22 სექტემბერს, ოზურგეთის რაიონულ სასამართლოში, "ერთიანი ნაციონალური მოძრაობის" ლანჩხუთის რაიონული ორგანიზაციის თავმჯდომარის და საკრებულოს დეპუტატის, კახა ასკურავას, იურიდიულ საკითხთა და ეთიკის კომისიის თავმჯდომარის და დეპუტატის, რომან ბიწაძის და ლანჩხუთის მცხოვრების, ლილი ებრალიძის სასამართლო პროცესი დაიწყება. კახა ასკურავას ბრალი ბიწაძისა და ებრალიძის ფიზიკურ შეურაცხყოფაში ედება.
თავად დეპუტატი ასკურავა ჩვენთან საუბრის დროს ამბობს, რომ ეს არის "ქართული ოცნებიდან" პოლიტიკური თამაში და მას არავისთვის ფიზიკური შეურაცხყოფა არ მიუყენებია.
"გურია ნიუსის" კითხვებს ამჯერად რომან ბიწაძე პასუხობს, რომელიც ამბობს, რომ არ აპირებს სასამართლო პროცესამდე დეტალურად საუბარს.
_ ბატონო რომან, როგორც ცნობილი გახდა, კახა ასკურავას ბრალი ედება თქვენი და ლილი ებრალიძის ფიზიკურ შეურაცხყოფაში.
_ არა, არ ყოფილა ასეთი რამ. უბრალოდ, ამ საქმესთან დაკავშირებით დეტალურად არ ვაკეთებ კომენტარს იმიტომ, რომ იქნებ დაფიქრდეს ეს ადამიანი, სად დაუშვა შეცდომა და ბოდიში მოიხადოს. მე ბუნებით ლიბერალი ადამიანი ვარ, კახა ასკურავა უკან დახევის მაგივრად, პირდაპირ აგრესიაზე მოდის. იძახის, "ოცნებას" გავანადგურებ და ა.შ. კი, ბატონო, როგორც უნდა, ისე მოიქცეს, მაგრამ კიდევ ერთხელ ვამბობ, ჩემი მხრიდან არც სიტყვიერ, არც ფიზიკურ შეურაცხყოფას ადგილი არ ჰქონია.
_ როგორც ითქვა, თქვენ სოციალურ ქსელში სიტყვიერი შეურაცხყოფა მიაყენეთ კახა ასკურავას და სწორედ, აქედან დაიწყო დაპირისპირება.
_ არაფერი იქ შეურაცხმყოფელი არ ყოფილა.
_ მაშინ, რატომ მოხდა თქვენს და კახა ასკურავას შორის დაპირისპირება?
_ კახა, ალბათ, გაბრაზდა ჩემს კომენტარზე, თუმცა იმ კომენტარში მე ვიყავი მართალი. აქ საუბარი იყო კონტროლის პალატის საყოველთაო დაკითხვაზე, რომელიც მის კაბინეტში იმართებოდა, მისთვის მე არ მითქვამს, შენ ესწრებოდი-მეთქი. ყველას კარგად ახსოვს კონტროლის პალატის დაკითხვები და ის დამამცირებელი ფაქტები, რაც ყველამ კარგად ვნახეთ და გამოვიარეთ. ისე გამოდის, რომ ამ ხალხს მე ვაწამებდი, ან უცხო პლანეტიდან იყო ჩამოსული მოგელაძე.
_ კახა ასკურავა ამბობს, რომ დაპირისპირების დროს თქვენ თქვით, "ნაცმოძრაობა" უნდა გაქრეს პოლიტიკური რუკიდანო.
_ ჩემგან "ნაცმოძრაობა" საერთოდ არ ხსენებულა. "ნაცმოძრაობამ" რომ რაღაც უნდა მიიღოს სამართლებრივი ფორმით, ეს არ არის ახალი ამერიკის აღმოჩენა, ამას საზოგადოება ითხოვს.
_ ვრცელდება ინფორმაცია, რომ ეს ყველაფერი დაგეგმილი იყო და "ქართულ ოცნებას" კახა ასკურავას სკარებულოდან გაშვება უნდა.
_ ასეთი განცხადებებით კახა ასკურავა პოლიტიკური ქულების მოპოვებას ცდილობს. რა დაკვეთა, რის დაკვეთა. ნაცმოძრაობიდან საკრებულოში ორი ადგილია. კახა გავა და შემდეგი შემოვა, კვოტას ხომ არ კარგავს.
_ არის საუბარი, რომ თქვენ ხშირად ხვდებით კონფლიქტურ სიტუაციებში. როგორც ამბობენ, თქვენ რამდენჯერმე მიმართეთ სამართალდამცავებს და შეტანილი გაქვთ განცხადება, რომ მოგაყენეს ფიზიკური შეურაცხყოფა. _ არა, არანაირად არ არის ეს ინფორმაცია სიმართლესთან ახლოს.
