე 1 300-1 300 ლარი გაიცა, მუნიციპალური გამგეობის ეკონომიკური განვითარების სტატისტიკის და ინვესტიციების ხელშემწყობი, მუნიციპალური ქონების მართვის და ადგილობრივი გადასახდელების ადმინისტრირების და სპორტის და ახალგაზრდობის სამსახურების ხელმძღვანელებმა იანვარსა და მარტში 1 300 და 1 000 ლარი აიღეს. სოფლის მეურნეობის განყოფილების უფროსზე კი პრემია 1 000 ლარის ოდენობით მხოლოდ იანვარში გაიცა.
ქალაქის ტერიტორიული ორგანოს და სოფლების ტერიტორიული ორგანოს რწმუნებულებზე ამავე თვეებში 1 000-1 000 ლარი დაირიცხა.
ჯამში, 2013 წელს აბაშის მუნიციპალიტეტის გამგეობაში თანამდებობის პირებზე პრემიის სახით 61 051 ლარი გაიცა.
რაც შეეხება გამგეობის სხვა თანამშრომლებს, მათ 2013 წლის 1 იანვრიდან 1 აპრილამდე მთლიანობაში 98 949 ლარი მიიღეს.
მკითხველს შევახსენებთ, რომ გამგეობაში მიმდინარე საკადრო ცვლილებებთან დაკავშირებით ინფორმაციის მისაღებად ჯერ კიდევ თებერვალში „გურია ნიუსი“ დაუკავშირდა გამგეობის ადმინისტრაციული სამსახურის უფროსს, დიმიტრი ცანავას, რომელმაც განაცხადა: “12 თებერვალს, ოფიციალურად გახდა ცნობილი საკადრო ცვლილებების შესახებ, თუმცა, აქვე უნდა აღვნიშნო, რომ ყველა ეს ადამიანები მოვალეობის შემსრულებლები არიან იმ დრომდე, სანამ კონკურსი გამოცხადდება. გამგებლის მოადგილეების შემსრულებლები არიან – მაია ბესელია, ზურაბ ლომია და გიორგი სიმონია. გამგებლის ყოფილი მოადგილე, ვახტანგ გაბელაია გადაყვანილია მუნიციპალური ქონების მართვისა და ადგილობრივი გადასახადების სამსახურის უფროსის მოვალეობის შემსრულებლად. ვახტანგ გაბელაია შეცვალა ზურაბ ლომიამ. გამგებლის კიდევ ერთი ყოფილი მოადგილე, იური იობაია დაინიშნა სპორტისა და ახალგაზრდობის სამსახურის უფროსის მოვალეობის შემსრულებლად. კიდევ ერთი ცვლილება, რომელიც გახორციელდა ისაა, რომ გიორგი დუნდუა, რომელიც სოფლის მეურნეობის სამსახურის უფროსი იყო, დაინიშნა ეკონომიკური განვითარების, სტატისტიკისა და ინვესტიციების სამსახურის უფროსის მოვალეობის შემსრულებლად. კარგად რომ იყოს გასაგები, გეტყვით, რომ ეკონომიკისა და ინფრასტრუქტურის განვითარების სამსახურის ფუნქციები სამად გაიყო და სწორედ ამ სამსახურების უფროსის მოვალეობის შემსრულებლად დაინიშნნენ ვახტანგ გაბელაია და გიორგი დუნდუა. კიდევ ერთხელ აღვნიშნავ, ყველა ზემოთ ჩამოთვლილი ადამიანი არის მოვალეობის დროებითი შემსრულებელი”.
ამ კომენტარიდან გამომდინარე კარგად ჩანს, რომ გამგეობის მაღალჩინოსნებმა პრემია აიღეს მაშინ, როცა ერთი თვეც არ იყო გასული მათი თანამდებობებზე ოფიციალურად დანიშვნიდან. აღსანიშნავია ისიც, რომ ეს ადამიანები მოვალეობის შემსრულებლები არიან იმ დრომდე, სანამ კონკურსი გამოცხადდება.
