რა რაოდენობის საწვავს მოიხმარს საკრებულო ყოველთვიურად

"ოზურგეთის მუნიციპალიტეტის საკრებულოს თანამდებობის პირების და საჯარო მოხელეების მიერ სამსახურებრივი მოვალეობების შესასრულებლად გამოსაყენებელი მუნიციპალური ან პირად საკუთრებაში არსებული სატრანსპორტო საშუალებების საწვავით უზრუნველყოფა გახორციელდეს "ოზურგეთის მუნიციპალიტეტის 2014 წლის ბიუჯეტის დამტკიცების შესახებ" ოზურგეთს მუნიციპალიტეტის საკრებულოს 2014 წლის 13 აგვისტოს #3 დადგენილების დამტკიცებული ბიუჯეტის "საქონლისა და მომსახურების" მუხლიდან, შემდეგი ლიმიტის ფარგლებში:

საკრებულოს თავმჯდომარე _ 500 ლიტრი, საკრებულოს თავმჯდომარის მოადგილე _ 350 ლიტრი, საკრებულოს აპარატის უფროსი _ 150 ლიტრი; განათლების, კულტურის, სპორტის, ახალგაზრდულ საქმეთა, ჯანმრთელობის და სოციალურ საკითხთა კომისიის თავმჯდომარე _100 ლიტრი; აგრარულ საკითხთა, ქონების მართვისა და ბუნებრივი რესურსების საკითხთა კომისიის თავმჯდომარე _ 100 ლიტრი; სამანდატო, საპროცედურო, იურიდიულ საკითხთა და ეთიკის კომისიის თავმჯდომარე _ 100 ლიტრი; საფინანსო-საბიუჯეტო კომისიის თავმჯდომარე _ 100 ლიტრი; სივრცით-ტერიტორიული დაგეგმარების და ინფრასტრუქტურის კომისიის თავმჯდომარე _ 100 ლიტრი; ლეგალიზაციის კომისია _ 150 ლიტრი, ფრაქცია "ქართული ოცნება -დემოკრატიული საქართველოს" თავმჯდომარე _ 70 ლიტრი; ფრაქცია "კოალიცია ქართული ოცნება-თავისუფალი დემოკრატების" _ 70 ლიტრი; ფრაქცია ""ძლიერი სოფელის" თავმჯდომარე _ 70 ლიტრი; ფრაქცია "ჩვენი ოზურგეთი" _ თავმჯდომარე _ 70 ლიტრი; ფრაქცია "ერთიანი ნაციონალური მოძრაობას" თავმჯდომარე _ 70 ლიტრი; საკრებულოს თავმჯდომარის თანაშემწე _ 100 ლიტრი; განყოფილების უფროსებს _ 40 ლიტრი; მთავარ სპეციალისტებს _ 10 ლიტრი; მდივან-რეფერენტი _ 10 ლიტრი".

საკრებულოს თავმჯდომარის მიერ იქმნება საწვავის ყოველთვიური სარეზერვო ფონდი, რომელიც ხმარდება გაუთვალისწინებელ ღონისძიებებს _ 150 ლიტრის ოდენობით.

მივლინების დროს საწვავით უზრუნველყოფა გახორციელდეს საკრებულოს თავმჯდომარის გადაწყვეტილებით, საწვავის სარეზერვო ფონდის ფარგლებში. ოფიციალურ დოკუმენტს ხელს ოზურგეთის მუნიციპალიტეტის საკრებულოს თავმჯდომარე დავით დარჩია აწერს.

მიზანმიმართულად დაიხარჯება თუ არა საწვავის ძალიან დიდი რაოდენობა, ვინ უნდა გააკონტროლოს გახარჯული საწვავის ოდენობა, რამდენად მიზანშეწონილად მიიჩნევს საკრებულოს თავმჯდომარე ბიუჯეტიდან გამოყოფილი საწვავის ამ რაოდენობას _ ამაზე კომენტარს არასამთავრობო ორგანიზაციების იურისტები და თავად საკრებულოს თავმჯდომარე დავით დარჩია აკეთებენ.

იურისტი ლევან ალაფიშვილი "გურია ნიუსთან" ამბობს, რომ აღნიშნული საკითხით აუცილებლად უნდა დაინტერესდეს სამოქალაქო საზოგადოება: "500 ლიტრი საწვავი ერთი მანქანისთვის შეიძლება ბევრი იყოს, მეორესთვის _ ცოტა. რისთვის არის საჭირო 500 ლიტრი, 350 ან 150 ლიტრი? ეს ხომ არ არის იმისთვის, რომ მანქანით "იკატაონ", არამედ, პირიქით, საჯარო ფუნქციის შესასრულებლად უნდა გამოიყენონ. ძალიან კარგი იქნება, რომ ამას ყურადღება მიექცეს.

პირველი, რაც ძალიან მნიშვნელოვანი იქნება, განსაკუთრებით წარმომადგენლობითი ორგანოებისთვის, საკრებულოებისთვის, გაწერონ მოსახლეობასთან შეხვედრების გეგმა და გახადონ მაქსიმალურად საჯარო, ამის შემდეგ ნაკლები კითხვები გაჩნდება ამ კუთხით, საწვავსა და იგივე მივლინებებთან დაკავშირებით, მუშაობენ თუ არა, ატარებენ თუ არა შეხვედრებს, რა რაოდენობის საწვავი დაიხარჯა, ეს ადგილობრივი მუნიციპალიტეტებისთვისაც კარგი იქნება. რადგან ხალხთან ყველაზე ახლოს არის თვითმმართველობა. რაშის ხარჯავ 500 ლიტრ საწვავს? ან მეორე _ 350-ს, მესამე _ 150 ლიტრს? ეგებ, ერთი მანქანით გადაადგილდებიან შეხვედრების დროს? ხომ სავსებით ლეგიტიმური კითხვაა? ოთხი-ხუთი ადამიანი შეიძლება ერთი მანქანით გადაადგილდეს. ხვალ და ზეგ ასეთი კითხვები აუცილებლად გაჩნდება", _ აღნიშნავს ალაფიშვილი "გურია ნიუსთან".

ირაკლი პაპავა, "საქართველოს დემოკრატიული განვითარების კავშირის" იურისტი:

_ მოცემულ შემთხვევაში, ამ კონკრეტული ხარჯების შეფასებისას, შეიძლება მისმა სიდიდემ (მოცულობამ) აზრთა სხვადასხვაობა გამოიწვიოს და სავსებით შესაძლებელია, მუნიციპალური ბიუჯეტიდან ამ ოდენობის ხარჯების გაწევა ვინმეს გადაჭარბებულად მიაჩნდეს, მაგრამ ერთ რამეს უნდა გაესვას ხაზი _ მუნიციპალიტეტის საკრებულოს თანამდებობის პირებისა და აპარატის თანამშრომლების მხრიდან თავიანთი სამსახურებრივი უფლებამოსილებების ჯეროვნად გახორციელება, წესითა და რიგით, ხშირად მოითხოვს მუნიციპალიტეტის შემადგენლობაში შემავალ ადმინისტრაციულ ერთეულებში ადგილზე გასვლებს, რასაც, ბუნებრივია, სატრანსპორტო საშუალებები და საწვავით უზრუნველყოფის ხარჯები ესაჭიროება (მაგალითად, საკრებულოს თანამდებობის პირების გასვლითი შეხვედრები მოსახლეობასთან, მათთან ინტენსიური ურთიერთობა, რაც ამ პირთა უშუალო სამსახურებრივ მოვალეობას წარმოადგენს. ასევე, საკრებულოს აპარატის ვალდებულება, დოკუმენტურად, ოქმის შედგენის გზით, გააფორმოს, მაგალითად, საკრებულოს მაჟორიტარი წევრების მიერ თავიანთ მაჟორიტარულ ოლქში ჩატარებული ამომრჩევლების ყოველთვიური მიღება). აქ ძირითადი და ამოსავალი ერთი რამ უნდა იყოს _ საწვავით უზრუნველყოფისთვის დადგენილი ხარჯები ზღვრული ლიმიტის ფორმით უნდა იქნას განსაზღვრული და მის ფარგლებში კონკრეტული ხარჯის გაწევა საკრებულოს თავმჯდომარის ან/და საკრებულოს აპარატის მიერ წარმოდგენილი ფაქტობრივი მონაცემების საფუძველზე უნდა მოხდეს; კერძოდ, აღრიცხული უნდა იქნას საკრებულოს ამა თუ იმ თანამდებობის პირს ან აპარატის თანამშრომელს თავისი უშუალო სამსახურებრივი უფლებამოსილების გასახორციელებლად რამდენი გასვლითი შეხვედრა დასჭირდა, თითოეული გასვლისას სატრანსპორტო საშუალებით რა მანძილი გაიარა და რამდენი ლიტრი საწვავი დასჭირდა ამისთვის. შესაბამისად, ამ ფაქტობრივი მონაცემების დაჯამების შედეგად უნდა იქნას გამოყვანილი კონკრეტულ თანამდებობის პირზე ან აპარატის თანამშრომელზე ყოველ თვეში გასაცემი საწვავის რეალური ხარჯის ოდენობა. ამასთან, თითოეულმა პირმა ერთგვარი "ანგარიშგება" უნდა წარმოადგინოს და დაასაბუთოს მის მიერ უშუალოდ თავისი სამსახურებრივი მოვალეობის გასახორციელებლად (და არა პირადი საჭიროებისთვის) მოხმარებული საწვავის ოდენობა.

_ რისთვის უნდა იყოს გამოყოფილი საწვავი?

_ საწვავით უზრუნველყოფის ხარჯები გამოყოფილი უნდა იყოს მუნიციპალიტეტის საკრებულოს თანამდებობის პირებისა და საჯარო მოხელეების მიერ თავიანთი სამსახურებრივი მოვალეობების ჯეროვნად შესრულების ხელშეწყობის მიზნით. როგორც წესი, საკრებულოს თანამდებობის პირები ვალდებულნი არიან ინტენსიური ურთიერთობა ჰქონდეთ მუნიციპალიტეტის მოსახლეობასთან, ამომრჩევლებთან, ადგილზე გაეცნონ მოსახლეობის აზრს და პრობლემებს, რაც, ბუნებრივია, გასვლით შეხვედრებსაც მოიცავს და გულისხმობს. რაც შეეხება საკრებულოს აპარატის უფროსსა და აპარტის თანამშრომლებს, ისინი, ვალდებულნი არიან, ადგილებზე ესწრებოდნენ საკრებულოს წევრების მიერ ამომრჩევლთა ყოველთვიურ მიღებას, ამომრჩევლებთან შეხვედრებს, ანგარიშის წარდგენას და უზრუნველყონ ამ შეხვედრების დოკუმენტური გაფორმება, ოფიციალური ოქმების შედგენის გზით. სწორედ ამ ტიპის გასვლებისა და უშუალო სამსახურებრივი მოვალეობების შესრულებისთვის უნდა გამოეყოთ ზემოაღნიშნულ პირებს მუნიციპალურ ან პირად საკუთრებაში არსებული სატრანსპორტო საშუალებების საწვავით უზრუნველყოფის ხარჯები.

ოზურგეთის მუნიციპალიტეტის თემების საკრებულოს თავმჯდომარე დავით დარჩია აღნიშნავს, რომ წინა მოწვევის საკრებულოსგან განსხვავებით, ამ კუთხით ძალიან დიდი ეკონომია გააკეთეს:

_ ჩვენ მაქსიმალურად შევამცირეთ საწვავის ოდენობა, ვიდრე ჰქონდა წინა საკრებულოს, გავაკეთეთ 500 ლიტრის ეკონომია. აქამდე ჩვენი ხარჯებით დავდიოდით. დღეს ორ შეხვედრაზე ვიყავით, თითქმის ყოველ დღე გვაქვს შეხვედრები, ხან ერთი, ხან ორი მანქანით მივდივართ. თანხებს აბსოლუტურად მიზანმიმართულად ვხარჯავთ.

_ ბატონო დავით აღნიშნავთ, რომ ხან ერთი მანქანით დადიხართ შეხვედრებზე, ხან ორით, სხვა მოხელეებისთვის გამოყოფილი საწვავი სად მიდის? შეგიძლიათ გვითხრათ აპარატის უფროსს რაში სჭირდება 150 ლიტრი საწვავი?

_ წინა საკრებულოში აპარატის უფროსს ჰქონდა 250 ლიტრი, ახლა შევამცირეთ, მასზეა დამოკიდებული საკრებულოს გამართული მუშაობა, _ გვითხრა დავით დარჩიამ.