აკაკი იმნაიშვილს ლანჩხუთი კარგად იცნობს, როგორც წარმატებულ მეწარმეს, ქველმოქმედს და მისი პოლიტიკაში გამოჩენა, ცოტა არ იყოს, მოულოდნელი იყო ბევრისთვის. იმნაიშვილმა ადგილობრივ არჩევნებში "ქართული ოცნების" კვოტით მიიღო მონაწილეობა და შუხუთის ადმინისტრაციული ერთეულის მაჟორიტარი გახდა. საკრებულოში მოხვედრის შემდეგ ის ფრაქცია "ქართული ოცნება-მრეწველებში" გაერთიანდა და ერთ-ერთი აქტიური დეპუტატია, როგორც საკრებულოს, ასევე, კომისიის სხდომებზე.
რამდენიმე ხნის წინ, მუნიციპალიტეტის სააქტო დარბაზში ფეხბურთის მესვეურთა გახმაურებულ შეხვედრაზე, იმნაიშვილს რამდენიმე საკითხზე კამათი მოუვიდა ლანჩხუთის მუნიციპალიტეტის გამგებელ ზაზა ურუშაძესთან. უფრო მეტიც, გამგებელმა დეპუტატს მარინა თოთლაძის აქტიური მხარდაჭერა არ მოუწონა და "რას ლაპარაკობთ, ბაიბურში არ ხართო" _ საჯაროდ მიმართა. ბუნებრივია, საუბარი აკაკი იმნაიშვილთან აღნიშნული თემით დავიწყეთ.
_ ძალიან შეურაცხყოფილი ვარ. საზოგადოება კარგად მიცნობს და თავად შეაფასებს ყველაფერს. გამგებელი თუ თვლის, რომ მე, როგორც ბიზნესმენი ფინანსების ბაიბურში არ ვარ, ძალიან ცუდი. მიმაჩნია, რომ მუნიციპალიტეტი ვალდებულია, მარინა თოთლაძეს და მის ოჯახს, რომლებმაც ამდენი სასიკეთო საქმე გააკეთეს ლანჩხუთის ფეხბურთის გადასარჩენად, დახარჯული თანხა უკან დაუბრუნოს. მთავარი აქ ადამიანური ფაქტორია და არა ფინანსური. რა თქმა უნდა, დოკუმენტაციის გარეშე ფულის გაცემა ვერ მოხდება და იმედს ვიტოვებ, ორივე მხარე საერთო ენას მალე გამონახავს და სადავოც არაფერი იქნება. როგორც ვიცი, ამის წინაპირობა უკვე არსებობს და ეს ძალიან კარგია.
_ გამგებელთან კამათი იმ დღეს გრიგოლეთის ბაზის თაობაზეც გქონდათ…
_ დიახ, ასე ვთქვათ. მე განვაცხადე, რომ გუნდს გაცილებით შეუმცირდებოდა ხარჯები, თუ გრიგოლეთის ბაზას აღვადგენდით და იქ ნორმალურ სავარჯიშო პირობებს შევქმნიდით. ვერ გამიგია _ ბატონი ზაზა ხშირად ამაყობს გრიგოლეთის ბაზის დაბრუნებით, მაგრამ თუ ის ისევ უმოქმედოდ გვექნება, რა აზრი ჰქონდა მის დაბრუნებას? ასე ეკონომიკის სამინისტროს ხელშიც იყო და რა მერე?
_ ბაზის აღდგენა დიდ ფინანსებთანაა დაკავშირებული და ეს ურუშაძემ მაშინ განაცხადა კიდეც…
_ ჯობს, ახლა გამოინახოს თანხა, რომელიც სამომავლოდ დიდ შეღავათს მოგვცემს. ადგილობრივი ბიუჯეტი ამას ვერ უზრუნველყოფს. მთავარია, საქართველოს მთავრობას დავანახოთ, რომ ბაზის აღდგენა მნიშვნელოვანია და არ მგონია, ინფრასტრუქტურული პროექტების თანხებიდან, ვინმემ დაგვამადლოს, თუნდაც, მინიმუმ, ნახევარი მილიონი ლარი. ამ ფულით გრიგოლეთში ელემენტარულ პირობებს შევქმნით, გუნდმა რომ ივარჯიშოს და დაისვენოს. ამით სასტუმროს და კვების ხარჯებს ხომ მაინც შევამცირებთ ბევრად? სამომავლოდ ბაზაზე სხვადასხვა გუნდს მივიღებთ და შემოსავალიც გაიზრდება. მესმის, ეს ბევრს უტოპიად მიაჩნია, მაგრამ მერწმუნეთ, ასეთი უნიკალური მდებარეობის ბაზა დიდი კოზირია ლანჩხუთისთვის. აი, ეს ვიგულისხმე მაშინ და რატომღაც გამგებელმა არ მოიწონა. არადა, მერე იმავეს გაკეთებას ვაპირებო, კი განაცხადა.
_ რით ახსნით იმ ფაქტს, რომ მეხუთე თვეა, შუხუთში გამგებელმა საკუთარი წარმომადგენელი არ დანიშნა? გიქმნით თუ არა ეს გარკვეულ დისკომფორტს?
_ რა თქმა უნდა, მიქმნის, მთელ სოფელს უქმნის. ხშირად მესმის შუხუთელებისგან, რომ გამგებელი მათ ასე ისტუმრებს _ გყავთ არჩეული დეპუტატი და მას მიმართეთო. მე პასუხისმგებლობას არასდროს გავქცევივარ, მაგრამ უმეტეს შემთხვევაში, არის საკითხები, რომელთა მოგვარებას ოფიციალური რწმუნება სჭირდება და რის გამოც, ამხელა სოფელი უხერხულობებს აწყდება. მე მყავდა კანდიდატურა, მაგრამ დაბლოკეს და თუ რატომ არ ინიშნება წარმომადგენელი, ეს თავად გამგებელს ჰკითხეთ.
_ ამ გაურკვევლობების ფონზე კვლავ "ქართული ოცნების" გუნდში რჩებით თუ სხვა მიზნები გაქვთ?
_ არამარტო უმრავლესობის წევრად ვრჩები, არამედ, აქტიურად ვიზიარებ იმ ფასეულობებს, რომელიც ბიძინა ივანიშვილს გააჩნია. მე ვამაყობ, რომ ბატონი ბიძინას იდეების თანამოაზრე ვარ და მიმაჩნია, რომ მისი გაკეთებული საქმე განუზომელია. სამომავლოდ კი, მისი ხედვა მართლაც დააყენებს ქვეყანას სწორ, ევროპული ფასეულობების გზაზე. ამ კურსის ღირსეულ გამგრძელებლად მივიჩნევ ირაკლი ღარიბაშვილს. მე მჯერა, რომ მას დიდი ნდობა აქვს და სამომავლოდაც ექნება მოსახლეობის უმეტესი ნაწილის, რაც მისი გადაწყვეტილებების სისწორეში ბევრჯერ დაგვარწმუნებს.
_ რა იყო ბიზნესიდან აქტიურ პოლიტიკაში თქვენი გადასვლის უმთავრესი მიზეზი?
_ ერთ-ერთი მიზეზი, ჩემი პოლიტიკური შეხედულებები და იმ გუნდის გვერდში ყოფნა იყო, რომელიც დღეს ხელისუფლებაშია. მეორე და, ალბათ, უმთავრესი მიზეზი, გურიის გუბერნატორის, გიორგი ჩხაიძის სურვილი და პოზიცია ჩემთან მიმართებაში. სწორედ მისმა მხარდაჭერამ გადამადგმევინა ეს ნაბიჯი. ჩვენი ურთიერთობა ახლა არ დაწყებულა, ხშირად გვიწევდა მსჯელობა სოფლის ინტერესებიდან გამომდინარე. როგორც მთელი მისი ოჯახი, გიორგიც ქველმოქმედი ადამიანია, უამრავი მადლი უკეთებია და მისი წარმატებული ბიზნესიდან მიღებული შემოსავლის დიდი წილი ქველმოქმედებისთვისაა განკუთვნილი. მას შემდეგ, რაც პრემიერმა ამ გულანთებულ ადამიანს გურიაში სახელისუფლებო გუნდის საქმის კეთება ანდო, მე არ მქონდა უფლება, შემოთავაზება არ მიმეღო. თანაც, მე დიდ პატივს ვცემ რაიონის მაჟორიტარ დეპუტატს თემურ ჩხაიძეს, რომლის მხარდაჭერამაც განმიმტკიცა ჩემი გადაწყვეტილების სისწორე.
